एजेन्सी – तीव्र गतिका बलर कुलदीप सेन र स्पिनर रविचन्द्रन आश्विनको उत्कृष्ट बलिङमा राजस्थान रोयल्सले इन्डियन प्रिमियर लिग (आइपिएल) मा रोयल च्यालेन्जर्स बेंगलोरलाई २९ रनले हराउँदै शीर्ष स्थानमा उक्लिएको छ । राजस्थान छैटौं जितका साथ गुजरात टाइटन्सलाई नेटरनरेटमा पछि पार्दै अंक तालिकामा शीर्ष स्थानमा उक्लिएको हो ।

जितको लागि १ सय ४५ रनको मध्यम विजयी लक्ष्य पछ्याएको बेंगलोर १९.३ ओभरमा १ सय १५ रनमा अल आउट भयो । बेंगलोरका कप्तान फाफ डु प्लेसिसले सर्वाधिक २३ रन बनाए । अन्य कुनैपनि ब्याटरले राम्रो प्रदर्शन गर्न सकेनन् ।

यसअघि दुई खेलमा लगातार गोल्डेन डक आउट भएका विराट कोहलीलाई बेंगलोरले ओपनिङ गराएको थियो । अनुज रावतलाई बेन्चमा राखेपछि कोहलीले ओपनिङ गर्नु परेको थियो । कोहली तीव्र गतिका प्रसिद्ध कृष्णाको दोस्रो ओभरको चौथो बलमा बाउन्सरमा व्याकवार्ड प्वाइन्टमा रियान परागबाट ९ रनमा क्याच हुन पुगे ।

सातौं ओभरमा बेंगलोरले लगातार दुई विकेट गुमाएपछि मध्यम लक्ष्यमै समस्यामा परेको थियो । तीव्र गतिका बलर कुलदीप सेनले तेस्रो बलमा फाफ डु प्लेसिसलाई २३ रनमा जस बटलरबाट क्याच गराए । डु प्लेसिसले २१ बलमा ३ चौका र १ छक्का प्रहार गरे । लगत्तै अर्को बलमा ग्लेन म्याक्सवेल गोल्डेन डक भएपछि ३७–३ को अवस्थामा पुगेको थियो ।

जारी सिजनको पहिलो खेल खेलेका राजत पाटिदरलाई रविचन्द्रन आश्विनले १६ रनमा बोल्ड गरे । आश्विनले नै १२ औं ओभरको चौथो बलमा सुयश प्रभु देशाईंलाई २ रनमा परागबाट क्याच गराए । लगत्तै अर्को ओभरमा फिनिसर दीनेश कार्तिक ६ रनमा रन आउट भएपछि बेंगलोरको जित कठिन बनेको थियो । शहबाज अहमद २७ बलमा १७ र वानिन्दु हसरंगाले १३ बलमा १८ रन बनाए ।

स्पिनर रविचन्द्रन आश्विनले ४ ओभरमा १७ रन खर्चेर ३ विकेट लिए । कुलदीप सेनले ३.३ ओभरमा २० रन खर्चेर ४ विकेट लिए । प्रसिद्ध कृष्णले ४ ओभरमा २३ रन खर्चेर २ विकेट लिए ।

त्यसअघि महाराष्ट क्रिकेट एसोसियसन स्टेडियम पुणेमा टस हारेर ब्याटिङ थालेको राजस्थानले निर्धारित २० ओभरमा ८ विकेट गुमाउँदै १ सय ४४ रन बनाको थियो । राजस्थानका रियान परागले ३१ बलमा ३ चौका र ४ छक्कासहित सर्वाधिक ५६ रनमा अविजित इनिङ खेल्दै प्रतिस्पर्धात्मक योगफलको आधार तय गरेका थिए । राजस्थानका अन्य ब्याटर भने चल्न सकेका थिएनन् ।

बेंगलोरका तीव्र गतिका बलर मोहम्मद शिराजको दोस्रो ओभरको चौथो बलमा देवदत्त पाडिक्कललाई ७ रनमा एलबीडब्लू आउट गरे । शिराजको चौथो ओभरको अन्तिम बलमा टप एज लागेर रविचन्द्रन आश्विन १७ रनमा कट एण्ड बोल्ड हुन पुगे । उनले ९ बलमा ४ चौका प्रहार गरे ।

लगत्तै तीव्र गतिका बलर जोश हेजलवुडको पाँचौं ओभरको पहिलो बलमा जस बटलर मिडअनमा ८ रनमा क्याच भए । यसअघि लगातार दुई शतक प्रहार बटलर आउट भएपछि राजस्थान समस्यामा परेको थियो ।

दशौं ओभरको चौथो बलमा कप्तान सन्जु स्यामसनलाई २७ रनमा स्पिनर वानिन्दु हसरंगाले बोल्ड गरेपछि समस्यामा परेको थियो । स्यामसनले २१ बलमा १ चौका र ३ छक्का प्रहार गरे । २४ बल खेलेका डर्याल मिचेलले १६ रन बनाए । बेंगलोरका जोश हेजलवुडले ४ ओभरमा १ मेडनसहित १९ रन खर्चेर २ विकेट लिए ।

स्पिनर वानिन्दु हसरंगाले ४ ओभरमा २३ रन खर्चेर २ विकेट लिए । मोहम्मद शिराजले ४ ओभरमा ३० रन खर्चेर २ विकेट लिए । हर्षल पटेलले १ विकेट लिए । राजस्थानले शनिबार मुम्बई इन्डियन्सविरुद्ध डिवाई पाटिल स्पोर्ट्समा खेल्नेछ । बेंगलोरले शनिबार नै गुजरात ताइटन्ससँग ब्रेबोन स्टेडियम मुम्बईमा खेल्नेछ । आइपिएलमा बुधबार गुजरात र हैदराबादबीच प्रतिस्पर्धा हुनेछ ।

अंक तालिका

राजस्थान रोयल्स ८ खेलमा ६ मा जित र २ मा हार सहित १२ अंकका साथ शीर्ष स्थानमा छ । गुजरात ७ खेलमा ६ मा जित र १ मा हारका १२ अंक जोड्दै दोस्रो स्थानमा छ । हैदराबाद ७ खेलमा ५ मा जित र २ मा हार सहित १० अंकका साथ तेस्रो स्थानमा छ । लखनऊ ८ खेलमा ५ मा जित र ३ मा हार सहित चौथो स्थानमा छ ।

बेंगलोर ९ खेलमा ५ मा जित र ४ मा हार सहित १० अंकका साथ पाँचौं स्थानमा छ । पन्जाब ८ खेलमा ४ मा जित र ४ मा हार सहित छैटौं स्थानमा छ । दिल्ली ७ खेलमा ३ मा जित र ४ मा हार सहित सातौं स्थानमा छ । कोलकाता नाइट राइडर्स ८ खेलमा ३ मा जित र ५ मा हार सहित आठौं स्थानमा छ । चेन्नई ८ खेलमा २ मा जित र ६ मा हार सहित नवौं स्थानमा छ । मुम्बई ८ खेलमा जित बिहीन हुँदै पुछारमा छ ।