एजेन्सी – ओपनर अभिषेक शर्मा र एडेन माक्ररमको अर्धशतकमा सनराइजर्स हैदराबादले इन्डियन प्रिमियर लिग (आइपिएल) २०२२ को ४० औं खेलमा गुजरात टाइटन्सलाई १ सय ९६ रनको लक्ष्य दिएको छ ।

वानखडे स्टेडियम मुम्बईमा टस हारेर पहिला ब्याटिङ थालेको हैदराबादले निर्धारित २० ओभरमा ६ विकेट गुमाउँदै १ सय ९५ रन बनायो । हैदराबादका ओपनर अभिषेक शर्माले ४२ बलमा ६ चौका र ३ छक्कासहित सर्वाधिक ६५ रन बनाए । एडेन माक्ररमले ४० बलमा २ चौका र ३ छक्कासहित ५६ रन बनाए ।

हैदराबादले अन्तिम ओभरमा तीव्र गतिका बलर लोकी फर्गुसनलाई चार छक्कासहित कुल २५ रन जोडेपछि विशाल योगफलमा पुगेको थियो । अन्तिम ओभरको पहिलो बलमा मार्को यानसनले फर्गुसनलाई छक्का प्रहार गरेका थिए । त्यसपछि अन्तिम तीन बलमा शशांक सिंहले लगातार तीन छक्का प्रहार गर्दै विशाल योगफलमा पुयाए ।

शशांक ६ बलमा १ चौका र ३ छक्कासहित २५ रनमा अविजित रहे । मार्को यानसन ८ रनमा अविजित रहे । ओपनर तथा कप्तान केन विलियम्सन मोहम्मद शामीको बलमा ५ रनमा बोल्ड आउट हुँदा हैदराबादले २.५ ओभरमा २६ रन जोडेको थियो । शामीले नै राहुल त्रिपाठीलाई १६ रनमा एलबीडब्लू आउट गरे । उनले १० बलमा २ चौका र १ छक्का प्रहार गरे ।

तेस्रो विकेटका लागि अभिषेक र माक्ररमले ९६ रनको साझेदारी गर्दै इनिङ उकासेका थिए । १६ औं ओभरको पहिलो बलमा अल्जारी जोशेफले अभिषेशलाई बोल्ड गरे । शामीले निकोलस पुरनलाई सुभमन गिलबाट ३ रनमा क्याच गराए । गुजरातका मोहम्मद शामीले ४ ओभरमा ३९ रन खर्चेर ३ विकेट लिए । यश दयाल र अल्जारी जोशेफले १–१ विकेट लिए ।