एजेन्सी – पाँच पटकको च्याम्पियन मुम्बई इन्डियन्सले इन्डियन प्रिमियर लिग (आइपिएल) २०२२ मा आज राजस्थान रोयल्ससँग खेल्दैछ । खेल नेपाली समय अनुसार साँझ ७ : ४५ मा डिवाई पाटिल स्पोर्ट्स एकेडेमी मुम्बईमा सुरु हुनेछ ।

मुम्बई ८ खेलमा हारका साथ पुछारमा छ । मुम्बई आजको खेलमा पराजित भएमा लगातार नौं खेलमा हारका साथ प्लेअफ दौडबाट औपचारिक रुपमा बाहिरिने पहिलो टोली बन्नेछ । राजस्थान भने ८ खेलमा ६ मा जित र २ मा हारका साथ १२ अंक जोड्दै दोस्रो स्थानमा छ । राजस्थानको लक्ष्य मुम्बईलाई हराउँदै शीर्षस्थानमा उक्लिने हुनेछ । मुम्बईलाई भने लगातार नौं खेलमा हारको डर हुनेछ । बलियो राजस्थानविरुद्ध मुम्बईलाई जित निकाल्न सहज भने हुनेछैन ।

मुम्बईले यस सिजनमा ब्याटिङ र बलिङ दुबैमा कमजोर प्रदर्शन गरेको छ । ओपनर रोहित शर्मा र ईशान किशन यस सिजनमा फ्लप छन् । यी दुई ओपनरबाट मुम्बई उत्कृष्ट प्रदर्शन चाहन्छ । डेवाल्ड ब्रेभिस, सूर्यकुमार यादव र तिलक बर्मा मध्यक्रमका ब्याटर हुन् । मुम्बईले आजको खेलमा तीव्र गतिका बलर जयदेव उनादकटको स्थानमा सचिन तेन्दुलकरका छोरा अर्जुनलाई डेब्यू दिनसक्छ । जस्प्रित बुमराह, ड्यानियल साम्स र राइली मेरीडिथ तीव्र गतिका बलिङ हतियार हुन् । बुमराह पनि यो सिजनमा चल्न सकेका छैनन् ।

यता राजस्थानले ब्याटिङमा सानदार प्रदर्शन गरेको छ । ओपनर जस बटलरले ८ खेलमा ३ शतक र २ अर्धशतकसहित कुल ४ सय ९९ रन बनाएका छन् । उनले मुम्बईविरुद्ध जारी सिजनमा शतक प्रहार गरेका थिए । उनको लय रोक्न मुम्बईलाई मुख्य चुनौतीहुनेछ । शिम्रन हेटमार र सन्जु स्यामसन राम्रो लयमा छन् । तल्लोक्रममा रियान परागले पनि ब्याटिङ सम्हाल्न सक्छन् ।

राजस्थानको तीव्र गतिको बलिङ आक्रामणमा ट्रेन्ट बोल्ट, प्रसिद्ध कृष्णा र कुलदीप सेन रहेका छन् । यी तीनै खेलाडी लयमा छन् । यस सिजनमा सर्वाधिक १८ विकेट लिएका युजभेन्द्र चहल र अनुभवी स्पिनर र र रविचन्द्रन आश्विन छन् । राजस्थानले लगातार सानदार प्रदर्शन गरेको हुँदा टोलीमा परिवर्तन भने सम्भावना कम छ । राजस्थान आफ्ना स्वर्गीय पूर्व खेलाडी शेन वार्नको सम्झनामा आज विशेष जर्सीमा मैदासन उत्रनेछ ।

आजको पहिलो खेलमा गुजरात टाइटन्स र रोयल च्यालेन्जर्स बेंगलोरबीच प्रतिस्पर्धा हुँदैछ । खेल दिउँसो ३ : ४५ मा ब्रेबोन स्टेडियम मुम्बईमा सुरुहुनेछ । गुजरात ८ खेलमा ७ मा जित र १ मा हार सहित १४ अंकका साथ शीर्षस्थानमा छ । गुजरात आज विजयी भएमा प्लेअफमा स्थान पक्का हुनेछ । बेंगलोर ९ खेलमा ५ मा जित र ४ मा हार सहित पाँचौं स्थानमा छ । बेंगलोरलाई भने यस खेल जित्नुपर्ने दबाब हुनेछ ।

अंक तालिका

गुजरात ८ खेलमा ७ मा जित र १ मा हारका १४ अंक जोड्दै शीर्ष स्थानमा छ । राजस्थान रोयल्स ८ खेलमा ६ मा जित र २ मा हार सहित १२ अंकका साथ दोस्रो स्थानमा छ । लखनऊ ९ खेलमा ६ मा जित र ३ मा हार सहित तेस्रो स्थानमा छ । हैदराबाद ८ खेलमा ५ मा जित र ३ मा हार सहित १० अंकका साथ तेस्रो स्थानमा छ ।

बेंगलोर ९ खेलमा ५ मा जित र ४ मा हार सहित १० अंकका साथ पाँचौं स्थानमा छ । दिल्ली ८ खेलमा ४ मा जित र ४ मा हार सहित छैटौं स्थानमा छ । पन्जाब ९ खेलमा ४ मा जित र ५ मा हार सहित सातौं स्थानमा छ । कोलकाता नाइट राइडर्स ९ खेलमा ३ मा जित र ६ खेलमा हार सहित आठौं स्थानमा छ । चेन्नई ८ खेलमा २ मा जित र ६ मा हार सहित नवौं स्थानमा छ । मुम्बई ८ खेलमा जित बिहीन हुँदै पुछारमा छ ।