काठमाडौं (हाम्रो खेलकुद) – मलेसिया–११ ले प्रो क्लब च्याम्पियनसिपमा नेपाल पुलिस क्लबमाथि १ विकेटको रोमान्चक जित हात पारेको छ । योसँगै पुलिस ३ खेल जित बिहीन हुँदै समूह चरणबाट बाहिरिएको छ ।

जितको लागि १ सय रनको विजयी लक्ष्य पछ्याएको मलेसियाले १७ ओभरमा ९ विकेट गुमाउँदै पूरा गर्यो । मलेसियाको जितमा नाजरिल रहमानले २८ बलमा ५ चौकासहित सर्वाधिक २७ रन बनाए । सैद अजिज १३, शार्विन मुनीआन्दी १८ र मोहम्मद वाफिकले ११ रन बनाए ।

मलेसिया १२.५ ओभरमा ६५-८ को अवस्थामा पुगेको थियो । मुनीआन्दी र जुहदी हजालनले नवौं विकेटका लागि १५ रनको साझेदारी गरे । अन्तिम विकेटका लागि मुनीआन्दीले वाफिकसँग २० रनको अविजित साझेदारी गरेका थिए । १७ औं ओभरमा कप्तान मञ्जित श्रेष्ठले २ चौका र १ छक्कासहित १६ रन खर्चेपछि मलेसियाको जित पक्का बनेको थियो ।

पुलिसका पवन सरार्फले ४ ओभरमा १ मेडनसहित १९ रन खर्चेर ३ विकेट लिए । सागर ढकाल, करण केसी, मञ्जित श्रेष्ठ र गुलशन झाले १(१ विकेट लिए ।

त्यसअघि सिद्धार्थ रंगशाला भैरहवामा टस हारेर ब्याटिङ थालेको पुलिस १९.४ ओभरमा ९९ रनमा अल आउट भयो । पुलिसका प्रेम तामाङले ३१ बलमा १ चौका र १ छक्कासहित सर्वाधिक २८ रनमा अविजित रहे । ओपनर पवन सरार्फले १४ बलमा ३ चौका र २ छक्कासहित २५ रन बनाए । शंकर राना १०, करण केसी ४, दीलिप नाथ शून्य, अर्जुन साउद ४ र सागर ढकालले २४ बलमा १४ रन जोडे ।

मलेसियाका सैद अजिजले ४ ओभरमा १ मेडनसहित १५ रन खर्चेर ५ विकेट लिए । शार्विन मुनीआन्दीले ४ ओभरमा १ मेडनसहित ५ रन खर्चेर ३ विकेट लिए ।

समूह ए मा रुपन्देही-११ ले २ खेलमा ४ अंकका साथ शीर्ष स्थानमा छ । मलेसिया ३ खेलमा २ मा जित र १ मा हार सहित दोस्रो स्थानमा छ । रुपन्देहीले बुधबार पुश स्पोर्ट्स दिल्लीसँग खेल्नेछ । उक्त खेलमा रुपन्देही विजयी भएमा मलेसिया सेमिफाइनलमा पुग्नेछ ।

रुपन्देही पराजित भएमा दिल्ली र मलेसियाको नेटरनरेटमा निर्भर रहनेछ । मलेसियाको नेटरनरेट ०.५३० र दिल्लीको माइनस ०.४९५ छ ।दिल्ली २ खेलमा १ मा जित र १ मा हार सहित तेस्रो स्थानमा छ । पुलिस ३ खेलमा पराजित हुँदै अंक बिहीन बन्दै बाहिरिएको छ ।

समूह बी मा त्रिभुवन आर्मी क्लब २ खेलमा २ मा जित सहित शीर्ष स्थानमा छ । उत्तर प्रदेश क्रिकेट क्लब–११ समान खेल र नतिजाका साथ दोस्रो स्थानमा छ । उत्तर प्रदेश र आर्मी समूह बी बाट समिफाइनलमा पुगेका छन् । एपिएफ ३ खेलमा २ मा हार र १ मा जितसहित समूह बी को तेस्रो स्थानमा रहँदै बाहिरिएको छ ।