एजेन्सी – ओपनर जस बटलरको लगातार दोस्रो शतकमा राजस्थान रोयल्सले इन्डियन प्रिमियर लिग (आइपिएल) २०२२ मा दिल्ली क्यापिटल्सलाई २ सय २३ रनको विशाल लक्ष्य दिएको छ ।

वानखडे स्टेडियम मुम्बईमा टस हारेर ब्याटिङको निम्तो पाएको राजस्थानले निर्धारित २० ओभरमा २ विकेट गुमाउँदै २ सय २२ रन बनायो । राजस्थानका ओपनर जस बटलरले ६५ बलमा ९ चौका र ९ छक्कासहित १ सय १६ रनको उत्कृष्ट इनिङ खेले । बटलरले खलिल अहमदको १६ औं ओभरको पाँचौं बलमा मिड विकेटमा दुई रन बटुल्दै ५७ बलमा शतक पूरा गरेका थिए ।

बटलरको यो जारी आइपिएलमा लगातार दोस्रो र यस सिजनको तेस्रो शतक हो । बटलरको आइपिएल करिअरको भने चौथो शतक हो । बटलरले २०२१ मा सनराइजर्स हैदराबादविरुद्ध ६४ बलमा १ सय २४ रनको इनिङ खेलेका थिए । उच्च लयमा रहेका बटलरले यस सिजनमा सुरुवाती ७ खेलमै तीन शतक प्रहार गरेका हुन् । बटलर शिखर धवनपछि आइपिएलमा लगातार दोस्रो शतक प्रहार गर्ने दोस्रो खेलाडी हुन् । दिल्ली क्यापिटल्सबाट धवनले २०२० मा लगातार दुई शतक प्रहार गरेका थिए ।

बटलर विराट कोहलीपछि एकै सिजनमा तीन शतक प्रहार गर्ने दोस्रो खेलाडी हुन् । रोयल च्यालेन्जर्स बेंगलोरबाट कोहलीले २०१६ मा ४ शतक प्रहार गरेका थिए । यस सिजनमा बटलरले कोलकाता नाइट राइडर्ससँग १ सय ३ रन र मुम्बईसँग १ सय रनको शतकीय इनिङ खेलेका थिए । पछिल्लो खेलमा कोलकातासँग सानदार शतक प्रहार गरेका बटलरले आफ्नो उच्च लयलाई निरन्तरता दिएका हुन् ।

पहिलो विकेटका लागि जस बटलर र देवदत्त पाडिक्कलले १५.१ ओभरमा १ सय ५५ रनको शतकीय साझेदारी गर्दै उत्कृष्ट सुरुवात दिलाए ।
खलिल अहमदको बलमा एलबीडब्लू आउट हुनुअघि पाडिक्कलले ३५ बलमा ७ चौका र २ छक्कासहित ५४ रन बनाए ।

कप्तान सञ्जु स्यामसन १९ बलमा ५ चौका र ३ छक्कासहित ४६ रनमा अविजित रहे । बटलर मुश्ताफिजुर रहमानको १९ औं ओभरको अन्तिम बलमा लङअनमा डेविड वार्नरबाट क्याच आउट भएका । दिल्लीका खलिल अहमद र मुश्ताफिजुर रहमानले १–१ विकेट लिए ।