एजेन्सी – इन्डियन प्रिमियर लिग (आइपिएल) २०२२ को ४२ औं खेलमा आज पन्जाब किंग्स र लखनऊ सुपर जायन्ट्सबीच प्रतिस्पर्धा हुँदैछ । खेल नेपाली समय अनुसार साँझ ७ : ४५ मा महाराष्ट्र क्रिकेट एसोसियसन पुणेमा सुरु हुनेछ ।

पन्जाब पाँचौैं र लखनऊ छैटौं जितको खोजीमा छन् । लखनऊ ८ खेलमा ५ मा जित र ३ मा हारसहित चौथो स्थानमा छ । पन्जाब ८ खेलमा ४ मा जित र ४ मा हार सहित सातौं स्थानमा छ । पन्जाबलाई प्लेअफमा पुग्ने सम्भावना बलियो बनाउन जित्नै पर्ने दबाब छ । पन्जाबको मयंक अग्रवाल र लखनऊको लोकेश राहुलले कप्तानी गर्नेछन् ।

लोकेशले पन्जाब छाडेर नयाँ टोली लखनऊको कप्तानी गरि रहेका छन् । राहुलले छाडेपछि मयंकले पन्जाबको नेतृत्व सम्हाल्लेका छन् । आइपिएलका यी दुई पूर्व चर्चित ओपनर जोडी एक अर्का टोलीविरुद्ध नेतृत्व गर्दैछन् । एक अर्काको कमजोरी राम्रोसँग थाहा छ । आइपिएलमा लगातार उच्च प्रदर्शन गर्दै आएका राहुलले यस सिजनमा दुई शतक प्रहार गरि सकेका छन् ।

राहुलले ८ खेलमा २ शतक र १ अर्धशतकसहित ३ सय ६८ रन बनाएका छन् । परिपक्क र जिम्मेवारीपूर्ण ब्याटिङ गर्ने राहुलको लयलाई रोक्न पन्जाबलाई चुनौती हुनेछ । राहुलले पछिल्लो खेलमा वानखडेमा मुम्बईविरुद्ध १ सय ३ रनको अविजित शतकीय इनिङ खेलेका थिए । त्यसअघि मुम्बईविरुद्धनै १ सय ३ रनको अविजित इनिङ खेलेका थिए ।

राहुलको विकेट पन्जाबको लागि महत्वपूर्ण हुनेछ । राहुल बाहेक क्विन्टन डि कक र मनिष पाण्डे प्रमुख ब्याटर हुन् । लखनऊ अलराउन्डरमा बढी निर्भर छ । मार्कस स्टोइनिस, कु्रनाल पान्ड्या, जेसन होल्डर, दीपक हुडा र आयुष बदोनी जस्ता अलराउन्डर टोलीमा छन् । लखनऊको मध्यक्रम ब्याटिङ कमजोरीको रुपमा छ । तीव्र गतिका बलर दुश्मन्था चामिराले कसिलो बलिङ गर्दै आएका छन् ।

पन्जाबले पछिल्लो खेलमा चेन्नई सुपर किंग्सलाई ११ रनले हराएको थियो । उक्त खेलमा शिखर धवनले ५९ बलमा ८८ रनको अविजित इनिङ खेलेका थिए । धवनले जिम्मेवारी इनिङ खेल्ने हुँदा उनको विकेट महत्वपूर्ण हुनेछ । धवनले स्ट्राइक रेटमा भने ध्यान दिनुपर्ने हुन्छ । मयंक कप्तानी दबाबमा खुलेर खेल्न सकेका छैनन् ।

मध्यक्रमका दुई आक्रामक ब्याटर भानुका राजपक्षे र लियाम लिभिङस्टोनको प्रदर्शनले धेरै महत्वपूर्ण हुनेछ । यी दुबै ब्याटर एकै ओभरमा खेललाई मोड्न सक्ने खुबी भएका ब्याटर हुन् । जोनी बेयरस्टोको स्थानमा ओडेन स्मिथ वा नाथन एलिसलाई मैदान उतार्न सक्छ । बेस्यरस्टो रन बनाउन संघर्ष गर्दै आएका छन् ।

विकेटकिपर जितेश शर्माले आक्रामक इनिङ खेल्दै आएका छन् । २०१६ पछि आइपिएलमा फर्किएका ऋषि धवनले चेन्नईसँग प्रभावकारी प्रदर्शन गरेका थिए । पन्जाबको तल्लोक्रम ब्याटिङ भने कमजोरीको रुपमा छ । तीव्र गतिका बलर कागिसो रबाडा र अर्शदीप सिंह बलिङका हतियार हुन् । यी दुई बलरले डेथ ओभरमा योर्करका साथ लगातार उच्च प्रदर्शन गरेका छन् ।

अंक तालिका

गुजरात ८ खेलमा ७ मा जित र १ मा हारका १४ अंक जोड्दै शीर्ष स्थानमा छ । राजस्थान रोयल्स ८ खेलमा ६ मा जित र २ मा हार सहित १२ अंकका साथ दोस्रो स्थानमा छ । हैदराबाद ८ खेलमा ५ मा जित र ३ मा हार सहित १० अंकका साथ तेस्रो स्थानमा छ । लखनऊ ८ खेलमा ५ मा जित र ३ मा हार सहित चौथो स्थानमा छ ।

बेंगलोर ९ खेलमा ५ मा जित र ४ मा हार सहित १० अंकका साथ पाँचौं स्थानमा छ । दिल्ली ८ खेलमा ४ मा जित र ४ मा हार सहित छैटौं स्थानमा छ । पन्जाब ८ खेलमा ४ मा जित र ४ मा हार सहित सातौं स्थानमा छ । कोलकाता नाइट राइडर्स ९ खेलमा ३ मा जित र ६ खेलमा हार सहित आठौं स्थानमा छ । चेन्नई ८ खेलमा २ मा जित र ६ मा हार सहित नवौं स्थानमा छ । मुम्बई ८ खेलमा जित बिहीन हुँदै पुछारमा छ ।