एजेन्सी – सनराइजर्स हैदराबादले इन्डियन प्रिमियर लिग (आइपिएल) २०२२ मा रोयल च्यालेन्जर्स बेंगलोरलाई ७२ बल अगाडिनै ९ विकेटले पराजित गर्दै अंक तालिकामा दोस्रो स्थानमा उक्लिएको छ । लगातार पाँच जितका साथ हैदराबादले १० अंक बटुलेको छ ।

जितका लागि ६९ रनको विजयी लक्ष्य हैदराबादले ८ ओभरमा १ विकेट गुमाउँदै पूरा गर्यो । हैदराबादको जितमा अभिषेक शर्माले २८ बलमा ८ चौका र १ छक्कासहित सर्वाधिक ४७ रन बनाए । केन विलियम्सन १६ र राहुल त्रिपाठी ७ रनमा अविजित रहे ।

त्यसअघि ब्रेबोन स्टेडियम मुम्बईमा टस हारेर ब्याटिङको निम्तो पाएको बेंगलोर १६.१ ओभरमा ६८ रनमा अल आउट भएको थियो । बेंगलोरका सर्वाधिक सुयश प्रभुदेशाईंले सर्वाधिक १५ रन बनाए । हैदराबाद सामु निरिह बन्दै लज्जास्पद ब्याटिङ गर्नेक्रममा बेंगलोरका ९ खेलाडीले दोहोरो अंकमा रन बनाउन सकेनन् ।

बेंगलोरले दोस्रो ओभरमै शीर्ष तीन ब्याटर गुमाएको थियो । तीव्र गतिका बलर मार्को ज्यानसनले दोस्रो ओभरको दोस्रो बलमा फाफ डु प्लेसिसलाई ५ रनमा बोल्ड आउट गरे । स्विङ बलमा फाफ डु प्लेसिस बोल्ड भएका थिए । लगत्तै अर्को बलमा विराट कोहली सेकेन्ड स्लिपमा एडेन माक्ररमबाट गोल्डेन डक भए । कोहली लगातार दोस्रो खेलमा गोल्डेन डक भएका हुन् ।

अन्तिम बलमा अनुज रावत माक्ररमबाट डक आउट हुँदा २ ओभरमा ८–३ को कमजोर अवस्थामा पुगेको थियो । ग्लेन म्याक्सवेललाई टि नटराजनले १२ रनमा मिडअफमा केन विलियम्सनबाट क्याच गराउँदा ४.२ ओभरमा २०–४ को अवस्थामा पुगेको थियो ।

पाँचौं विकेटका लागि सुयश प्रभुदेशाईं र शहबाज अहमदले २५ बलमा २७ रनको साझेदारी गरेका थिए । स्पिनर जगदीश सुचिथले प्रभुदेशाईंलाई १५ रनमा विकेटकिपर निकोलस पुरनबाट स्टम्पिङ आउट भए ।

उनले २० बलमा १ चौका प्रहार गरे । जुन समय बेंगलोर ८.२ ओभरमा ४७–५ को अवस्थामा पुगेको थियो । दुई बलपछि दीनेश कार्तिक डक आउट भए । अम्पायरले वाइड दिएपनि विकेटकिपर निकोलस पुरनको सेलेब्रेसनमा कप्तान केन विलियम्सनले रिभ्यु लिँदै पेभेलिएन फर्काए । उमरन मलिकले अहमदलाई ७ रनमा क्याच गराउँदा बेंगलोर ४९–७ को दयनीय अवस्थामा पुगेको थियो ।

टि नटराजनले हर्षल पटेललाई ४ रनमा बोल्ड गर्दा ५५–८ को अवस्थामा पुगेको थियो । हैदराबादका मार्को ज्यानसनले ४ ओभरमा २५ रन खर्चेर ३ विकेट लिए । टि नटराजनले ३ ओभरमा १० रन खर्चेर ३ विकेट लिए । जगदीश सुचिथले ३ ओभरमा १२ रन खर्चेर २ विकेट लिए । भुवनेश्वर कुमार र उमरन मलिकले १–१ विकेट लिए ।

अंक तालिका

गुजरात ७ खेलमा ६ मा जित र १ मा हारका १२ अंक जोड्दै शीर्षस्थानमा छ । हैदराबाद ७ खेलमा ५ मा जित र २ मा हार सहित १० अंकका साथ नेटरनरेटमा माथि रहँदै दोस्रो स्थानमा उक्लियो । राजस्थान रोयल्स ७ खेलमा ५ मा जित र २ मा हार सहित १० अंकका साथ तेस्रो स्थानमा छ । बेंगलोर ८ खेलमा ५ मा जित र ३ मा हार सहित १० अंकका साथ चौथो स्थानमा छ ।

लखनऊ ७ खेलमा ४ मा जित र ३ मा हार सहित पाँचौं स्थानमा छ । दिल्ली ७ खेलमा ३ मा जित र ४ मा हार सहित छैटौं स्थानमा छ । कोलकाता नाइट राइडर्स ८ खेलमा ३ मा जित र ५ मा हार सहित सातौं स्थानमा छ । पन्जाब ७ खेलमा ३ मा जित र ४ मा हार सहित आठौं स्थानमा छ । चेन्नई ७ खेलमा २ मा जित र ५ मा हार सहित नवौं स्थानमा छ । मुम्बई ७ खेलमा जित बिहीन हुँदै पुछारमा छ