एजेन्सी – इन्डियन प्रिमियर लिग (आइपिएल) २०२२ मा आज चेन्नई सुपर किंग्स र सनराइजर्स हैदराबादबीच प्रतिस्पर्धा हुँदैछ । खेल नेपाली समय अनुसार दिउँसो ३ : ४५ मा डिवाई पाटिल स्पोर्ट्स एकेडेमी मुम्बईमा सुरुहुनेछ ।

चेन्नई र हैदराबाद दुबै अंक बिहीन छन् । केन विलियम्सनको कप्तानीमा रहेको हैदराबाद र रविन्द्र जडेजाको कप्तानीमा रहेको चेन्नई पहिलो जितका साथ मैदान उत्रनेछन् । हैदराबाद २ खेलमा जित बिहीन हुँदै पुछारमा छ ।

चेन्नई ३ खेलमा पराजित हुँदै आठौं स्थानमा छ । धोनीपछि पहिलो पटक रविन्द्र जडेजाले कप्तानी गरेको चेन्नई सुरुवाती तीनै खेलमा हारको साथ खराब सुरुवात गरेको छ ।

चेन्नई कोलकातासँग र लखनऊ सुपर जायन्ट्ससँग ६–६ विकेटले पराजित भएको थियो । पन्जाबसँग ५४ रनले पराजित भएको थियो । चेन्नई युवा ओपनर ऋतुराज गायकवाडबाट उत्कृष्ट प्रदर्शन चाहन्छ । मोईन अली, रोबिन उथप्पा र अम्बाती रायुडूबाट राम्रो सुरुवात चाहन्छ । विकेटकिपर धोनी र जडेजा फिनिसर हुन् ।

चेन्नईको बलिङ आक्रामण यस पटक कमजोर छ । म्याच विनर तीव्र गतिका बलर नहुँदा समस्यामा परेको छ । अक्सनमा १४ करोड खर्चेर किनेका दीपक चाहर चोटका कारण उपलब्ध नभएपछि समस्यामा परेको हो । बलिङ आक्रामण आजको खेलमा सुधार गर्नुपर्ने हुन्छ ।
हैदराबाद राजस्थानसँग ६१ रन र लखनऊसँग १२ रनले पराजित भएको थियो ।

हैदराबादका केन विलियम्सन, निकोलस पुरन र एडेन माक्ररम प्रमुख ब्याटर हुन् । यी तीन ब्याटरमा बढी निर्भर छ । पुरनबाट हैदराबाद उत्कृष्ट प्रदर्शन चाहन्छ । रोमारियो शेफर्डको स्थानमा मार्को ज्यानसनलाई मौका दिनसक्छ ।

हैदराबादको बलमा भुवनेश्वर कुमार, टि नटराजन र उमरन मलिक प्रमुख हतियार हुन् । आजको दोस्रो खेलमा रोयल च्यालेन्जर्स बेंगलोर र मुम्बई इन्डियन्सबीच प्रतिस्पर्धा हुनेछ ।