एजेन्सी – इन्डियन प्रिमियर लिग (आईपीएल) २०२२ भारतमा जारी छ । आइपिएल विश्व क्रिकेटको सर्वाधिक लोकप्रिय र धनराषि भएको फ्रेन्चाइज क्रिकेट हो । आइपिएलमा खेलाडीले नाम र दाम दुबै राम्रो कमाउने हुँदा धेरैको खेल्ने सपना हुन्छ । विश्व स्टारले आइपिएल अक्सनमा मोटो रकम पाउने गर्दछन् ।

आइपिएलमा विश्वका धेरै स्टार खेलाडीहरु खेल्ने गर्दछन् । तर पाकिस्तानका खेलाडीलाई भने आइपिएल खेल्न प्रतिबन्ध छ । पाकिस्तान र भारतबीचको आन्तरिक राजनीतिक चिसो सम्बन्धको कारण आइपिएल खेल्न पाकिस्तानी खेलाडीलाई प्रतिबन्ध लागेको हो । सन् २००८ को मुम्बईमा भएको आतंककारी हमला र सिमा क्षेत्रको निरन्तर विवादको कारण पाकिस्तानी खेलाडीलाई आइपिएल खेल्न प्रतिबन्ध लागेको हो ।

वर्तमान समयमा पाकिस्तानमा बाबर आजम र शाहिन शाह अफ्रिदी विश्व क्रिकेटका ठूला नाम हुन् । पछिल्लो समय पाकिस्तानले विश्व क्रिकेटमा आफ्नो प्रभाव जमाउँदै आएको छ । २००८ को पहिलो संस्करणको आइपिएलमा पाकिस्तानका ११ खेलाडी सहभागी थिए । त्यसपछि पाकिस्तानी खेलाडीले आइपिएल खेलेका छैनन् । आईपीएल खेलेका ११ खेलाडी मध्य पाँच स्टार पाकिस्तानी खेलाडी र ती खेलाडीको प्रर्दशन यस्तो थियो ।

५.शाहिद अफ्रिदी

बुम बुम अफ्रिदीको उप नाम पाएका अफ्रिदीले सन् २००८ मा डेकन चार्जर्सबाट आइपिएल खेलेका थिए । अफ्रिदीले १० खेलमा ८१ रन बनाउनुको साथै ९ विकेट लिए । अफ्रिदीबाट आसा गरे अनुसारको प्रर्दशन भने हुन सकेन । अफ्रिदिले एक अन्तर्वार्तामा डेक्सनका भीभीएस लक्ष्मणको कप्तानी आफुलाई मन नपरेको र एडम गिलक्रिस्टलाई कप्तान दिनु पर्ने अभिव्यक्ति दिएपछि उनी विवादमा समेत परेका थिए ।

४.शोएब अख्तर

विश्वकै तीव्र गतिका बलर अख्तरले कोलकता नाईट राइडर्सबाट आईपीएल खेलेका थिए । जुन बेला सौरभ गांगुली कोलकताका कप्तान थिए । पहिलो खेलमै दिल्लीका विरेन्द्र सहवाग, गौतम गम्भीर, एबी डी भिलिसयर्स र मनोज तिवारीलाई आउट गर्दै सनसनी मच्चाएका अख्तरले ३ खेलमा ५ विकेट लिए । त्यसै वर्ष अख्तरलाई पाकिस्तान बोर्डले एक विवादका कारण ५ वर्ष प्रतिबन्ध लगाएको थियो ।

३.मोहम्मद हफिज

पाकिस्तान क्रिकेट टिमका अलराउण्डर हाफिजले कोलकताबाट नै आईपीएल खेलेका थिए । हफिजले ८ खेलमा २ विकेट लिनुका साथै ६४ रन बनाए । अफिज हाल पनि पाकिस्तानका प्रमुख अनुभवी अलराउण्डर हुन् । ४१ वर्षीय हफिजले गत टि२० विश्वकपमा सानदार प्रदर्शन गरेका थिए । पछिल्लो समय भने पाकिस्तानले युवा खेलाडीलाई मौका दिन उनलाई टोली बाहिर राखेको छ ।

२.कामरान अकमल

पाकिस्तानका विकेटकीपर तथा ब्याट्सम्यान अकमलले राजस्थान रोयल्यसबाट खेलेका थिए । ६ खेल खेल्ने मौका पाएका अकमलले १ अर्धशतक सहित १ सय २८ रन जोडेका थिए ।

१ .सोहेल तनविर

तीव्र गतिका बलर सोहेल तनविरले राजस्थानबाटै आईपीएल खेलेका थिए । राजस्थानलाई च्याम्पियन बनाउन तनविरको ११ खेलमा २२ विकेट लिँदै पर्पल क्याप जितेका थिए । जसक्रममा उनले चेन्नई सुपर किंग्सविरुद्ध ४ ओभरमा १४ रन खर्चेर ६ विकेट लिएका थिए ।

आइपिएलको उत्कृष्ट प्रदर्शनको कीर्तिमान २०१९ मा मुम्बई इन्डियन्सबाट सनराइजर्स हैदराबादविरुद्ध ३.४ ओभरमा १२ रन खर्चेर ६ विकेट लिएका थिए । यी पाँच खेलाडी बाहेक त्यसवर्ष शोएब मालिक, सलमान बट, उमर गुल, मोहम्मद आसिफ, मिस्बाह उल हक र युनिस खानले आइपिएल खेलेका थिए ।