एजेन्सी – कप्तान फाफ डु प्लेसिस शतक बनाउन चुक्दा रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२२ को ३१ औं खेलमा लखनऊ सुपर जायन्ट्सलाई १ सय ८२ रनको प्रतिस्पर्धात्मक लक्ष्य दिएको छ ।

डिवाइ पाटिल स्पोर्ट्स एकेडेमी मुम्बईमा टस हारेर ब्याटिङको निम्तो पाएको बेंगलोरले निर्धारित २० ओभरमा ६ विकेट गुमाउँदै १ सय ८१ रन बनायो । बेंगलोरका कप्तान फाफ डु प्लेसिसले ६४ बलमा ११ चौका र २ छक्कासहित ९६ रनमा आउट भए । डु प्लेसिसलाई शतक बनाउन अन्तिम ओभरमा ६ रन चाहिँएको थियो ।

डु प्लेसिसले पहिलो बलमा एक रन मात्र बटुले । पाँचौं बलमा जेसन होल्डरले मार्कस स्टोइनिसबाट क्याच हुन पुगेपछि शतक बनाउन चुके । बेंगलोरले पहिलो ओभरमै दुई विकेट गुमाएको थियो । तीव्र गतिका बलर दुश्मन्था चामिराको पहिलो ओभरको पाँचौं बलमा ओपनर अनुज रावतले लङअफमाथि सट प्रहार गर्न खोज्नेक्रममा मिडअफमा ४ रनमा लोकेश राहुलबाट क्याच आउट भए ।

लगत्तै अन्तिम बलमा विराट कोहलीले ब्याकवाड प्वाइन्टमा सट खेल्नेक्रममा दीपक हुडाबाट क्याच हुँदै गोल्डेन डक पेभेलिएन फर्के । कोहली आइपिएलमा चौथो पटक गोल्डेन डक भएका हुन् ।

पछिल्लो पटक २०१७ मा कोलकाता नाइट राइडर्सविरुद्ध गोल्डेन डक भएका थिए । स्पिनर क्रुनाल पान्ड्याको बलमा स्विचहिट सट खेल्नेधुनमा ग्लेन म्याक्सवेल २३ रनमा जेसन होल्डरबाट समातिन पुगे ।

म्याक्सवेलले ११ बलमा ३ चौका र १ छक्का प्रहार गरे । होल्डरले सुयश प्रभुदेशाईंलाई १० रनमा क्याच गराए । पाँचौं विकेटका लागि फाफ डु प्लेसिस र शहबाज अहमदले ४८ बलमा ७० रनको साझेदारी गर्दै इनिङ उकासे ।

शहबाज अहमदले २६ र दीनेश कार्तिकले १३ रन बनाए । लखनऊका दुश्मन्था चामिरा र जेसन होल्डरले २–२ विकेट लिए ।