एजेन्सी – राहुल टेवाटिया र राशिद खानको उत्कृष्ट अन्त्यमा गुजरात टाइटन्सले इन्डियन प्रिमियर लिग (आइपिएल) २०२२ मा सनराइजर्स हैदराबादलाई ५ विकेटले पराजित गरेको छ । योसँगै गुजरात टाइटन्स सातौं जितका साथ प्लेअफ नजिक पुगेको छ ।

जितको लागि १ सय ९६ रनको विजयी लक्ष्य पछ्याएको गुजरातले २० ओभरमा ५ विकेट गुमाउँदै पूरा गर्यो । गुजरातका ऋद्धिमान शाहले ३८ बलमा ११ चौका र १ छक्कासहित सर्वाधिक ६८ रन बनाए । गुजरातलाई अन्तिम ६ बलमा जितको लागि २२ रन चाहिँएको थियो । अन्तिम बलमा राशिद खानले मार्को यानसनलाई छक्का प्रहार गर्दै जित पक्का गराए ।

तीव्र गतिका बलर मार्को ज्यानसनलाई राहुल टेवाटियाले छक्का प्रहार गर्दै खेललाई रोचक बनाए । दोस्रो बलमा एक रन खचिएपछि बाँकी ४ बलमा १५ रन चाहिँएको थियो । तेस्रो बलमा राशिद खानले छक्का प्रहार गरेपछि गुजरात जिततर्फ अघि बढेको थियो । चौथो बल डट राखे । पाँचौं बलमा राशिद खानले छक्का प्रहार गरेपछि अन्तिम बलमा तीन रन चाहिँएको थियो । राशिदले अन्तिम बलमा छक्काको साथ जित दिलाए ।

राहुल टेवाटियाले २१ बलमा ४ चौका र २ छक्कासहित ४० रनमा अविजित रहे । राशिद खान ११ बलमा ४ छक्कासहित ३१ रनमा अविजित रहे । छैटौं विकेटका लागि राशिद र टेवाटियाले ४ ओभरमा ५९ रनको साझेदारी गर्दै जित पक्का गराए । गुजरातलाई ओपनर सुभमन गिल र ऋद्धिमान शाहले पहिलो विकेटका लागि ७.४ ओभरमा ६९ रन बनाउँदै राम्रो सुरुवात दिलाए । गिललाई २२ रनमा उमरानले बोल्ड गरे । उमरानले हार्दिक पान्ड्यालाई १० रनमा मार्को यानसनबाट क्याच गराए ।

१४ औं ओभरको दोस्रो बलमा उमरानले ऋद्धिमान शाहलाई बोल्ड आउट गरे । १६ औं ओभरको पाँचौं बलमा डेविड मिलरलाई १७ रन र अन्तिम बलमा अभिनभ मनोहरलाई पहिलो बलमै बोल्ड गर्दै करिअरको पहिलो पाँच विकेट पूरा गरे । हैदराबादका उमरान मलिकले ४ ओभरमा २५ रन खर्चेर ५ विकेट लिएपनि टोलीको हार टार्न सकेनन् ।

त्यसअघि वानखडे स्टेडियम मुम्बईमा टस हारेर पहिला ब्याटिङ थालेको हैदराबादले निर्धारित २० ओभरमा ६ विकेट गुमाउँदै १ सय ९५ रन बनाएको थियो । हैदराबादका ओपनर अभिषेक शर्माले ४२ बलमा ६ चौका र ३ छक्कासहित सर्वाधिक ६५ रन बनाए । एडेन माक्ररमले ४० बलमा २ चौका र ३ छक्कासहित ५६ रन बनाए ।

हैदराबादले अन्तिम ओभरमा तीव्र गतिका बलर लोकी फर्गुसनलाई चार छक्कासहित कुल २५ रन जोडेपछि विशाल योगफलमा पुगेको थियो । अन्तिम ओभरको पहिलो बलमा मार्को यानसनले फर्गुसनलाई छक्का प्रहार गरेका थिए । त्यसपछि अन्तिम तीन बलमा शशांक सिंहले लगातार तीन छक्का प्रहार गर्दै विशाल योगफलमा पुयाए ।

शशांक ६ बलमा १ चौका र ३ छक्कासहित २५ रनमा अविजित रहे । मार्को यानसन ८ रनमा अविजित रहे । ओपनर तथा कप्तान केन विलियम्सन मोहम्मद शामीको बलमा ५ रनमा बोल्ड आउट हुँदा हैदराबादले २।५ ओभरमा २६ रन जोडेको थियो । शामीले नै राहुल त्रिपाठीलाई १६ रनमा एलबीडब्लू आउट गरे । उनले १० बलमा २ चौका र १ छक्का प्रहार गरे ।

तेस्रो विकेटका लागि अभिषेक र माक्ररमले ९६ रनको साझेदारी गर्दै इनिङ उकासेका थिए । १६ औं ओभरको पहिलो बलमा अल्जारी जोशेफले अभिषेशलाई बोल्ड गरे । शामीले निकोलस पुरनलाई सुभमन गिलबाट ३ रनमा क्याच गराए । गुजरातका मोहम्मद शामीले ४ ओभरमा ३९ रन खर्चेर ३ विकेट लिए ।

यश दयाल र अल्जारी जोशेफले १–१ विकेट लिए । हैदराबादले अब आइतबार चेन्नई सुपर किंग्ससँग खेल्नेछ । गुजरातले शनिबार रोयल च्यालेन्जर्स बेंगलोरसँग खेल्नेछ । आइपिएलमा बिहीबार दिल्ली र कोलकाताबीच प्रतिस्पर्धा हुनेछ ।

अंक तालिका

गुजरात ८ खेलमा ७ मा जित र १ मा हारका १४ अंक जोड्दै शीर्ष स्थानमा छ । राजस्थान रोयल्स ८ खेलमा ६ मा जित र २ मा हार सहित १२ अंकका साथ दोस्रो स्थानमा छ । हैदराबाद ८ खेलमा ५ मा जित र ३ मा हार सहित १० अंकका साथ तेस्रो स्थानमा छ । लखनऊ ८ खेलमा ५ मा जित र ३ मा हार सहित चौथो स्थानमा छ ।

बेंगलोर ९ खेलमा ५ मा जित र ४ मा हार सहित १० अंकका साथ पाँचौं स्थानमा छ । पन्जाब ८ खेलमा ४ मा जित र ४ मा हार सहित छैटौं स्थानमा छ । दिल्ली ७ खेलमा ३ मा जित र ४ मा हार सहित सातौं स्थानमा छ । कोलकाता नाइट राइडर्स ८ खेलमा ३ मा जित र ५ मा हार सहित आठौं स्थानमा छ । चेन्नई ८ खेलमा २ मा जित र ६ मा हार सहित नवौं स्थानमा छ । मुम्बई ८ खेलमा जित बिहीन हुँदै पुछारमा छ ।