काठमाडौं (हाम्रो खेलकुद) – नेपाली राष्ट्रिय महिला क्रिकेट टोलीकी कप्तान रुविना क्षेत्री बेलबासे र उपकप्तान सीता रानामगर शनिबार फेयर ब्रेक इन्भिटेसनल टि२० क्रिकेट प्रतियोगिता खेल्न युएई जादै छन् ।

रुविनाले द बर्मी आर्मी र सीताले द टोर्नडोसबाट खेल्नेछन् । रुविना र सीता शनिबार दिउँसो ३ : ४५ मा युएईतर्फ प्रस्थान गर्नेछन् । प्रतियोगिता ६ टोली हुँदा विश्वका स्टार खेलाडीले सहभागी जनाउने छन् । रुविनाले इंग्ल्यान्डकी कप्तान हेदर नाइट र सीताले स्टेफनी टेलरको कप्तानीमा खेल्नेछन् ।

प्रतियोगिता ४ मे देखि १५ सम्म दुबई इन्टरनेशल क्रिकेट स्टेडियममा सुरु हुनेछ । कुल १९ खेल हुनेछन् । ‘प्रतियोगिता खेल्न निकै उत्साहित छु । यस्तो अवसर सधैंभरी आउँदैन । म पनि पछिल्लो एक महिनादेखि काठमाडौंमा आएर अभ्यास गरेको छुँ । विश्वस्तरिय खेलाडीसँग राम्रो प्रदर्शन गर्न सकु भनेर । आफ्नो प्रदर्शन गरेर नेपाली क्रिकेटमा पनि यस्तो खेल्दो रहेछ भन्ने देखाउने छ’, रुविनाले हाम्रो खेलकुदसँग भनिन् ।

‘अव एकदमै खुसी लागेको छ । विश्वका स्टार खेलाडीसँगै खेल्छु भनेर सोचेको पनि थिएन । उनीहरुसँग सिक्नलाई उत्सुक पनि छु’, सीताले भनिन् ।

सीताको टोलीमा कप्तान टेलरसँगै न्युजिल्यान्डकी चर्चित ब्याटर शोफी डेभनी, न्युजिल्यान्डकी क्याटी मार्टिन, पाकिस्तानकी अलिया रियाज र दक्षिण अफ्रिकाकी सुने लुस जस्ता विश्व चर्चित खेलाडी छन् । रुविनाको टोली द बेर्मी आर्मीमा हेदरसँगै दक्षिण अफ्रिकाकी लौरा वोल्भार्ड, पाकिस्तानकी फतिमा सना र वेस्टइन्डिजकी डिआन्ड्रा डोटिन जस्ता खेलाडी छन् ।