एजेन्सी – रोयल च्यालेन्जर्स बेंगलोरले इन्डिन प्रिमियर लिग (आइपिएल) २०२२ मा चेन्नई सुपर किंग्सलाई १३ रनले हराएको छ । बेंगलोर छैटौं जितका साथ अंक तालिकामा चौथो स्थानमा उक्लिदै प्ले अफको सम्भावना बलियो बनाएको छ ।

जितको लागि १ सय ७४ रनको विजयी लक्ष्य पछ्याएको चेन्नईले निर्धारित २० ओभरमा ८ विकेट गुमाउँदै १ सय ६० रन बनायो । चेन्नईका ओपनर डेभन कन्वेले ३७ बलमा ६ चौका र २ छक्कासहित सर्वाधिक ५६ रन बनाए । ओपनर ऋतुराज गायकवाड २३ बलमा ३ चौका र १ छक्कासहित २८, रोविन उथप्पा १, अम्बाती रायुडू १० र रविन्द्र जडेजा ३ रनमा आउट भए ।

मोईन अली २७ बलमा २ चौका र २ छक्कासहित ३४ रनमा आउट भए । महेन्द्रसिंह धोनी २, ड्वेन प्रिटोरियस १३ र महेश थिक्सनाले ७ रन बनाए । बेंगलोरका हर्षल पटेलले ४ ओभरमा ३५ रन खर्चेर ३ विकेट लिए । ग्लेन म्याक्सवेलले ४ ओभरमा २२ रन खर्चेर २ विकेट लिए । शहबाज अहमद, जोश हेजलवुड र वानिन्दु हसरंगाले १–१ विकेट लिए ।

त्यसअघि महाराष्ट्र क्रिकेट एसोसियसन पुणेमा टस हारेर ब्याटिङको निम्तो पाएको बेंगलोरले निर्धारित २० ओभरमा ८ विकेट गुमाउँदै १ सय ७३ रन बनायो । बेंगलोरका महिपाल लोमरले २७ बलमा ३ चौका र २ छक्कासहित सर्वाधिक ४२ रन बनाए ।

बेंगलोरलाई ओपनर विराट कोहली र फाफ डु प्लेसिसले पहिलो विकेटका लागि ७.२ ओभरमा ६२ रनको साझेदारी गर्दै राम्रो सुरुवात दिलाएका थिए ।

मोईन अलीको बलमा बोल्ड हुनुअघि कोहलीले ३३ बलमा ३ चौका र १ छक्कासहित ३० रन बनाए । डु प्लेसिसले २२ बलमा ४ चौका र १ छक्कासहित ३८ रन बनाए । ग्लेन म्याक्सवेल ३, साजत पाटिदर २१ र दीनेश कार्तिक २६ रनमा आउट भए । चेन्नईका स्पिनर महेश थिक्सनाले ४ ओभरमा २७ रन खर्चेर ३ विकेट लिए ।

मोईन अलीले ४ ओभरमा २८ रन खर्चेर २ विकेट लिए । ड्वेन प्रिटोरियसको नाममा १ विकेट रह्यो । चेन्नईले आइतबार दिल्ली क्यापिटल्ससँग खेल्नेछ । बेंगलोरले सहि दिन सनराइजर्स हैदराबादविरुद्ध खेल्नेछ ।

अंक तालिका

गुजरात १० खेलमा ८ मा जित र २ मा हारका १६ अंक जोड्दै शीर्ष स्थानमा छ । लखनऊ १० खेलमा ७ मा जित र ३ मा हार सहित १४ अंक जोड्दै दोस्रो स्थानमा छ । राजस्थान रोयल्स १० खेलमा ६ मा जित र ४ मा हार सहित १२ अंकका साथ तेस्रो स्थानमा छ ।

बेंगलोर ११ खेलमा ६ मा जित र ५ मा हार सहित १२ अंकका साथ चौथो स्थानमा छ । हैदराबाद ९ खेलमा ५ मा जित र ४ मा हार सहित पाँचौं स्थानमा छ । पन्जाब १० खेलमा ५ मा जित र ५ मा हार सहित छैटौं स्थानमा छ । दिल्ली ९ खेलमा ४ मा जित र ५ मा हार सहित सातौं स्थानमा छ ।

कोलकाता नाइट राइडर्स १० खेलमा ४ मा जित र ६ खेलमा हार सहित आठौं स्थानमा छ । चेन्नई १० खेलमा ३ मा जित र ७ मा हार सहित नवौं स्थानमा छ । मुम्बई ९ खेलमा १ मा जित र ८ मा हार सहित पुछारमा छ ।