एजेन्सी – विकेटकिपर दीनेश कार्तिक र ग्लेन म्याक्सवेलको अर्धशतकमा रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२२ को २७ औं खेलमा दिल्ली क्यापिटल्सलाई १ सय ९० रनको लक्ष्य दिएको छ ।

वानखडे स्टेडियम मुम्बईमा टस हारेर ब्याटिङको निम्तो पाएको बेंगलोरले निर्धारित २० ओभरमा ५ विकेट गुमाउँदै १ सय ८९ रन बनायो । बेंगलोरका विकेटकिपर दीनेश कार्तिक ३४ बलमा ५ चौका र ५ छक्कासहित ६६ रनको उत्कृष्ट अविजित इनिङ खेले ।

स्पिनर कुलदीप यादवको १४ औं ओभरको तेस्रो बलमा एज लागेपनि विकेटकिपर तथा कप्तान ऋषभ पन्तले कार्तिकको ब्यक्तिगत ५ रनमा ड्रप गर्दै जीवनदान दिएका थिए । जुन दिल्लीलाई कार्तिको जीवनदान भारी पर्न पुग्यो । जुन समय बेंगलोर १३.३ ओभरमा १००-५ को अवस्थामा थियो । बेंगलोरले त्यसपछि ३९ बलमा ८९ रन बनाउँदै कठिन अवस्थाबाट बलियो योगफलमा पुगेको थियो ।

ग्लेन म्याक्सवेलले ३४ बलमा ७ चौका र २ छक्कासहित ५५ रन बनाए । शहबाज अहमद २१ बलमा ३ चौका र १ छक्कासहित ३२ रनमा अविजित रहे । छैटौं विकेटका लागि शहबाज र दीनेशले ५२ बलमा ९७ रनको अविजित साझेदारी गर्दै बलियो योगफलमा पुर्याएका हुन् ।
दोस्रो ओभरको पहिलो बलमा शार्दुल ठाकुरले ओपनर अनुज रावतलाई शून्यमा एलबीडब्लू आउट गरे ।

कप्तान फाफ डु प्लेसिस खलिल अहमदको बलमा प्वाइन्टमा अक्षर पटेलबाट ८ रनमा समातिन पुगे । विराट कोहली १२ रनमा रन आउट हुन पुगेका थिए ।

दीनेश कार्तिकले १८ औं ओभरमा तीव्र गतिका बलर मुश्ताफिजुर रहमानलाई ४ चौका र २ छक्कासहित कुल २८ रन जोडेका थिए । कार्तिकले सुरुवाती तीन बलमा चौका, त्यसपछिका दुई बलमा छक्का र अन्तिम बलमा चौका सहित ठूलो ओभरमा परिणत गरेका थिए ।

दिल्लीका शार्दुल ठाकुर, कुलदीप यादव, खलिल अहमद र अक्षर पटेलले १-१ विकेट लिए ।