एजेन्सी – दीनेश कार्तिक र जोश हेजलवुडको उत्कृष्ट प्रदर्शनमा रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२२ को २७ औं खेलमा दिल्ली क्यापिटल्सलाई १६ रनले हराएको छ । योसँगै बेंगलोर चौथो जितका साथ अंक तालिकामा तेस्रो स्थानमा उक्लिएको छ ।

१ सय ९० रनको विजयी लक्ष्य पछ्याएको दिल्लीले २० ओभरमा ७ विकेट गुमाउँदै १ सय ७३ रन बनायो । दिल्लीका ओपनर डेविड वार्नरले ३८ बलमा ४ चौका र ५ छक्कासहित सर्वाधिक ६६ रन बनाए ।

दिल्लीलाई ओपनर पृथ्वी शा र वार्नरले पहिलो विकेटका लागि ४.४ ओभरमा ५० रन जोड्दै राम्रो सुरुवात दिलाए । शा मोहम्मद शिराजको बलमा अनुज रावतबाट १६ रनमा आउट भए । वार्नर १२ औं ओभरको तेस्रो बलमा स्पिनर वानिन्दु हसरंगाको बलमा एलबीडब्लू आउट भए ।

दिल्लीले मध्यक्रमका तीन ब्याटर तीन रन बनाउन गुमाएपछि समस्यामा परेको थियो । जारी सिजनको पहिलो आइपिएल खेल खेलेका मिचेल मार्श २४ बल खेल्दै १४ रनमा रन आउट भए । रोभम्यान पावेल जोश हेजलवुडको बलमा गोल्डेन डक आउट भए । पावेल १५ औं ओभरको पहिलो बलमा आउट भए । अन्तिम बलमा ललित यादव पनि १ रनमा आउट भएपछि दिल्ली समस्यामा परेको थियो ।

दिल्लीलाई अन्तिम ३० बलमा ७५ रन चाहिँएको थियो । शिराजको बलमा पन्त १७ औं ओभरको तेस्रो बलमा विराट कोहलीले एक हातले उत्कृष्ट क्याच लिएपछि दिल्लीको जितको सम्भावना कठिन बनेको थियो ।

पन्तले १७ बलमा ३ चौका र २ छक्कासहित ३४ रनमा आउट भए । बेंगलोरका जोश हेजलवुडले ४ ओभरमा २८ रन खर्चेर ३ विकेट लिए । मोहम्मद शिराजले ४ ओभरमा ३१ रन खर्चेर २ विकेट लिए ।

त्यसअघि वानखडे स्टेडियम मुम्बईमा टस हारेर ब्याटिङको निम्तो पाएको बेंगलोरले निर्धारित २० ओभरमा ५ विकेट गुमाउँदै १ सय ८९ रन बनाएको थियो । बेंगलोरका विकेटकिपर दीनेश कार्तिक ३४ बलमा ५ चौका र ५ छक्कासहित ६६ रनको उत्कृष्ट अविजित इनिङ खेले ।

स्पिनर कुलदीप यादवको १४ औं ओभरको तेस्रो बलमा एज लागेपनि विकेटकिपर तथा कप्तान ऋषभ पन्तले कार्तिकको ब्यक्तिगत ५ रनमा ड्रप गर्दै जीवनदान दिएका थिए । जुन दिल्लीलाई कार्तिको जीवनदान भारी पर्न पुग्यो । जुन समय बेंगलोर १३.३ ओभरमा १००-५ को अवस्थामा थियो । बेंगलोरले त्यसपछि ३९ बलमा ८९ रन बनाउँदै कठिन अवस्थाबाट बलियो योगफलमा पुगेको थियो ।

ग्लेन म्याक्सवेलले ३४ बलमा ७ चौका र २ छक्कासहित ५५ रन बनाए । शहबाज अहमद २१ बलमा ३ चौका र १ छक्कासहित ३२ रनमा अविजित रहे । छैटौं विकेटका लागि शहबाज र दीनेशले ५२ बलमा ९७ रनको अविजित साझेदारी गर्दै बलियो योगफलमा पुर्याएका हुन् ।
दोस्रो ओभरको पहिलो बलमा शार्दुल ठाकुरले ओपनर अनुज रावतलाई शून्यमा एलबीडब्लू आउट गरे ।

कप्तान फाफ डु प्लेसिस खलिल अहमदको बलमा प्वाइन्टमा अक्षर पटेलबाट ८ रनमा समातिन पुगे । विराट कोहली १२ रनमा रन आउट हुन पुगेका थिए । दीनेश कार्तिकले १८ औं ओभरमा तीव्र गतिका बलर मुश्ताफिजुर रहमानलाई ४ चौका र २ छक्कासहित कुल २८ रन जोडेका थिए । कार्तिकले सुरुवाती तीन बलमा चौका, त्यसपछिका दुई बलमा छक्का र अन्तिम बलमा चौका सहित ठूलो ओभरमा परिणत गरेका थिए ।

दिल्लीका शार्दुल ठाकुर, कुलदीप यादव, खलिल अहमद र अक्षर पटेलले १-१ विकेट लिए । दिल्लीले अव बुधबार पन्जाब किंग्ससँग खेल्नेछ । बेंगलोरले मंगलबार लखनऊ सुपर जायन्ट्सँग खेल्नेछ । आइतबार दुई खेल हुनेछन् । पहिलो खेलमा सनराइजर्स हैदराबाद र पन्जाब किंग्स तथा दोस्रो खेलमा गुजरात टइटन्स र चेन्नई सुपर किंग्ससँग खेल्नेछ ।

अंक तालिका

गुजरात ५ खेलमा ४ मा जित र १ मा हार सहित ८ अंक भएपनि नेटरनरेटको कारण शीर्षस्थानमा छ । लखनऊ ६ खेलमा ४ मा जित र २ मा हार सहित दोस्रो स्थानमा छ । बेंगलोर ६ खेलमा ४ मा जित र २ मा हार सहित तेस्रो स्थानमा छ । समान ८ अंक भएपनि शीर्ष तीन टोली नेटरनरेटको आधारमा तय भएका छन् ।

राजस्थान रोयल्स ५ खेलमा ३ मा जित र २ मा हार सहित ६ अंकका साथ चौथो स्थानमा छ । पन्जाब ५ खेलमा ३ मा जित र २ मा हार सहित पाँचौं स्थानमा छ । कोलकाता नाइट राइडर्स ६ खेलमा ३ मा जित र ३ मा हार सहित छैटौं स्थानमा पुगेको छ ।

हैदराबाद ५ खेलमा ३ मा जित र २ मा हार सहित सातौं स्थानमा छ । दिल्ली ५ खेलमा २ मा जित र ३ मा हार सहित आठौं स्थानमा छ । चेन्नई ५ खेलमा १ मा जित र ४ मा हार सहित नवौं स्थानमा छ । मुम्बई ६ खेलमा जित बिहीन हुँदै पुछारमा छ ।