एजेन्सी – इन्डियन प्रिमियर लिग (आइपिएल) २०२२ को ३९ औं खेलमा आज राजस्थान रोयल्स र रोयल च्यालेन्जर्स बेंगलोरबीच प्रतिस्पर्धा हुँदैछ । खेल नेपाली समय अनुसार साँझ ७ : ४५ मा महाराष्ट्र क्रिकेट एसोसियसन पुणेमा सुरुहुनेछ ।

राजस्थान ७ खेलमा ५ मा जित र २ मा हार सहित १० अंकका साथ तेस्रो स्थानमा छ । बेंगलोर ८ खेलमा ५ मा जित र ३ मा हार सहित पाँचौं स्थानमा छ । दुबै टोली छैटौं जितका साथ शीर्षस्थानमा उक्लिने सोचमा छन् ।

तर राजस्थान रोयल्सका जस बटलर उच्च लयमा छन् । जारी सिजनमा बटलरले ७ खेलमा ३ मा जित र २ मा हार सहित ४ सय ९१ रन बनाएका छन् । बटलरले मुम्बई, कोलकाता र दिल्लीसँग क्रमश : १००, १०३ र ११६ रनको इनिङ खेलेका थिए । बटलरले पछिल्ला दुबै खेलमा कोलकाता र दिल्लीसँग शतक प्रहार गरेका थिए ।

सुरुवाती केहि समय लिएपछि आक्रामक ब्याटिङ गर्ने बटलर बेंगलोरलाई पनि घातक बन्न सक्छन् । बटलर लगातार तेस्रो शतकका साथ विराट कोहलीको कीर्तिमान बराबर गर्ने सोचमा हुनेछन् । बटलरको लय रोक्न बेंगलोरलाई चुनौती हुनेछ । विराट एकै सिजनमा ४ शतक प्रहार गर्ने खेलाडी हुन् । तर जारी सिजनमा खराब प्रदर्शन गरेका छन् ।

पछिल्ला दुई खेलमा लखनऊ र हैदराबादविरुद्ध गोल्डेन डक आउट भएका छन् । बेंगलोरका प्रमुख खेलाडी खराब लयमा हुँदा चिन्तामा छ । उनको विकल्पमा त्यो स्तरको अन्य खेलाडी छैनन् । त्यसैले कोहलीको खराब लय बेंगलोरलाई ठूलो चिन्ताको विषय बनेको छ । बटलरलाई छाड्दा राजस्थानमा शिम्रन हेटमायर र सन्जु स्यासमसन पनि राम्रो लयमा छन् ।

स्पिनर युजभेन्द्र चहल जारी आइपिएलमा सर्वाधिक १७ विकेट लिने बलर हुन् । लगातार विकेट लिँदै आएका चहल पुन घातक बन्न सक्छन् । चहललाई रविचन्द्रन आश्विनले साथ दिनेछन् । तीव्र गतिका बलरमा ट्रेन्ट बोल्ट र प्रसिद्ध कृष्णा छन् । ओबेद म्याककोयको स्थानमा नाथन कुल्टर नाइटललाई मौका दिनसक्छ ।

यता बेंगलोर पछिल्लो खेलमा हैदराबादसँग ६८ रनमा अल आउट भएको थियो । ओपनर अनुज रावतको स्थानमा राजत पाटिदरलाई मौका दिने सम्भावना छ । विराट कोहली, फाफ डु प्लेसिस र ग्लेन म्याक्सवेलको प्रदर्शन महत्वपूर्ण हुनेछ । दीनेश कातिक र शहबाज अहमदले राम्रो प्रदर्शन गर्दै आएका छन् । स्पिनर वानिन्दु हसरंगा र तीव्र गतिका बलर जोश हेजलवुड घातक बन्नसक्छन् ।

हर्षल पटेलले पनि डेथ ओभरमा लगातार राम्रो प्रदर्शन गर्दै आएका छन् । त्यस्तै मोहम्मद शिराजको स्थानमा बायाँ हाते बलर चमा मिलिन्दलाई मौका दिनसक्ने सम्भावना छ । उनले भारतीय घरेलु क्रिकेटमा राम्रो प्रदर्शन गर्दै आएका छन् । अनुज रावत र शिराज आजको खेलमा बेन्चमा बस्ने सम्भावना छ ।

हेड टु हेड :

आइपिएलमा बेंगलोर र राजस्थानबीच २६ खेल भएको छ । राजस्थान १० र बेंगलोर १३ खेलमा विजयी भएको छ । पछिल्ला पाँच खेलमा बेंगलोर राजस्थानसँग पराजित भएको छैन । जारी सिजनमा बेंगलोरले राजस्थानलाई ४ विकेटले हराएको थियो ।

अंक तालिका

गुजरात ७ खेलमा ६ मा जित र १ मा हारका १२ अंक जोड्दै शीर्षस्थानमा छ । हैदराबाद ७ खेलमा ५ मा जित र २ मा हार सहित १० अंकका साथ नेटरनरेटमा माथि रहँदै दोस्रो स्थानमा छ । राजस्थान रोयल्स ७ खेलमा ५ मा जित र २ मा हार सहित १० अंकका साथ तेस्रो स्थानमा छ । लखनऊ ८ खेलमा ५ मा जित र ३ मा हार सहित चौथो स्थानमा छ ।

बेंगलोर ८ खेलमा ५ मा जित र ३ मा हार सहित १० अंकका साथ पाँचौं स्थानमा छ । पन्जाब ८ खेलमा ४ मा जित र ४ मा हार सहित छैटौं स्थानमा छ । दिल्ली ७ खेलमा ३ मा जित र ४ मा हार सहित सातौं स्थानमा छ । कोलकाता नाइट राइडर्स ८ खेलमा ३ मा जित र ५ मा हार सहित आठौं स्थानमा छ । चेन्नई ८ खेलमा २ मा जित र ६ मा हार सहित नवौं स्थानमा छ । मुम्बई ८ खेलमा जित बिहीन हुँदै पुछारमा छ ।