एजेन्सी – मध्यक्रमका ब्याटर रिची बेरिंगटनको शतकमा स्कटल्यान्डले आइसिसी विश्वकप लिग–२ मा पपुवा न्युगिनीमाथि १ सय ६२ रनको सानदार जित हात पारेको छ ।

दुबईमा टस हारेर पहिला ब्याटिङको निम्तो पाएको स्कटल्यान्डले निर्धारित ५० ओभरमा ३ विकेट गुमाउदै २ सय ८४ रन बनाएको थियो । स्कटल्यान्डका बेरिंगटनले १ सय २७ बलमा १० चौका र २ छक्कासहित १ सय १४ रनको अविजित शतकीय इनिङ खेले । उनको ओडिआई करिअरको दोस्रो शतक हो ।

जर्ज मुन्शे ६२ बलमा ६ चौका र ४ छक्कासहित ७९ रनमा अविजित रहे । चौथो विकेटका लागि मुन्शे र बेरिंगटनले १ सय ६७ रनको अविजित शतकीय साझेदारी गर्दै बलियो योगफलमा पुर्याएका थिए ।

जुन स्कटल्यान्डबाट ओडिआईमा चौथो विकेटका लागि भएको उच्च साझेदारी हो । ओपनर काइल कोट्जर १३, म्याथ्यू क्रस २१ र कलुम म्याकलेओडले ३२ रन बनाए । पीएनजीका सेमो कमिया, चाद सोपर र राइली हकुरेले १–१ विकेट लिए ।

जितका लागि २ सय ८५ रनको विजयी लक्ष्य पछ्याएको पीएनजी १ सय २२ रनमा अल आउट भयो पीएनजीका सेसे बाउले ५७ बलमा ३ चौकासहित सर्वाधिक २९ रन बनाए । लेगा सियाका १३, असाद भाला १०, चाल्र्स अमिनी २, नोर्मन भानुआ १९ र चाद सोपर १३ रनमा आउट भए ।

स्कटल्यान्डका तीव्र गतिका बलर गेभिन मेनले ५.५ ओभरमा २६ रन खर्चेर ४ विकेट लिए । हम्जा ताहिरले २ विकेट लिए । स्कटल्यान्ड १३ खेलमा ८ मा जित र ३ मा हार सहित १८ अंकका साथ तेस्रो स्थानमा छ । पीएनजी १७ खेलमा १ मा जित र १६ मा हारका साथ पुछारमा छ । नेपाल १२ खेलमा ६ मा जित र ६ मा हारका साथ छैटौं स्थानमा छ ।

ओमान २८ खेलमा १७ मा जित र ९ मा हारका साथ शीर्षस्थानमा छ । स्कटल्यान्डले आज ओमानसँग खेल्नेछ । पीएनजीले मंगलबार ओमानसँग खेल्नेछ ।