काठमाडौं (हाम्रो खेलकुद) – तीव्र गतिका बलर सोमपाल कामी र युवा ब्याटर रोहित पौडेलको उत्कृष्ट प्रदर्शनमा त्रिभुवन आर्मी क्लबले प्रो क्लब च्याम्पियनसिपमा नेपाल एपिएफ क्लबलाई ५१ रनले पराजित गरेको छ ।

१ सय ४० रनको विजयी लक्ष्य पछ्याएको एपिएफ १९.१ ओभरमा ८८ रनमा अल आउट भयो । एपिएफका ओपनर तथा कप्तान प्रदीप ऐरीले १६ बलमा ४ चौका र २ छक्कासहित सर्वाधिक ३१ रन बनाए । रित गौतम २८ बलमा १२ रन र लोकेश बम २४ बलमा ९ रनमा आउट भए । सन्दीप जोरा ९, सुमित महर्जन १२ र अमर राउटेला ४ रनमा आउट भए ।

आर्मीका सोमपाल कामीले ४ ओभरमा १८ रन खर्चेर ४ विकेट लिए । साहब आलमले ४ ओभरमा ८ रन खर्चेर २ विकेट लिए । कुशल मल्ल र विक्रम सोबले २–२ विकेट लिए ।

त्यसअघि सिद्धार्थ क्रिकेट रंगशाला भैरहवामा टस जितेर पहिला ब्याटिङ थालेको आर्मीले निर्धारित २० ओभरमा ६ विकेट गुमाउँदै १ सय ३९ रन बनाएको थियो । आर्मीका रोहित पौडेल ५७ बलमा ९ चौका र १ छक्कासहित सर्वाधिक ८० रनमा अविजित रहे । कप्तान विनोद भण्डारी २० बलमा १ चौकासहित १९ रनमा आउट भए ।

ओपनर सन्तोष कार्की ७ र हरि चौहान शून्यमा आउट भएका थिए । सन्तोष नन्दन यादवको बलमा सुमित महर्जनबाट क्याच भए । भीम सार्की २३ बलमा २ चौकासहित २२ रन बनाउँदै क्याच भए । राजेश पुलामी २ र कुशल मल्ल शून्यमा आउट भए ।

एपिएफका स्पिनर भुवन कार्कीले ४ ओभरमा ३५ रन खर्चेर २ विकेट लिए । किशोर महतोले ४ ओभरमा २६ रन खर्चेर २ विकेट लिए । अमर राउटेला र नन्दन यादवको नाममा १–१ विकेट रह्यो ।