एजेन्सी – कप्तान हार्दिक पान्ड्याको लगातार तेस्रो अर्धशतकमा गुजरात टाइटन्सले इन्डियन प्रिमियर लिग (आइपिएल) २०२२ को ३५ औं खेलमा कोलकाता नाइट राइडर्सलाई १ सय ५७ रनको मध्यम लक्ष्य दिएको छ ।

डिवाई पाटिल स्पोर्ट्स एकेडेमी मुम्बईमा टस जितेर ब्याटिङ थालेको गुजरातले निर्धारित २० ओभरमा ९ विकेट गुमाउँदै १ सय ५६ रन बनायो । गुजरातका हार्दिक पान्ड्याले ४९ बलमा ४ चौका र २ छक्कासहित सर्वाधिक ६७ रन बनाए । हार्दिकले चोटका कारण पछिल्लो चेन्नई सुपर किंग्ससँगको खेल गुमाएका थिए ।

आइपिएलमा हार्दिकको यो लगातार तेस्रो अर्धशतक हो । हार्दिकले राजस्थान रोयल्ससँग ५२ बलमा ८ चौका र ४ छक्कासहित ८७ रन र हैदराबादविरुद्ध ५० रनमा अविजित थिए ।

ओपनर सुभमन गिल दोस्रो ओभरको पहिलो बलमै १ रनमा आउट भएका थिए । अर्का ओपनर ऋद्धिमान शाह २५ बलमा २ चौका र १ छक्कासहित २५ रनमा आउट भए । डेविड मिलर २० बलमा १ चौका र २ छक्का प्रहार गर्दै २७ रनमा क्याच आउट भए । राहुल टेवाटिया १७ रनमा आउट भए ।

कोलकाताका टिम साउथीले ४ ओभरमा २४ रन खर्चेर ३ विकेट लिए । साउथीलाई प्याट कमिन्सलाई बेन्चमा राखेर खेलाएको थियो । आन्द्रे रसेलले १ ओभरमा ५ रन खर्चेर ४ विकेट लिए । उमेश यादव र शिवम माभीको नाममा १–१ विकेट रह्यो ।