काठमाडौं (हाम्रो खेलकुद) – नेपाली क्रिकेट टोलीका ओपनर कुशल भुर्तेलले जिम्बावे ए सँगको तेस्रो टि२० सिरिज खेलमा प्रहार गरेको छक्काले टियु मैदानमा रहेको स्कोरर बस्ने झ्यालको सिसा फुटेको छ ।

नेपालले १ सय ३७ रनको विजयी लक्ष्य पछ्याउनेक्रममा कुशलले पाँचौं ओभरको अन्तिम बलमा डीप स्क्वायर लेगमा प्रहार गरेको सटले स्कोर बस्ने झ्यालको सिसा फुटेको हो । तीव्र गतिका बलर ब्राड इभान्सले फ्याँलेको लेग साइडको बललाई कुशलले नेपालको इनिङको पहिलो छक्काको रुपमा प्रहार गरेका थिए ।

झ्यालको बाहिरी पट्टीको सिसा फुटेको हुँदा भित्र बसेका स्कोरलाई भने कुनै चोट लागेको थिएन । उक्त कोठा नियमित रुपमा स्कोर बसेपनि यस पटक एन्टि क्रप्शन (एसियु) विर सिंह रहेका थिए । डबल सिसाको कारण चोट लाग्नबाट बच्न सफल भएको इसपिएनक्रिकइन्फोका स्कोर महबुब रेजाले जानकारी दिए ।

जितको लागि १ सय ३७ रनको विजयी पछ्याएको नेपालले १५.५ ओभरमा २ विकेट गुमाउँदै पूरा गर्यो । जितमा ओपनर तथा विकेटकिपर आसिफ शेख ५४ बलमा १३ चौका र १ छक्कासहित ८७ रनमा अविजित रहे । पहिलो विकेटका लागि आसिफ र कुशल भुर्तेलले ९.३ ओभरमा ८८ रनको साझेदारी गर्दै जितको आधार सहज बनाएका थिए ।

कुशल भुर्तेल २६ बलमा २ चौका र २ छक्कासहित ३४ रनमा बोल्ड भए । त्यसअघि टियु मैदानमा टस जितेर ब्याटिङ थालेको जिम्बावे ए ले निर्धारित २० ओभरमा ७ विकेट गुमाउँदै १ सय ३६ रन बनाएको थियो । जिम्बावे ए का रोय कैयाले ४१ बलमा ७ चौकासहित सर्वाधिक ४९ रन बनाए । नेपालका सन्दीप लामिछानेले ४ ओभरमा २५ रन खर्चेर २ विकेट लिए ।

तीन टि२० सिरिजमा नेपाल पहिलो खेलमा ६ विकेटले पराजित भएको थियो । दोस्रो खेल भारी वर्षाको कारण रद्द भएको थियो । टि२० सिरिज १–१ को बराबरीमा सकिएको थियो । अव तीन एकदिवसिय अभ्यास खेल हुनेछ । नेपाल र जिम्बावे ए बीचको पहिलो एकदिवसिय अभ्यास खेल शुक्रबार हुनेछ ।