काठमाडौं(हाम्रो खेलकुद) – नेपालले जिम्बावे ए सँग आज पहिलो एकदिवसिय अभ्यास खेल खेल्दैछ । खेल नेपाली समय अनुसार बिहान ९ ः ३० मा टियु मैदानमा सुरु हुनेछ ।

दुबै टोली जितका साथ सिरिजमा १–० को अग्रता लिन चाहन्छन् । तीन टि२० अभ्यास खेल १–१ को बराबरीमा सकिएको थियो । नेपाल पहिलो खेलमा ६ विकेटले पराजित हुँदा, दोस्रो खेल वर्षाको कारण रद्द र तेस्रो खेलमा ८ विकेटको जित निकाल्दै सिरिज बराबरी गरेको थियो ।

नेपालले एकदिवसियको लागि फरक टोली घोषणा गरेको छ । आजको खेलमा ओपनर आसिफ शेख र सुनिल धमला मैदान उत्रने सम्भावना छ । पछिल्लो खेलमा आसिफले ८७ रनको अविजित इनिङ खेलेका थिए । धमला ५० ओभरका खेलाडी मानिन्छन् ।

तेस्रो नम्बरमा देव खनाल, चौथो नम्बरमा रोहित कुमार पौडेल र पाँचौं नम्बरमा दीपेन्द्रसिंह ऐरी हुनेछन् । नेपालका प्रमुख ब्याटर दीपेन्द्र र रोहितको उच्च प्रदर्शन विना जित पनि कठिन देखिन्छ । विकेटकिपरमा विनोद भण्डारी र आरिफ शेख तल्लोक्रम सम्हाल्ने छन् । तीव्र गतिका बलरमा करण केसी र सोमपाल कामी हुनेछन् ।

तेस्रो बलरको रुपमा आरिफ हुनेछन् । स्पिनरमा सन्दीप लामिछाने र सागर ढकालको सम्भावना छ । दीपेन्द्र पार्टटाइम स्पिनर हुनेछन् । यता जिम्बावे ए का ओपनर तडिवाशाने मरुमानी र कप्तान टोनी मन्योंगा राम्रो लयमा छन् । टोली आक्रामक इनिङ खेल्दै आएका छन् । इनोसेन्ट कैया र रोय कैया पनि राम्रो ब्याटिङ गर्ने गर्दछन् ।

तीव्र गतिका बलर ल्यूक जोंगवे र न्याउची भिक्टर प्रमुख तीव्र गतिका बलिङ हतियार हुन् । तेस्रो तीव्र गतिको बलर भने कमजोरीको रुपमा छ ।

वर्षाको चिन्ता

यस सिरिज सुरु भएदेखिनै दुबै टोलीलाई वर्षाको चिन्ता बढी छ । दोस्रो खेल वर्षाको कारण रद्द नै भएको थियो । एकदिवसिय सिरिज पछि गर्नु परेको थियो । काठमाडौंमा शुक्रबार विहान सामान्य वर्षा भएको छ । विहानको समयमा ९८ प्रतिशत वर्षाको सम्भावना छ । दिउँसो पनि ४९ प्रतिशत वर्षा हुने सम्भावना छ । त्यसैले दुबै टोलीलाई वर्षाको चिन्ता रहेको छ ।