एजेन्सी – ओपनर शिखर धवन र तीव्र गतिका बलर ऋषि धवन चल्दा इन्डियन प्रिमियर लिग (आइपिएल) २०२२ को ३८ औं खेलमा चेन्नई सुपर किंग्स पन्जाब किंग्ससँग ११ रनले पराजित भएको छ । जारी आइपिएलमा यो चेन्नईको छैटौं हार हो । पन्जाब चौथो जितका साथ छैटौं स्थानमा उक्लिएको छ ।

जितको लागि १ सय ८८ रनको विजयी लक्ष्य पछ्याएकोा चेन्नईले निर्धारित २० ओभरमा ६ विकेट गुमाउँदै १ सय ७६ रन बनायो । चेन्नईका अम्बाती रायुडूले ३९ बलमा ७ चौका र ६ छक्कासहित सर्वाधिक ७८ रन बनाए ।

चेन्नईलाई अन्तिम ६ बलमा २७ रन चाहिँएको थियो । धोनीले पहिलो बलमा ऋषि धवनलाई छक्का प्रहार गरे । लगत्तै वाइड फ्याँदा अर्को बल डट राखे । तेस्रो बलमा धोनी जोनी बेयरस्टोबाट १२ रनमा क्याच भएपछि चेन्नईको जितको सम्भावना सकिएको थियो । चौथो बलमा ड्वेन प्रिटोरियसले एक र पाँचौं बलमा जडेजाले छक्का प्रहार गरे । अन्तिम बलमा एक रन बटुले ।

ओपनर ऋतुराज गायवाड ३०, रोविन उथप्पा १, मिचेल सान्टनार ९ र शिवम दुबे ८ रनमा आउट भए । दुबे ऋषि धवनको बलमा बोल्ड भएका थिए । २०१६ पछि आइपिएल खेलेका उनले दुई महत्वपूर्ण विकेट लिए । रविन्द्र जडेजा १६ बलमा १ चौका र १ छक्कासहित २१ रनमा अविजित रहे ।

पन्जाबका कागिसो रबाडाले ४ ओभरमा २३ रन खर्चेर २ विकेट लिए । ऋषि धवनले ४ ओभरमा ३९ रन खर्चेर २ विकेट लिए । सन्दीप शर्मा र अर्शदीप सिंहको नाममा १–१ विकेट रह्यो ।

त्यसअघि वानखडे स्टेडियम मुम्बईमा टस हारेर ब्याटिङ थालेको पन्जाबले निर्धारित २० ओभरमा ४ विकेट गुमाउँदै १ सय ८७ रन बनाएको थियो । शिखर धवन ५९ बलमा ९ चौका र २ छक्कासहित ८८ रनमा अविजित रहे । भानुका राजपक्ष ३२ बलमा २ चौका र २ छक्कासहित ४२ रनमा आउट भए ।

ओपनर मयंक अग्रवाल १८, लियाम लिभिङस्टोन १९ र जोनी बेयरस्टोले ६ रन बनाए । चेन्नईका ड्वेन ब्राभोले ४ ओभरमा ४२ रन खर्चेर २ विकेट लिए । चेन्नईले अव आइतबार हैदराबादसँग खेल्नेछ । पन्जाबले आगमी शुक्रबार लखनऊ सुपर जायन्ट्ससँग खेल्नेछ ।

अंक तालिका

गुजरात ७ खेलमा ६ मा जित र १ मा हारका १२ अंक जोड्दै शीर्षस्थानमा छ । हैदराबाद ७ खेलमा ५ मा जित र २ मा हार सहित १० अंकका साथ नेटरनरेटमा माथि रहँदै दोस्रो स्थानमा छ । राजस्थान रोयल्स ७ खेलमा ५ मा जित र २ मा हार सहित १० अंकका साथ तेस्रो स्थानमा छ । लखनऊ ८ खेलमा ५ मा जित र ३ मा हार सहित चौथो स्थानमा छ ।

बेंगलोर ८ खेलमा ५ मा जित र ३ मा हार सहित १० अंकका साथ पाँचौं स्थानमा छ । पन्जाब ८ खेलमा ४ मा जित र ४ मा हार सहित छैटौं स्थानमा छ । दिल्ली ७ खेलमा ३ मा जित र ४ मा हार सहित सातौं स्थानमा छ । कोलकाता नाइट राइडर्स ८ खेलमा ३ मा जित र ५ मा हार सहित आठौं स्थानमा छ । चेन्नई ८ खेलमा २ मा जित र ६ मा हार सहित नवौं स्थानमा छ । मुम्बई ८ खेलमा जित बिहीन हुँदै पुछारमा छ ।