एजेन्सी – पाँच पटकको च्याम्पियन मुम्बई इन्डियन्सले इन्डियन प्रिमियर लिग (आइपिएल) २०२२ मा पहिलो जित हात पारेको छ । मुम्बईले शनिबार राती राजस्थान रोयल्सलाई ५ विकेटले हराउँदै लगातार आठ खेलमा हारको यात्रा अन्त्य गरेको छ ।

जितको लागि १ सय ५९ रनको विजयी लक्ष्य पछ्याएको मुम्बईले १९.२ ओभरमा ५ विकेट गुमाउँदै पूरा गर्यो । मुम्बईको जितमा सूर्यकुमार यादवले ३९ बलमा ५ चौका र २ छक्कासहित सर्वाधिक ५१ रनको योगदान दिए । तिलक बर्माले ३० बलमा १ चौका र २ छक्कासहित ३५ रन बनाए ।

तेस्रो विकेटका लागि सूर्य र तिलकले ५६ बलमा ८१ रनको साझेदारी गर्दै जितको आधार तय गरेका थिए । ईशान किशनले १८ बलमा ४ चौका र १ छक्कासहित २६ रन जोड्दै राम्रो इनिङ खेलेका थिए । रोहित शर्मा २ रनमा आउट भए ।

टिम डेविड ९ बलमा २ चौका र १ छक्का सहित २० रनमा अविजित रहे । काइरन पोलार्ड १० रनमा आउट भए । राजस्थानका तीव्र गतिका बलर ट्रेन्ट बोल्ट, प्रसिद्ध कृष्णा, कुलदीप सेन, रविचन्द्रन आश्विन र युजभेन्द्र चहलले १–१ विकेट लिए ।

त्यसअघि डिवाई पाटिल स्पोर्ट्स एकेडेमी मुम्बईमा टस हारेर ब्याटिङको निम्तो पाएको राजस्थानले निर्धारित २० ओभरमा ६ विकेट गुमाउँदै १ सय ५८ रन बनाएको थियाो । राजस्थानका जस बटलरले ५२ बलमा ५ चौका र ४ छक्कासहित सर्वाधिक ६७ रनको योगदान दिए । बटलरले रन बनाउन संघर्ष गरेका थिए । राजस्थानले १५ ओभरको समाप्तिमा राजस्थानले ३ विकेट गुमाउँदै १ सय २ रन बनाएको थियो ।

त्यस समय बटलरले ४६ बलमा ४३ रन बनाएका थिए । १६ औं ओभरमा बटलरले युवा स्पिनर ऋतिक शोकिनलाई लगातार चार छक्का प्रहार गर्दै सामान्यबाट मध्यम योगफलमा पुर्याएका थिए । पाँचौं बल डट खादा अन्तिम बलमा लङअफमा सूर्यकुमार यादवबाट क्याच भएक थिए । जारी आइपिएलमा बटलरले ९ खेलमा ३ शतक र ३ अर्धशतकसहित ५ सय ६६ रनका साथ शीर्षस्थानमा छन् ।

देवदत्त पाडिक्कल १५, सन्जु स्यामसन १६, डर्याल मिचेल १७, रियान पराग ३ र रविचन्द्रन आश्विन २१ रनमा आउट भए । मुम्बईका स्पिनर ऋतिक शोकिनले ३ ओभरमा ४७ रन खर्चेर २ विकेट लिए । राइली मेरीडिथले ४ ओभरमा २४ रन खर्चेर २ विकेट लिए । राजस्थानले सोमबार कोलकाता नाइट राइडर्ससँग खेल्नेछ । मुम्बईले शुक्रबार गुजरात टाइटन्ससँग खेल्नेछ ।

अंक तालिका

गुजरात ९ खेलमा ८ मा जित र १ मा हारका १६ अंक जोड्दै शीर्ष स्थानमा छ । राजस्थान रोयल्स ९ खेलमा ६ मा जित र ३ मा हार सहित १२ अंकका साथ दोस्रो स्थानमा छ । लखनऊ ९ खेलमा ६ मा जित र ३ मा हार सहित तेस्रो स्थानमा छ । हैदराबाद ८ खेलमा ५ मा जित र ३ मा हार सहित १० अंकका साथ तेस्रो स्थानमा छ ।

बेंगलोर १० खेलमा ५ मा जित र ५ मा हार सहित १० अंकका साथ पाँचौं स्थानमा छ । दिल्ली ८ खेलमा ४ मा जित र ४ मा हार सहित छैटौं स्थानमा छ । पन्जाब ९ खेलमा ४ मा जित र ५ मा हार सहित सातौं स्थानमा छ । कोलकाता नाइट राइडर्स ९ खेलमा ३ मा जित र ६ खेलमा हार सहित आठौं स्थानमा छ । चेन्नई ८ खेलमा २ मा जित र ६ मा हार सहित नवौं स्थानमा छ । मुम्बई ९ खेलमा १ मा जित र ८ मा हार सहित पुछारमा छ ।