एजेन्सी – इन्डियन प्रिमियर लिग (आइपिएल) २०२२ को ३४ औं खेलमा शुक्रबार राती दिल्ली क्यापिटल्स राजस्थान रोयल्ससँग १५ रनले पराजित हुन पुग्यो । जितका लागि २ सय २३ रनको विजयी पछ्याएको दिल्लीले निर्धारित २० ओभरमा ८ विकेट गुमाउँदै २ सय ७ रन बनायो ।

दिल्लीलाई जितको लागि अन्तिम ६ बलमा ३६ रन चाहिँएको थियो । दिल्लीका रोभम्यान पावेलले तीव्र गतिका बलर ओबेद म्याककोयलाई सुरुवाती तीन बलमा लगातार सानदार छक्का प्रहार गरे । पावेलले पहिलो बल लङअफ र दोस्रो बल कभरमा छक्का प्रहार गर्दै पावेलले वातावरण फेरे । वेस्टइन्डिजका यी दुई खेलाडीबीचको प्रदर्शन रोचक भयो । तेस्रो फुलटस बलमा उनले मिडविकेटमा छक्का प्रहार गरेपछि दिल्लीको आशा जगाए ।

पावेलले ६ छक्काको झल्को दिए । तर खेलले त्यसपछि नयाँ मोड लियो । हाइटको नो बलको ईशारा डग आउटमा बसेका दिल्लीका कप्तान ऋषभ पन्त, ब्याटिङ प्रशिक्षक प्रविन अमरे, साहयक प्रशिक्षक शेन वाटसन र ओपनर डेविड वार्नरले गरेका थिए । पन्तसहित दिल्लीको डग आउटबाट नो बल भएको हुँदा थर्ड अम्पारलाई रिभ्यु लिदै दिन आग्रह थरेका थिए । तर अम्पायर नितिन मेननले मानेनन् ।

दिल्लीको बेन्च साइट लङअनमा रहेका रिजर्भ अम्पायर सदाशिव ऐरसँग शार्दुल ठाकुर र खलिल अहमदले छलफल गरे । पावेल र कुलदीप यादवले पनि असन्तुष्ट अम्पायर नितिनसँग छलफल गरे । मैदान बाहिर भने आएनन् । मैदानमा युजभेन्द्र चाहलले कुलदीप यादवलाई सुरुमै सम्झाए । पन्त बेन्चबाट उठेर रिभ्यु लिनु पर्ने बताएका थिए ।

अम्पायरले नदिएपछि खेलाडीलाई खेल नै छाडेर दुबै ब्याटरलाई मैदान बाहिर आउन निरन्तर आग्रह गरेका थिए । पन्तको अनुहारमा आक्रोश र निराशा दुबै झल्किन्थ्यो । पन्तले ब्याटिङ प्रशिक्षक आमरेलाई मैदानमा गएर अम्पायरसँग कुरा गर्न पठाए । अमरे पनि नितिनसँग छलफल गरे । तर थर्ड अम्यायर सम्म भने पुगेन ।

दिल्लीका सहायक प्रशिक्षक शेन वाटसनले पन्तलाई सम्झाउँदै खेललाई निरन्तरता गर्न भने । राजस्थान रोयल्सका ओपनर जस बटलरले पनि पन्तलाई नजिक पुगेर सम्झाए । तर लगातार तीन छक्काको वातावरण रोकिएको थियो । म्याककोयले चौथो बलमा स्वलोवर फ्याँल्दै बल डट गराए । पाँचौं बलमा दुई रन खर्चिदा अन्तिम बलमा पावेल सन्जु स्यामसनबाट क्याच भए । राजस्थानका स्पिनर रविचन्द्रन आश्विनले मोमेन्ट रोकिँदा आफूहरुलाई फाइदा भएको खेलपछि बताए।

‘मैले सोचे कि नो बल हाम्रो लागि बहुमूल्य हुनसक्छ । तर त्यो मेरो नियन्त्रणमा भने छैन । अम्पायरको निर्णयमा निराश छु । तर यस बारे धेरै गर्न सकिदैन । मैदानमा सबैले देखेका थिए । मलाई लाग्छ थर्ड अम्पायरले हस्तक्षेप गर्दै नो बल दिनुपर्दथ्यो’, पन्तले खेलपछि भने ।

‘पक्कैपनि आमरेलाई मैदान पठाउने निर्णय सहि थिएन । जे पनि भयो त्यो ठिक होईन । त्यो क्षण निकै आक्रोशमय थियो । दुबै पक्षबाट गल्ती भएको हो । यो निराशजनक छ । प्रतियोगितामा हामीले केहि राम्रो अम्पायरिङ पनि देखेका छौं’, पन्तले भने ।

रोयल च्यालेन्जर्स बेंगलोरका आक्रामक ब्याटर ग्लेन म्याक्सवेलले भने अम्पायरलाई ब्यङ्ग्य शैलीमा आलोचना गरेका छन् । ‘अम्पायरले खुट्टाको प्रत्येक बल नो बल जाँच गर्दछन् । तर हाइ फुलटस बल किन जाँच गर्दैनन्, अर्थ लाग्छ, म्याक्सवेलले ट्वीट गरेका छन् ।’

भिडियो फुटेज हेर्दा भने नो बल देखिन्छ । तर पन्तको मैदानमा जुन शैली देखाए त्यो भने खेल भावना विपरित छ । सन् २०१९ मा चेन्नई सुपर किंग्सका कप्तान महेन्द्रसिंह धोनीले राजस्थानविरुद्ध हाइ फुलटस बलमा अम्पायरले नो बल नदिएपछि मैदानमै छिरेर आक्रोश ब्यक्त गरेका थिए । त्यस समय धोनीलाई म्याच फि को ५० प्रतिशत जरिवना लागेको थियो ।

त्यसअघि वानखडे स्टेडियम मुम्बईमा टस हारेर ब्याटिङको निम्तो पाएको राजस्थानले निर्धारित २० ओभरमा २ विकेट गुमाउँदै २ सय २२ रन बनाएको थियो । राजस्थानका ओपनर जस बटलरले ६५ बलमा ९ चौका र ९ छक्कासहित १ सय १६ रनको उत्कृष्ट इनिङ खेले ।

बटलरको यो जारी आइपिएलमा लगातार दोस्रो, यस सिजनको तेस्रो र आइपिएल करिअरको चौथो शतक हो । कप्तान सञ्जु स्यामसन १९ बलमा ५ चौका र ३ छक्कासहित ४६ रनमा अविजित रहे । दिल्लीले अव बिहीबार कोलकाता नाइट राइडर्ससँग खेल्नेछ । राजस्थानले मंगलबार रोयल च्यालेन्जर्स बेंगलोरसँग खेल्नेछ ।

राजस्थान रोयल्स ७ खेलमा ५ मा जित र २ मा हार सहित १० अंकका साथ शीर्षस्थानमा छ । दिल्ली ७ खेलमा ३ मा जित र ४ मा हार सहित छैटौं स्थानमा छ ।