एजेन्सी – चार पटकको च्याम्पियन चेन्नई सुपर किंग्सले इन्डियन प्रिमियर लिग (आइपिएल) २०२२ मा रोयल च्यालेन्जर्स बेंगलोरलाई २३ रनले हराउँदै पहिलो जित हात पारेको छ । स्पिनर महेश थिक्सनाको सानदार बलिङमा चेन्नईले लगातार चार हारमा पूर्ण विराम लगाउँदै पहिलो जित निकालेको हो ।

२ सय १७ रनको विशाल विजयी लक्ष्य पछ्याएको बेंगलोरले निर्धारित २० ओभरमा ९ विकेट गुमाउँदै १ सय ९३ रन बनायो । बेंगलोरका स्पिन अलराउन्डर शहबाज अहमदले २७ बलमा ४ चौकासहित सर्वाधिक ४१ रन बनाए । डेब्यू खेल खेलेका सुयश प्रभुदेशाईंले १८ बलमा ५ चौका र १ छक्कासहित ३४ रन बनाए ।

स्पिनर महेश थिक्सना र रविन्द्र जडेजाले सानदार प्रदर्शन गर्दै जितको आधार तय गरे । महेशले तेस्रो ओभरको पाँचौं बलमा बेंगलोरका कप्तान फाफ डु प्लेसिसलाई ८ रनमा क्रिज जोर्डनबाट क्याच गराउँदै पहिलो सफलता दिलाए । तीव्र गतिका बलर मुकेश चौधरीले विराट कोहलीलाई १ रनमा शिवम दुबेबाट क्याच गराउँदै बेंगलोरलाई ठूलो झड्का दिए ।

युवा ओपनर अनुज रावतलाई महेशले १२ रनमा एलबीडब्लू आउट गरे । जडेजाले ग्लेन म्याक्सवेललाई २६ रनमा बोल्ड गरेपछि बेंगलोरको जित कठिन बनेको थियो । म्याक्सवेलले ११ बलमा २ चौका र २ छक्का प्रहार गरे । त्यसपछि महेशले शहबाज अहमद र सुयशलाई आउट गर्दै चेन्नईको जित सहज बनाए ।

विकेटपिकर दीनेश कार्तिक १४ बलमा २ चौका र ३ छक्कासहित ३४ रनमा आउट भए । बेंगलोरलाई अन्तिम १८ बलमा जितको लागि ४८ रन चाहिँएको थियो । ड्वेन ब्राभोको १८ औं ओभरको दोस्रो बलमा कार्तिक डिप मिडविकेटमा जडेजाबाट क्याच भए बेंगलोरको अन्तिम आशा सकिएको थियो

चेन्नईका स्पिनर महेश थिक्सनाले ४ ओभरमा ३४ रन खर्चेर ४ विकेट लिए । रविन्द्र जडेजाले ४ ओभरमा ३९ रन खर्चेर ३ विकेट लिए । मुकेश चौधरी र ड्वेन ब्राभोले १–१ विकेट लिए ।

त्यसअघि डिवाई पाटिल स्पोर्ट्स एकेडेमी मुम्बईमा टस हारेर ब्याटिङको निम्तो पाएको चेन्नईले निर्धारित २० ओभरमा ४ विकेट गुमाउँदै २ सय १६ रन बनाएको थियो । चेन्नईका रोबिन उथप्पाले ५० बलमा ४ चौका र ९ छक्कासहित ८८ रनको उत्कृष्ट प्रदर्शन गरे । उथप्पाको आइपिएल करिअरको उत्कृष्ट प्रदर्शन हो ।

शिवम दुबेले ४६ बलमा ५ चौका र ८ छक्कासहित ९५ रनमा अविजित रहे । दुबेको पनि आइपिएलको उच्च प्रदर्शन हो । दुबेले ८ र उथप्पाले ९ गरि कुल १७ छक्का प्रहार गरे । तेस्रो विकेटका लागि उथप्पा र दुवेले ७४ बलमा १ सय ६५ सानदार कीर्तिमानी शतकीय साझेदारी गर्दै विशाल योगफलमा पुर्याएका थिए ।

आइपिएलमा यो तेस्रो विकेटका लागि भएको उच्च साझेदारी हो । यसअघि तेस्रो विकेटका लागि २०१२ मा डेक्कन चार्जसका कुमार संगाकारा र क्यारन ह्वाइटले १ सय ५७ रनको साझेदारी गरेका थिए । यस सिजनमा बेंगलोरको लागि पहिलो खेल खेलेका अष्ट्रेलिया तीव्र गतिका बलर जोश हेजलवुडले ओपनर ऋतुराज गायकवाडलाई १७ रनमा एलबीडब्लू आउट गरे ।

१६ बल खेलेका गायकवाड ३ चौका प्रहार गरे । गतवर्ष चेन्नईलाई च्याम्पियन बनाउन सर्वाधिक रन बनाउदै ओरेन्ज क्याप जितेका गायकवाड यस सिजनमा चल्न सकेका छैनन् । मोईन अली ३ रनमा रन आउट भए । जुन समय चेन्नई ६।४ ओभरमा ३६–२ को अवस्थामा पुगेको थियो । त्यसपछि दुबे र उथप्पाले सानदार ब्याटिङ गरेका हुन् ।

पहिलो १० ओभरमा ६०-२ को अवस्थामा रहेको चेन्नईले अन्तिम ६० बलमा १ सय ५५ रन बनाउँदै विशाल योगफलमा पुर्याएको हो । बेंगलोरका वानिन्दु हसरंगाले सर्वाधिक २ विकेट लिए ।

चेन्नईले यसअघि चारै खेलमा पराजित भएको थियो । चेन्नईले अव आइतबार गुजरात टाइटन्ससँग खेल्नेछ । बेंगलोरको यो पाँचौं खेलमा दोस्रो हार हो । बेंगलोरले अव शनिबार दिल्ली क्यापिटल्ससँग खेल्नेछ ।

अंक तालिका

राजस्थान रोयल्स ४ खेलमा ३ मा जित र १ मा हार सहित ६ अंकका साथ नेटरनरेटमा माथि रहँदै शीर्ष स्थानमा छ । कोलकाता नाइट राइडर्स ५ खेलमा ३ मा जित र २ मा हार सहित ६ अंकका साथ दोस्रो स्थानमा छ । लखनऊ ५ खेलमा ३ मा जित र २ मा हार सहित तेस्रो स्थानमा छ । गुजरात ४ खेलमा ३ मा जित र १ मा हार सहित चौथो स्थानमा छ । बेंगलोर ५ खेलमा ३ मा जित र २ मा हारसहित पाँचौं स्थानमा पुगेको छ ।

दिल्ली ४ खेलमा २ मा जित र २ मा हार सहित छैटौं स्थानमा छ । पन्जाब ४ खेलमा २ मा जित र २ मा हार सहित सातौं स्थानमा छ । हैदराबाद ४ खेलमा २ मा जित र २ मा हार सहित आठौं स्थानमा छ । चेन्नई ५ खेलमा १ मा जित र ४ मा हार सहित नवौं स्थानमा छ । मुम्बई ४ खेलमा जित बिहीन हुँदै पुछारमा छ ।