एजेन्सी – इन्डियन प्रिमियर लिग (आइपिएल) २०२२ अन्तर्गत आजको दोस्रो खेलमा दुई बलिया टोली लखनऊ सुपर जायन्ट्स र राजस्थान रोयल्सबीच प्रतिस्पर्धा हुँदैछ ।

खेल नेपाली समय अनुसार साँझ ७ : ४५ मा वानखडे स्टेडियम मुम्बईमा सुरु हुनेछ । लखनऊ सानदार जितका साथ शीर्षस्थानमा उक्लिन चाहन्छ । राजस्थान तेस्रो जित निकाल्ने सोचमा हुनेछ । लोकेश राहुलको कप्तानीमा रहेको लखनऊ ४ खेलमा ३ मा जित र १ मा हारसहित चौथो स्थानमा छ । राजस्थान ३ खेलमा २ मा जित र १ मा हारसहित पाँचौं स्थानमा छ ।

राजस्थानका ओपनर जस बटलर उच्च लयमा छन् । बटलरले मुम्बईविरुद्ध १ सय र बेंगलोरविरुद्ध ७० रनको इनिङ खेलेका थिए । बटलरलाई अर्का ओपनर यशस्वी जैसवालले साथ दिनेछन् । देवदत्त पाडिक्कल, सन्जु स्यामसन, शिम्रन हेटमायर र रियान पराग जस्ता खेलाडी टोलीमा हुँदा ब्याटिङ मजबुत छ । हेटमायर, बटलर र स्यामसन तीनै खेलाडी आक्रामक ब्याटिङको लागि चिनिन्छन् ।

यस सिजनकै उत्कृष्ट बलिङ आक्रामण देखिएको राजस्थानमा ट्रेन्ट बोल्ट, नवदीप सैनी र प्रसिद्ध कृष्णा जस्ता तीव्र गतिका बलर छन् । स्पिनरमा युजभेन्द्र चाहल र रविचन्द्रन आश्विन छन् । यता लखनऊमा राहुल र क्विन्डन डिकक ओपनर हुन् । यी दुई ओपनरको प्रदर्शनले धेरै महत्व राख्नेछ ।

पछिल्लो खेलमा दिल्लीलाई हराउन डि ककले ८० रनको इनिङ खेलेका थिए । एविन लेविस, दीपक हुडा, आयुष बदोनी र क्रुनाल पान्ड्या मध्यक्रमका हतियार हुन् । युवा स्टार बदोनीले फिनिसरको भूमिका निर्वाह गर्दै आएका छन् । हुडा र बदोनीको उच्च प्रदर्शनले थप मजबुत बनेको छ । एन्ड्रुय टाईको स्थानमा मार्कस स्टोइनिसलाई मौका दिनसक्छ ।

मार्कस स्टोइनिस र जेसन होल्डर जस्ता अलराउन्डर हुँदा मजबुत बनेको छ । स्पिनर रवि विश्रोईले मध्यक्रममा लगातार विकेट लिँदै आएका छन् । तीव्र गतिका बलर आवेश खान पनि त्यतिनै राम्रो लयमा छन् । यस सिजनका दुई बलिया टोली राजस्थान र लखनऊबीच कडा प्रतिस्पर्धाको अपेक्षा गरिएको छ ।

अंक तालिका

कोलकाता नाइट राइडर्स ४ खेलमा ३ मा जित र १ मा हार सहित ६ अंकका साथ नेटरनरेटको कारण शीर्षस्थानमा छ । गुजरात ३ खेलमा ६ अंकका साथ दोस्रो स्थानमा छ । बेंगलोर ४ खेलमा ३ मा जित र १ मा हारसहित तेस्रो स्थानमा छ । लखनऊ ४ खेलमा ३ मा जित र १ मा हार सहित ६ अंकका साथ चौथो स्थानमा छ । समान ६ अंक भएपनि शीर्ष चार नेटरनरेटको आधारमा निर्धारण भएको छ ।

राजस्थान रोयल्स ३ खेलमा २ मा जित र १ मा हार सहित पाँचौं स्थानमा छ । पन्जाब ४ खेलमा २ मा जित र २ मा हार सहित छैटौं स्थानमा छ । दिल्ली ३ खेलमा १ मा जित र २ मा हार सहित सातौं स्थानमा छ । हैदराबाद ३ खेलमा १ मा जित र २ मा हार सहित आठौं स्थानमा छन् । समान ४ खेल जित विहीन मुम्बई नवौं र चेन्नई पुछारमा छन् ।