एजेन्सी – सर्वाधिक सफल कप्तान महेन्द्रसिंह धोनी इन्डियन प्रिमियर लिग (आइपिएल) मा चेन्नईको कप्तानीमा फर्किने भएका छन् । धोनीले यसै सिजनदेखि चेन्नईको कप्तानी रविन्द्र जडेडालाई हस्तान्तरण गरेका थिए । तर चेन्नईले जडेजाको कप्तानीमा खराब नतिजा बेहोरेपछि धोनी नै फर्किने भएका हुन् ।

जडेजाले कप्तानी छोड्दै पुन धोनीलाई नै दिएका हुन् । जडेजाले आफ्नो खेलमा ध्यान दिन कप्तानी छोड्दै पुन धोनीलाई गर्न आग्रह गरेको चेन्नईले जनाएको छ । जडेजाको आग्रह मान्दै धोनी पुन कप्तानी गर्ने भएका हुन् । जडेजाले कप्तानी दबाबमा कमजोर प्रदर्शन गरेका छन् । जडेजाको कप्तानीमा चेन्नई ८ खेलमा २ मा जित र ६ मा हार सहित नवौं स्थानमा छ ।

जडेजाले यस सिजनमा ८ खेलमा १ सय १२ रन बनाउँदा ५ विकेट लिएका छन् । अहिलेको प्रदर्शनले जडेजालाई भारतीय टोलीमा स्थान बनाउन कठिन देखिन्छ । चेन्नईले अव आइतबार सनराइजर्स हैदराबादसँग खेल्नेछ । चेन्नईलाई प्लेअफमा पुग्न बाँकी ६ खेलमानै जित निकाल्नु पर्ने हुन्छ ।

धोनीको कप्तानीमा चेन्नईले सन् २०१०, २०११, २०१८ र २०२१ को उपाधि जितेको थियो । २००८, २०१२, २०१३, २०१५ र २०१९ मा उप विजेता बनेको थियो । धोनीले २ सय १३ खेलमा कप्तानी गर्दा १ सय ३० खेलमा जित दिलाएका छन् । धोनीको कप्तानीमा चेन्नई २०२० मा पहिलो पटक लिगबाट बाहिरिएको थियो ।