काठमाडौं (हाम्रो खेलकुद) – कप्तान प्रदीप ऐरीको अर्धशतकमा नेपाल एपिएफ क्लबले प्रो क्लब च्याम्पियनसिपमा ट्यालेन्ट हन्ट क्रिकेट एकेडेमीलाई ७ विकेटले पराजित गरेको छ ।

जितका लागि १ सय २६ रनको विजयी लक्ष्य पछ्याएको एपिएफले १९ ओभरमा ३ विकेट गुमाउँदै पूरा गर्यो । एपिएफको जितमा कप्तान प्रदीप ऐरी ५८ बलमा ६ चौकासहित ५४ रनमा अविजित रहे । ओपनर दीपक बोहराले ३८ बलमा ५ चौका र १ छक्कासहित ४२ रन जोड्दै राम्रो सुरुवात दिलाएका थिए । आयुषमान बम ९ र सन्दीप जोरा १० रनमा आउट भए ।

त्यसअघि सिद्धार्थ रंगशाला भैरहवामा टस जितेर पहिला ब्याटिङ रोजेको एकेडेमीले निर्धारित २० ओभरमा ८ विकेट गुमाउँदै १ सय २५ रन बनाएको थियो । उसका लागि असदुरजमान बरेनायोले ३४ बलमा ४ चौकासहित ३० रन बनाए । शरियारे रिमन २२, अबिदुर कैफ १६, राज बम २१ र आशिष रत्नम १९ रन बनाए । एपिएफका भुवन कार्की र प्रदीप ऐरीले २–२ विकेट लिए ।

अंक तालिका

एपिएफ ३ खेलमा २ मा हार र १ मा जितसहित समूह बी को तेस्रो स्थानमा छ । एपिएफ सेमिफाइनल दौडबाट बाहिरिएको छ । त्रिभुवन आर्मी क्लब २ खेलमा २ मा जित सहित शीर्ष स्थानमा छ । उत्तर प्रदेश क्रिकेट क्लब–११ समान खेल र नतिजाका साथ दोस्रो स्थानमा छ । उत्तर प्रदेश र आर्मी समूह बी बाट समिफाइनलमा पुगेका छन् ।

समूह ए मा रुपन्देही–११ ले २ खेलमा २ मा जितका साथ शीर्षस्थानमा छ । मलेसिया २ खेलमा १ जित र १ मा हार सहित दोस्रो स्थानमा छ । पुश स्पोर्ट्स दिल्ली २ खेलमा १ मा जित र १ मा हार सहित तेस्रो स्थानमा छ । नेपाल पुलिस क्लब २ खेलमा पराजित रहँदै पुछारमा छ ।