एजेन्सी – इन्डियन प्रिमियर लिग (आइपिएल) का सर्वाधिक दुई सफल फ्रेन्चाइज टोली चेन्नई सुपर किंग्स र मुम्बई इन्डियन्सले खराब सुरुवात गरेका छन् । २०२२ का सुरुवाती चारै खेलमा दुबै टोली जित बिहीन बन्दै समस्यामा परेका छन् । जित बिहीन हुने जारी सिजनमा यी दुई टोली मात्र हुन् ।

चेन्नईले आफ्नो इतिहामा पहिलो पटक सुरुवाती दुबै खेल गुमाएको थियो । सन् २०१० पछि मात्रै चेन्नई एकै सिजनमा लगातार चार खेलमा पराजित भएको हो । आइपिएलमा १४ संस्करण सकिँदा चेन्नई चार र मुम्बईले पाँच गरि कुल ९ उपाधि जितेका छन् ।

मुम्बईको लागि नौलो सुरुवात भने होईन । मेगा अक्सन वर्ष मुम्बईको त्यति सम्झन लायक हुँदैन । मुम्बईले २०१४ मा सुरुवाती पाँच खेल नै गुमाएको थियो । २०१८ को मेगा अक्सन वर्षमा सुरुवाती तीन खेल गुमाएको थियो । २००८ मा पनि मुम्बईले सुरुवाती ४ खेल गुमाएको थियो । २०१५ मा मुम्बईले सुरुवाती ४ खेल गुमाएपनि त्यसपछि उत्कृष्ट प्रदर्शनका साथ उपाधि जितेको थियो । मुम्बई २०१३, २०१५, २०१७, २०१९ र २०२० को च्याम्पियन टोली हो ।

मुम्बई यस सिजनमा पहिलो खेलमा दिल्लीसँग ४ विकेट, राजस्थान रोयल्स २३, कोलकाता नाइट राइडर्ससँग ५ विकेट र रोयल च्यालेन्जर्स बेंगलोरसँग ७ विकेटले पराजित भएको थियो । विदेशी खेलाडी चल्न नसक्दा नै खराब प्रदर्शन गर्नु परेको हो । अर्कोतर्फ रोहित शर्मा, काइरन पोलार्ड र जस्प्रित बुमराह चल्न सकेका छैनन् ।

मुम्बईको बिदेशी कोटाका चार खेलाडी कमजोर देखिएका छन् । पोलार्ड प्रमुख हतियार हुन् । तर उनी चलेका छैनन् । बेंगलोरसँग मुम्बईले दुई मात्र विदेशी खेलाडी पोलार्ड र डेवाल्ड ब्रेभिसलाई मैदान उतारेको थियो । यसले मुम्बईमा विदेशी खेलाडीको अवस्था कस्तो छ अनुमान गर्न सकिन्छ ।

अक्सनमा मुम्बईले टिम डेविडलाई ८ करोड २५ लाख भारु र जोफ्रा आर्चरलाई ८ करोड भारुमा किनेको थियो । आर्चर यस सिजनमा उपलब्ध नहुने अक्सन अघि नै जनाएका थिए । आगमी वर्षको लागि किनेको थियो । डेविडको भने प्रदर्शन सुरुवाती दुई खेलमा १३ रन बनाएपछि ब्रेभिसलाई मौका दिएको थियो । ८ विदेशी खेलाडीमा पोलार्ड, डेविड, डेवाल्ड ब्रेभिस, ड्यानियल साम्स, आर्चर, फबिएन एलेन र टाइमल मिल्स छन् ।

तर प्रदर्शन अपेक्षा अनुसार हुन सकेन । मेरिडीथ र फबिएन एलेनले भने मौका पाएका छैनन् । सुरुवाती समय जस्प्रित बुमराहको प्रदर्शन पनि राम्रो छैन । बुमराहले ४ खेलमा ३ विकेट लिएका छन् । ट्रेन्ट बोल्ट राजस्थान रोयल्स पुगेपछि उनी पनि कमजोर देखिएका छन् ।
यता चेन्नईमा भने स्टार खेलाडीको नै कमी देखिन्छ ।

आइपिएलमा सर्वाधिक सफल कप्तान महेन्द्रसिंह धोनीले नेतृत्व छाडेपछि चेन्नईले इतिहासकै खराब सुरुवात गरेको छ । चेन्नई शनिबार सनराइजर्स हैदराबादसँग ८ विकेटले पराजित भयो । कोलकाता नाइट राइडर्स र दोस्रो खेलमा लखनऊ सुपर जायन्ट्ससँग ६–६ विकेटले पराजित भएको थियो ।

तेस्रो खेलमा पन्जाब किंग्ससँग ५४ रनले पराजित भएको थियो ।चेन्नईले २०१० मा लगातार चार खेलमा पराजित भएपनि उत्कृष्ट पूनरागमनका साथ पहिलो उपाधि जितेको थियो । चेन्नई २०१०, २०११, २०१८ र २०२१ को च्याम्पियन टोली हो ।

धोनीले २००८ देखिनै चेन्नईको आइपिएलको कप्तानी गर्दै एक सर्वाधिक सफल टोलीको छाप छाडेका थिए । चेन्नई २००८, २०१२, २०१३ र २०१५, २०१९ को फाइनलमा पराजित भएको थियो । २००९ मा सेमिफाइन र २०१४ मा तेस्रो हुँदै बाहिरिएको थियो । स्पोट फिक्सिङको कारण २०१६ र २०१७ मा भने चेन्नई र राजस्थानलाई प्रतिबन्ध लागेको थियो ।

धोनीले कप्तानी छाड्नुसँगै मेगा अक्सनमा नयाँ टिम निर्माणमा ध्यान नदिनु चेन्नईले कमजोर प्रदर्शन गर्नुको कारण हो । चेन्नईलाई युवा स्टार खेलाडीको अभाव देखिन्छ । प्रमुख ओपनर ऋतुराज गायकवाड पनि चल्न सकेका छैनन् । चेन्नईसँग ब्याटिङमा टि२० विशेष खेलाडीको कमी देखिन्छ ।

चेन्नई र मुम्बई प्ले अफमा पुग्न सक्छन् ?

अहिलेको प्रदर्शन अनुसार चेन्नई र मुम्बईलाई प्ले अफमा स्थान बनाउन कठिन देखिन्छ । आइपिएलमा एक टोलीले कुल १४ खेल खेल्नेछन् । चेन्नई र मुम्बईले १०–१० खेल खेल्न बाँकी छ । प्ले अफमा पुग्न कम्तिमा यी दुबै टोलीलाई ७–७ खेल जित्नु पर्ने हुन्छ । तर अहिलेको नतिजा र टोली हेर्दा भने कठिननै देखिन्छ ।