एजेन्सी – मध्यक्रमका ब्याटर डेविड मिलरको सानदार ब्याटिङमा गुजरात टाइटन्सले इन्डियन प्रिमियर लिग (आइपिएल) २०२२ मा चेन्नई सुपर किंग्समाथि ३ विकेटको रोमान्चक जित हात पारेको छ । गुजरात पाँच जितमा १० अंकका साथ शीर्षस्थानमा यथावत छ ।

१ सय ७० रनको विजयी लक्ष्य गुजरातले १९.५ ओभरमा ७ विकेट गुमाउँदै पूरा गर्यो । गुजरातको जितमा डेविड मिलरले ५१ बलमा ८ चौका र ६ छक्कासहित ९४ रनको उत्कृष्ट अविजित इनिङ खेले । गुजरातलाई अन्तिम ६ बलमा १३ रन चाहिँएको थियो । मिलरले क्रिस जोर्डनलाई तेस्रो बलमा छक्का र चौथो बलमा चौका प्रहार गर्दै जित पक्का गराए । पाँचौं बलमा दुई रनका साथ खेल सकाए ।

त्यसअघि १८ बलमा ४८ रन चाहिँएको अवस्थामा क्रिस जोर्डनलाई कप्तान राशिद खानले १८ औं ओभरमा ३ छक्का र १ चौका सहित कुल २५ रन जोडेपछि जितको टनिङ प्वाइन्ट बनेको थियो । कार्यवाहक कप्तान समेत रहेका राशिद खान २१ बलमा २ चौका र ३ छक्कासहित ४० रनमा आउट भए ।

गुजरातका अन्य ब्याटर भने चल्न सकेनन् । ओपनर ऋद्धिमान शाह ११, शुभमन गिल र विजय शंकर शून्यमा आउट हुँदा १६–३ को अवस्थामा पुगेको थियो । अभिनभ मनोहर १२ रनमा आउट हुँदा ४८–४ को कमजोर अवस्थाबाट उत्कृष्ट जित हात पारेको हो । चेन्नईका ड्वेन ब्राभोले ४ ओभरमा १ मेडनसहित २३ रन खर्चेर ३ विकेट लिए । महेश थिक्सेनाले २, रविन्द्र जडेजा र मुकेश चौधरीले १–१ विकेट लिए ।

त्यसअघि महाराष्ट्र क्रिकेट एसोसियसन स्टेडियम पुणेमा टस हारेर ब्याटिङको निम्तो पाएको चेन्नईले निर्धारित २० ओभरमा ५ विकेट गुमाउँदै १ सय ६९ रन बनायो । चेन्नईका ओपनर ऋतुराज गायकवाडले ४८ बलमा ५ चौका र ५ छक्कासहित सर्वाधिक ७३ रन बनाए ।

गायकवाडले अर्धशतकका साथ लयमा फर्किएको संकेत दिएका छन् । एक समय चेन्नई विशाल योगफलको बाटोमा अघि बढेपनि अन्तिम ६ ओभरमा आक्रामक क्रिकेट खेल्न नसक्दा मध्यम योगफलमै रोकिन पुग्यो । चेन्नईले १४ ओभरमा २ विकेट गुमाउँदै १ सय २४ रन बनाएको थियो । बाँकी ३६ बलमा ३ विकेट गुमाउँदै ४५ रन मात्र बनाउन सक्यो ।

ओपनर रोबिन उथप्पा मोहम्मद शामीको बलमा ३ रनमा एलबीडब्लू आउट भए । मोईन अलीलाई अल्जारी जोशेफले १ रनमा बोल्ड गरे । तेस्रो विकेटका लागि अम्बाती रायुडू र गायकवाडले ५६ बलमा ९२ रनको साझेदारी गरेका थिए । रायुडू ३१ बलमा ४ चौका र २ छक्कासहित ४६ रनमा आउट भए ।

गुजरातका अल्जारी जोशेफले ४ ओभरमा ३४ रन खर्चेर २ विकेट लिए । मोहम्मद शामी र यश दयालले १(१ विकेट लिए । गुजरातका कप्तान हार्दिक पान्ड्या चोटका कारण उपब्ध छैनन् । त्यसैले गुजरातको कप्तानी राशिद खानले गरेका थिए ।

अंक तालिका

गुजरात ६ खेलमा ५ मा जित र १ मा हार सहित १० अंकका साथ शीर्षस्थानमा छ । लखनऊ ६ खेलमा ४ मा जित र २ मा हार सहित दोस्रो स्थानमा छ । बेंगलोर ६ खेलमा ४ मा जित र २ मा हार सहित तेस्रो स्थानमा छ । हैदराबाद ६ खेलमा ४ मा जित र २ मा हार सहित ८ अंक भएपनि नेटरनरेटको कारण चौथो स्थानमा छ ।

राजस्थान रोयल्स ५ खेलमा ३ मा जित र २ मा हार सहित ६ अंकका साथ पाँचौं स्थानमा छ । कोलकाता नाइट राइडर्स ६ खेलमा ३ मा जित र ३ मा हार सहित छैटौं स्थानमा पुगेको छ । पन्जाब ६ खेलमा ३ मा जित र ३ मा हार सहित सातौं स्थानमा छ ।

दिल्ली ५ खेलमा २ मा जित र ३ मा हार सहित आठौं स्थानमा छ । चेन्नई ६ खेलमा १ मा जित र ५ मा हार सहित नवौं स्थानमा छ । मुम्बई ६ खेलमा जित बिहीन हुँदै पुछारमा छ ।