एजेन्सी – ओपनर ऋतुराज गायकवाड र डेभन कन्वेको सानदार ब्याटिङको सहयोगमा चेन्नई सुपर किंग्सले इन्डियन प्रिमियर लिग (आइपिएल) २०२२ मा सनराइजर्स हैदराबादलाई २ सय ३ रनको विशाल लक्ष्य दिएको छ ।

महाराष्ट्र क्रिकेट एसोसियसन स्टेडियम पुणेमा टस हारेर पहिला ब्याटिङ थालेको चेन्नईले निर्धारित २० ओभरमा २ विकेट गुमाउँदै २ सय २ रन बनायो । चेन्नईका ओपनर ऋतुराज गायकवाडले ५७ बलमा ६ चौका र ६ छक्कासहित सर्वाधिक ९९ रनको योगदान दिए । डेभन कन्वे ५५ बलमा ८ चौका र ५ छक्कासहित ८५ रनमा अविजित रहे ।

तीव्र गतिका बलर टि नटराजनको १८ औं ओभरको पाँचौं बलमा गायकवाड व्याकवाड प्वाइन्टमा भुवनेश्वर कुमारबाट क्याच भए । गायकवाड आइपिएलमा आफ्नो दोस्रो शतक बनाउन एक रनले चुके । यसअघि गायकवाडले गतवर्ष राजस्थान रोयल्ससँग १ सय १ रनको अविजित शतकीय इनिङ खेलेका थिए ।

यो खेलसँगै महेन्द्रसिंह धोनी पनि कप्तानको रुपमा फर्किएका छन् । यसअघि यस सिजनदेखि कप्तानी छाडेपनि रविन्द्र जडेजाले पुन धोनीलाईनै कप्तानीमा सुम्पिएका हुन् । धोनीले डेभन कन्वेलाई ओपनिङ गराउँदै पुन एक उत्कृष्ट कप्तानको उदाहरण प्रस्तुत गरे ।

कन्वेले पहिलो खेलमा कोलकाता नाइट राइडर्ससँगको खेलपछि मौका पाएका थिएनन् । धोनी कप्तानको रुपमा पूनरागमन गर्दै कन्वेलाई ओपनिङ गराउँदा उनले पनि सानदार प्रदर्शन गरे ।

पहिलो विकेटका लागि कन्वे र गायकवाडले १७.५ ओभरमा १ सय ८२ रनको साझेदारी गर्दै विशाल योगफलको आधार तय गरेका थिए । धोनी ८ रनमा आउट भए । टि नटराजनले ४ ओभरमा ४२ रन खर्चेर २ विकेट लिए ।