एजेन्सी – राजस्थान रोयल्सका ओपनर जस बटलरले इन्डियन प्रिमियर लिग (आइपिएल) मा लगातार दोस्रो शतक प्रहार गरेका छन् । बटलरले शुक्रबार दिल्ली क्यापिटल्सविरुद्ध आफ्नो यस सिजनको तेस्रो र लगातार दोस्रो उत्कृष्ट शतक प्रहार गरेका हुन् ।

वानखडे स्टेडियम मुम्बईमा टस हारेर पहिला ब्याटिङ थालेको राजस्थानले १६ ओभरमा १ विकेट गुमाउँदै १ सय ५८ रन बनाएको छ । बटलर ५८ बलमा ८ चौका र ८ छक्कासहित १ सय १ रनमा अविजित छन् । बटलरले ५७ बलमा शतक पूरा गरे । बटलरले १६ औं ओभरको पाँचौं बलमा खलिल अहमदलाई मिडविकेटमा दुई रन प्रहार गर्दै शतक पूरा गरेका थिए ।

बटलर शिखर धवनपछि आइपिएलमा लगातार शतक प्रहार गर्ने दोस्रो खेलाडी हुन् । दिल्ली क्यापिटल्सबाट धवनले २०२० मा दुई लगातार शतक प्रहार गरेका थिए । बटलरले यसअघि कोलकाता नाइट राइडर्ससँग ६१ बलमा ९ चौका र ५ छक्कासहित १ सय ३ रनको इनिङ खेलेका थिए । मुम्बईसँग उनले ६८ बलमा ११ चौका र ५ छक्कासहित १ सय रनको अविजित इनिङ खेलेका थिए । बटलरको आइपिएल करिअरको भने चौथो शतक हो । बटलरले २०२१ मा सनराइजर्स हैदराबादविरुद्ध ६४ बलमा १ सय २४ रनको इनिङ खेलेका थिए ।

आइपिएलमा एकै सिजनमा सर्वाधिक शतक विराट कोहलीले प्रहार गरेका छन् । रोयल च्यालेन्जर्स बेंगलोरका विराट कोहलीले २०१६ मा एकै सिजनमा ४ शतक प्रहार गरेका थिए । २०१६ मा कोहलीले ४ शतक र ७ अर्धशतकसहित कुल ९ सय ७३ रन बनाएका थिए । बटलरले यस सिजनमा ७ खेलमानै ४ सय ७५ माथि रन बनाई सकेका छन् । कोहलीको उक्त कीर्तिमान तोड्ने संकेत देखाएका छन् ।