एजेन्सी – विश्व क्रिकेटका एक सफल कप्तान महेन्द्रसिंह धोनी कप्तानमा फर्किदा चेन्नई सुपर किंग्सले इन्डियन प्रिमियर लिग (आइपिएल) २०२२ मा सनराइजर्स हैदराबादलाई १३ रनले पराजित गरेको छ । तेस्रो जितसँगै चेन्नईले प्लेअफको अंक गणतीतिय सम्भावना कामयै राखेको छ ।

जितको लागि २ सय ३ रनको विशाल लक्ष्य पछ्याएको हैदराबादले निर्धारित २० ओभरमा ६ विकेट गुमाउँदै १ सय ८९ रन बनायो । हैदराबादका विकेटकिपर निकोलस पुरन ३३ बलमा ३ चौका र ६ छक्कासहित ६४ रनमा अविजित रहेपनि टोलीको हार टार्न सकेनन् ।

केन विलियम्सन ३७ बलमा २ चौका र २ छक्कासहित ४७ रनमा आउट भए । ओपनर अभिषेक शर्मा २४ बलमा ५ चौका र १ छक्कासहित ३९ रनमा आउट भए । राहुल त्रिपाठी गोल्डेन डक र एडेन माक्ररम १७ रनमा आउट भए ।

चेन्नईका तीव्र गतिका बलर मुकेश चौधरीले ४ ओभरमा ४६ रन खर्चेर ४ विकेट लिए । ड्वेन प्रिटोरियोस र मिचेल सान्टनारले १–१ विकेट लिए ।

त्यसअघि महाराष्ट्र क्रिकेट एसोसियसन स्टेडियम पुणेमा टस हारेर पहिला ब्याटिङ थालेको चेन्नईले निर्धारित २० ओभरमा २ विकेट गुमाउँदै २ सय २ रन बनाएको थियो । चेन्नईका युवा ओपनर ऋतुराज गायकवाडले ५७ बलमा ६ चौका र ६ छक्कासहित सर्वाधिक ९९ रनको योगदान दिए ।

तीव्र गतिका बलर टि नटराजनको १८ औं ओभरको पाँचौं बलमा गायकवाड व्याकवाड प्वाइन्टमा भुवनेश्वर कुमारबाट क्याच भए । गायकवाड आइपिएलमा आफ्नो दोस्रो शतक बनाउन एक रनले चुके । यसअघि गायकवाडले गतवर्ष राजस्थान रोयल्ससँग १ सय १ रनको अविजित शतकीय इनिङ खेलेका थिए ।

अर्का ओपनर डेभन कन्वे ५५ बलमा ८ चौका र ५ छक्कासहित ८५ रनमा अविजित रहे । पहिलो विकेटका लागि कन्वे र गायकवाडले १७.५ ओभरमा १ सय ८२ रनको साझेदारी गर्दै विशाल योगफलको आधार तय गरेका थिए । धोनी ८ रनमा आउट भए ।

यो खेलसँगै महेन्द्रसिंह धोनी पनि कप्तानको रुपमा फर्किएका छन् । यसअघि यस सिजनदेखि कप्तानी छाडेपनि रविन्द्र जडेजाले पुन धोनीलाईनै कप्तानीमा सुम्पिएका हुन् । धोनीले डेभन कन्वेलाई ओपनिङ गराउँदै पुन एक उत्कृष्ट कप्तानको उदाहरण प्रस्तुत गरे ।

कन्वेले पहिलो खेलमा कोलकाता नाइट राइडर्ससँगको खेलपछि मौका पाएका थिएनन् । धोनी कप्तानको रुपमा पूनरागमन गर्दै कन्वेलाई ओपनिङ गराउँदा उनले पनि सानदार प्रदर्शन गरे । ड्वेन ब्राभोको स्थानमा कन्वेले मौका पाएका थिए । हैदराबादका टि नटराजनले ४ ओभरमा ४२ रन खर्चेर २ विकेट लिए ।

चेन्नईले अव बुधबार रोयल च्यालेन्जर्स बेंगलोरसँग खेल्नेछ । चेन्नई प्ले अफमा पुग्न बाँकी ५ खेलमा जित निकाल्नु पर्ने हुन्छ । बाँकी ५ खेलमा जित निकाल्दा कुल १६ अंक हुने हुँदा प्लेअफको सम्भावना देखिन्छ । हैदराबादले बिहीबार दिल्ली क्यापिटल्ससँग खेल्नेछ । हैदराबाद भने प्लेअफ दौडमा बलियो अवस्थामा छ ।

अंक तालिका

गुजरात ९ खेलमा ८ मा जित र १ मा हारका १६ अंक जोड्दै शीर्ष स्थानमा छ । लखनऊ १० खेलमा ७ मा जित र ३ मा हार सहित १४ अंक जोड्दै दोस्रो स्थानमा छ । राजस्थान रोयल्स ९ खेलमा ६ मा जित र ३ मा हार सहित १२ अंकका साथ तेस्रो स्थानमा छ । हैदराबाद ९ खेलमा ५ मा जित र ४ मा हार सहित चौथो स्थानमा छ ।

बेंगलोर १० खेलमा ५ मा जित र ५ मा हार सहित १० अंकका साथ पाँचौं स्थानमा छ । दिल्ली ९ खेलमा ४ मा जित र ५ मा हार सहित छैटौं स्थानमा छ । पन्जाब ९ खेलमा ४ मा जित र ५ मा हार सहित सातौं स्थानमा छ । कोलकाता नाइट राइडर्स ९ खेलमा ३ मा जित र ६ खेलमा हार सहित आठौं स्थानमा छ । चेन्नई ९ खेलमा ३ मा जित र ६ मा हार सहित नवौं स्थानमा छ । मुम्बई ९ खेलमा १ मा जित र ८ मा हार सहित पुछारमा छ ।