एजेन्सी – प्रमुख ब्याटर विराट कोहलीको पूनरागमन ब्याटिङमा रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२२ को ४३ औं खेलमा गुजरात टाइटन्सलाई १ सय ७१ रनको प्रतिस्पर्धात्मक लक्ष्य दिएको छ ।

ब्रेबोन स्टेडियम मुम्बईमा टस जितेर पहिला ब्याटिङ रोजेको बेंगलोरले निर्धारित २० ओभरमा ६ विकेट गुमाउँदै १ सय ७० रन बनायो । बेंगलोरका विराट कोहलीले ५३ बलमा ६ चौका र १ छक्कासहित सर्वाधिक ५८ रन बनाए । खराब लयबाट गुज्रिएका कोहलीले सुस्त शैलीमा अर्धशतक पूरा गरेका थिए ।

कोहलीको जारी सिजनमा पहिलो अर्धशतक हो । कोहलीको यसअघिको प्रदर्शन सम्झन लायक थिएन । कोहली सनराइजर्स हैदराबाद र लखनऊ सुपर जायन्ट्सविरुद्ध लगातार गोल्डेन डक हुन पुगेका थिए । कोहलीलाई मोहम्मद शामीले बोल्ड गरे ।

ओपनर फाफ डु प्लेसिस चार बल खेल्दै शून्यमा आउट भए । तर दोस्रो विकेटका कोहली र राजत पाटिदरले ९९ रनको साझेदारी गर्दै राम्रो योगफलको आधार तय गरेका थिए ।

पाटिदर ३२ बलमा ५ चौका र २ छक्कासहित ५२ रनमा क्याच आउट भए । उनलाई जारी आइपिएलमा पहिलो खेल खेलेका बायाँ हाते बलर प्रदीप संगवानले सुभमन गिलबाट क्याच गराए ।

तल्लोक्रमका ग्लेन म्याक्सवेलले १८ बलमा ३ चौका र २ छक्कासहित ३३ रन बनाए । महिपाल लोमरले ८ बलमा २ चौका र १ छक्कासहित १६ रन बनाए । गुजरातका प्रदीप संगवानले ४ ओभरमा १९ रन खर्चेर २ विकेट लिए । मोहम्मद शामीले ४ ओभरमा ३९ रन खर्चेर १ विकेट लिए । स्पिनर राशिद खानले ४ ओभरमा २९ रन खर्चेर १ विकेट लिए । लोकी फर्गुसन र अल्जारी जोशेफको नाममा १ (१ विकेट रह्यो ।