एजेन्सी – रोयल च्यालेन्जर्स बेंगलोरका शीर्ष ब्याटर विराट कोहली इन्डियन प्रिमियर लिग (आइपिएल) २०२२ मा लगातार दोस्रो खेलमा गोल्डेन डक आउट भएका छन् ।

कोहली शनिबार सनराइजर्स हैदराबादसँग दोस्रो ओभरमा गोल्डेन डक आउट भएका हुन् । कोहली तीव्र गतिका बलर मार्को ज्यानसनको दोस्रो ओभरमा तेस्रो बलमा एडेन माक्ररमबाट क्याच हुँदै गोल्डेन डक पेभेलिएन फर्के । कोहली सेकेन्ड स्लिपमा क्याच हुन पुगेका थिए ।

कोहली मंगलबार लखनऊ सुपर जायन्ट्सविरुद्ध पनि गोल्डेन डक भएका थिए । उक्त खेलमा कोहली तीव्र गतिका बलर दुश्मन्था चामिराको पहिलो ओभरको अन्तिम बलमा प्वाइन्टमा गोल्डेन डक भए । कोहलीले यस सिजन मा खराब प्रदर्शन गरेका छन् ।

कोहली पन्जाबसँग ४१ रनमा अविजित रहँदा, कोलकाता नाइट राइडर्ससँग १२ रन,राजस्थान रोयल्ससँग ५ रन, मुम्बई इन्डियन्ससँग ४८ रन, चेन्नई सुपर किंग्ससँग १ रन र दिल्लीसँग १२ रनमा आउट भएका थिए । कोहलीले यसै सिजनमार्फत बेंगलोरको कप्तानी छाडेका हुन् ।

घोषणा गतवर्ष गरेपनि यो वर्षदेखि कप्तानी गरेका छैनन् । कोहली तीन वर्षदेखि शतक विहीन बनेका छन् । मार्को ज्यासनले एकै ओभरमा तीन विकेट लिएपछि ब्रेबोन स्टेडिय मुम्बईमा टस हारेर पहिला ब्याटिङ थालेको बेंगलोर सुरुवाती २ ओभरमा ९–३ को कमजोर अवस्थामा पुगेको छ । ज्यानसनले फाफ डु प्लेससलाई ५ रनमा बोल्ड गर्दा अनुज राउटलाई डक आउट पेभेलिएन फर्काए ।