एजेन्सी – कप्तान लोकेश राहुलको सानदार शतकमा लखनऊ सुपर जायन्ट्सले इन्डियन प्रिमियर लिग (आइपिएल) २०२२ को २६ औं खेलमा मुम्बई इन्डियन्सलाई २ सय रनको विशाल लक्ष्य दिएको छ ।

ब्रेबोन स्टेडियम मुम्बईमा टस हारेर ब्याटिङ थालेको लखनऊले निर्धारित २० ओभरमा ४ विकेट गुमाउँदै १ सय ९९ रन बनायो । लखनऊका कप्तान लोकेश राहुलले ६० बलमा ९ चौका र ५ छक्कासहित १ सय ३ रनको अविजित शतकीय इनिङ खेले । राहुलको यो आइपिएल करिअरको यो तेस्रो शतक हो ।

ओपनर क्विन्टन ड कक १३ बलमा ४ चौका र १ छक्कासहित २४ रनमा आउट भए । मनिष पाण्डे ३८, मार्कस स्टोइनिस १०, दीपक हुडा १५ रनमा आउट भए । मुम्बईका जयदेव उनादकटले ४ ओभरमा ३२ रन खर्चेर २ विकेट लिए । मुरुगन आश्विन र फबिएन एलेनले १-१ विकेट लिए ।

मुम्बई सुरुवाती पाँच खेलमा हारका साथ पुछारमा छ । मुम्बई जारी सिजनमा जित बिहीन बन्ने एक्लो टोली हो । रोहित शर्माको कप्तानीमा रहेको मुम्बई पहिलो जितको खोजीमा छ ।

मुम्बईले हालसम्म आइपिएल इतिहासमा लगातार ६ सुरुवाती खेल गुमाएको छैन । यसअघि मुम्बईले २०१४ मा सुरुवाती पाँच खेल लगातार गुमाएको थियो । त्यस्तै २०१८ र २०१५ मा सुरुवाती ४ खेल लगातार गुमाएको थियो । २०१५ मा भने उत्कृष्ट पूनरागमनका साथ दोस्रो पटक च्याम्पियन बनेको थियो । मुम्बईले आज हारेको खण्डमा इतिहासकै खराब प्रदर्शन गर्नेछ ।