एजेन्सी – भारतीय क्रिकेट टोलीका ओपनर लोकेश राहुल टि२० क्रिकेटमा एकै टोलीविरुद्ध तीन शतक प्रहार गर्ने पहिलो खेलाडी बनेका छन् । लखनऊ सुपर जायन्ट्सका कप्तान राहुलले आइतबार राती इन्डियन प्रिमियर लिग (आइपिएल) मा मुम्बई इन्डियन्सविरुद्ध शतक प्रहार गर्दै उक्त कीर्तिमानी बनाएका हुन् ।

राहुलले यस सिजनको आइपिएलमा सर्वाधिक कमजोर मुम्बईविरुद्ध लगातार दुई शतक प्रहार गर्दै उक्त कीर्तिमान बनाएका हुन् । वानखडे स्टेडियम मुम्बईमा टस हारेर पहिला ब्याटिङ गर्नेक्रममा राहुलले ६२ बलमा १२ चौका र ४ छक्काका साथ १ सय ३ रनको अविजित कप्तानी इनिङ खेलेका थिए । अप्रिल १६ मा राहुलले मुम्बईविरुद्ध ६० बलमा ९ चौका र ५ छक्कासहित १ सय ३ रनमा अविजित थिए ।

राहुलले सन् २०१९ मा वानखडेमै पन्जाब किंग्सबाट ६४ बलमा ६ चौका र ६ छक्कासहित १ सय रनमा अविजित शतकीय इनिङ खेलेका थिए । तर काइरन पोलार्डले ३१ बलमा ३ चौका र १० छक्कासहित ८३ रनको विष्फोटक इनिङ खेलेपछि मुम्बईले १ सय ९८ रनको लक्ष्य अन्तिम बलमा पूरा गरेको थियो ।

राहुल मुम्बईलाई भारी पर्दै आएका छन् । राहुलले मुम्बईविरुद्ध १६ इनिङमा ३ शतक र ५ अर्धशतकसहित ८ सय ६७ रन बनाएका छन् । एकै टोलीविरुद्ध एकै सिजनमा दुई शतक प्रहार गर्ने राहुल विराट कोहलीपछि दोस्रो खेलाडी हुन् । कोहलीले २०१६ मा गुजरात लायन्सविरुद्ध १ सय ९ र १ सय रनको शतकीय इनिङ खेलेका थिए ।

यस सिजनमा बनेका पाँच मध्य तीन शतक मुम्बईविरुद्ध छन् । राजस्थान रोयल्सका जस बटलरले मुम्बईविरुद्ध शतक प्रहार गरेका थिए । यस आइपिएलमा बटलरले ३ र राहुलले २ शतक प्रहार गरेका छन् । राहुलको टि२० क्रिकेटको छैटौं शतक हो । उनले दुई शतक भने भारतीय क्रिकेट टोलीबाट प्रहार गरेका छन् ।

राहुल र रोहित शर्मा भारतबाट टि२० मा ६–६ शतक प्रहार गर्ने खेलाडी हुन् । रोहित टि२० आईमा ४ शतक प्रहार गर्ने एक्लो खेलाडी हुन् । टि२० क्रिकेटमा भने वेस्टइन्डिजका क्रिस गेलको नाममा छ । गेलले टि२० क्रिकेटमा २२ शतक प्रहार गरेका छन् । उनीपछि डेविड वार्नर, आरोन फिन्च र माइकल क्लिन्जरले ८–८ शतक प्रहार गरेका छन् ।