एजेन्सी – दिल्ली क्यापिटल्सले इन्डियन प्रिमियर लिग (आइपिएल) २०२२ मा सनराइजर्स हैदराबादलाई २१ रनले हराएको छ । दिल्लीले पाँचौं जितका साथ अंक तालिकामा पाँचौं स्थानमा उक्लिदै प्लेअफको सम्भावना कायमै राखेको छ ।

जितको लागि २ सय ८ रनको विशाल विजयी लक्ष्य पछ्याएको हैदराबादले निर्धारित २० ओभरमा ८ विकेट गुमाउँदै १ सय ८६ रन बनायो । हैदराबादका विकेटकिपर निकोलस पुरनले ३४ बलमा २ चौका र ६ छक्कासहित सर्वाधिक ६२ रनको इनिङ खेले पनि टोलीको हार टार्न सकेनन् ।
मध्यक्रमका एडेन माक्ररमले २५ बलमा ४ चौका र ३ छक्कासहित ४२ रनमा आउट भए । अन्य ब्याटरले भने राम्रो प्रदर्शन गर्न सकेनन् । ओपनर अभिषेक शर्मा ७ र कप्तान केन विलियम्सन ४ रनमा आउट भए । राहुल त्रिपाठी २२, शशांक सिंह १० र शेन एबोटले ७ रन बनाए ।

दिल्लीका खलिल अहमदले ४ ओभरमा ३० रन खर्चेर ३ विकेट लिए । शार्दुल ठाकुरले २, एनरिच नोर्किया, कुलदीप यादव र मिचेल मार्शले १–१ विकेट लिए ।

त्यसअघि ब्रेबोन स्टेडियम मुम्बईमा टस हारेर ब्याटिङ थालेको दिल्लीले निर्धारित २० ओभरमा ३ विकेट गुमाउँदै २ सय ८ रन बनायो । दिल्लीका डेविड वार्नर ५८ बलमा १२ चौका र ३ छक्कासहित ९२ रनमा अविजित रहे । वार्नरले पूर्व टोली हैदराबाविरुद्ध एक सानदार इनिङ खेलेका थिए ।

रोभम्यान पावेलले ३५ बलमा ३ चौका र ६ छक्कासहित ६७ रनको अविजित आक्रामक इनिङ खेले । चौथो विकेटका लागि पावेल र वार्नरले ६६ बलमा १ सय २२ रनको अविजित साझेदारी गर्दै विशाल योगफलमा पुर्याए ।

ओपनर पृथ्वी शा घाइत हुँदा उनको स्थानमा आएका मन्दीपसिंह भुवनेश्वर कुमारको बलमा शून्यमा क्याच भए । मिचेल मार्श १० र ऋषभ पन्त २६ रनमा आउट भए । पन्तले १६ बलमा १ चौका र ३ छक्का प्रहार गरे । हैदराबादका भुवनेश्वर कुमार, शेन एबोट र श्रेयस गोपालले १–१ विकेट लिए ।

यो जितसँगै दिल्लीको प्लेअफ सम्भावना कायमै राखेको छ । बाँकी चार मध्य कम्तिमा तीन खेलमा जित निकाल्न सके १६ अंकका साथ प्ले अफमा पुग्नेछ । दिल्ली अव आइतबार चेन्नई सुपर किंग्स, बुधबार राजस्थान रोयल्स, १६ मे मा पन्जाब किंग्स र २१ मे मा मुम्बईसँग खेल्नेछ ।

हैदराबादले प्लेअफमा पुग्न बाँकी चार मध्य कम्तिमा तीन खेलमा जित निकाल्नु पर्छ । आइतबार रोयल च्यालेन्जर्स बेंगलोर, १४ मे मा कोलकाता नाइट राइडर्स, १७ मे मा मुम्बई इन्डियन्स र २२ मे मा पन्जाबसँग खेल्नेछ ।

यस सिजनमा मुम्बई र चेन्नईको प्लेअफ सम्भावना अनौपचारिक रुपमा सकिएको छ । गुजरातको प्लेअफ सम्भावना पक्का जस्तै हुँदा अन्य टोली दौडमा छन् ।

अंक तालिका

गुजरात १० खेलमा ८ मा जित र २ मा हारका १६ अंक जोड्दै शीर्ष स्थानमा छ । लखनऊ १० खेलमा ७ मा जित र ३ मा हार सहित १४ अंक जोड्दै दोस्रो स्थानमा छ । राजस्थान रोयल्स १० खेलमा ६ मा जित र ४ मा हार सहित १२ अंकका साथ तेस्रो स्थानमा छ ।

बेंगलोर ११ खेलमा ६ मा जित र ५ मा हार सहित १२ अंकका साथ चौथो स्थानमा छ । दिल्ली १० खेलमा ५ मा जित र ५ मा हार सहित पाँचौं स्थानमा छ । हैदराबाद १० खेलमा ५ मा जित र ५ मा हार सहित छैटौं स्थानमा छ । पन्जाब १० खेलमा ५ मा जित र ५ मा हार सातौं सहित स्थानमा छ ।

कोलकाता नाइट राइडर्स १० खेलमा ४ मा जित र ६ खेलमा हार सहित आठौं स्थानमा छ । चेन्नई १० खेलमा ३ मा जित र ७ मा हार सहित नवौं स्थानमा छ । मुम्बई ९ खेलमा १ मा जित र ८ मा हार सहित पुछारमा छ ।