एजेन्सी – तीव्र गतिका बलर ड्यानियल साम्स नायक बन्दा मुम्बई इन्डियन्सले इन्डियन प्रिमियर लिग (आइपिएल) २०२२ मा गुजरात टाइटन्समाथि पाँच रनको नाटकीय जित हात पारेको छ ।

जितको लागि १ सय ७८ रनको विजयी लक्ष्य पछ्याएको गुजरातले २० ओभरमा ५ विकेट गुमाउँदै १ सय ७२ रन बनायो । गुजरातलाई जितको लागि अन्तिम ६ बलमा ९ रन चाहिँएको थियो । तीव्र गतिका बलर ड्यानियल साम्स हिरो बन्दै तीन रन मात्र खर्चेपछि मुम्बईले नाटकीय जित हात पारेको हो ।

साम्सले डेविड मिलरले पहिलो बलमा एक रन दिए । दोस्रो बल राहुल टेवाटियालाई डट राखे । तेस्रो बलमा राहुल टेवाटिया दुई रन लिनेक्रममा रन आउट भएपछि खेल थप रोचक बनेको थियो । चौथो बलमा राशिद खानले पनि एक रन बटुले । बाँकी दुई बलमा ६ रन चाहिँएको थियो । पाँचौं बल डट राखेपछि मुम्बईतर्फ नतिजा मोडिएको थियो । अन्तिम बलमा डटका साथ मुम्बईलाई नाटकीय जित दिलाएका थिए ।

गुजरातका ओपनर ऋद्धिमान शाहले ४० बलमा ६ चौका र २ छक्कासहित सर्वाधिक ५५ रन बनाए । अर्का ओपनर शुभमन गिलले ३६ बलमा ६ चौका र २ छक्कासहित ५२ रनमा आउट भए ।

पहिलो विकेटका लागि गिल र शाहले १२.१ ओभरमा १ सय ६ रनको शतकीय साझेदारी गर्दै उत्कृष्ट सुरुवात दिलाएका थिए । हार्दिक पान्ड्या २४ र शाई सुदर्शन १४ रनमा आउट भए । हार्दिक रन आउट भएका थिए । मिलर १४ बलमा १ चौका र १ छक्कासहित १९ रनमा अविजित रहे ।

ब्याटिङमा सानदार सुरुवात गरेपनि अन्तिम समयमा चुक्दा नाटकीय हार बेहोरेको हो । मुम्बईका स्पिनर मुरुगन आश्विनले ४ ओभरमा २९ रन खर्चेर २ विकेट लिए । काइरन पोलार्डको नाममा १ विकेट रह्यो । ड्यानियल साम्सले ३ ओभरमा १८ रन खर्चे ।

त्यसअघि ब्रेबोन स्टेडियममा टस हारेर ब्याटिङको निम्तो पाएको मुम्बईले निर्धारित २० ओभरमा ६ विकेट गुमाउँदै १ सय ७७ रन बनायो । मुम्बईका टिम डेविड २१ बलमा २ चौका र ४ छक्कासहित ४४ रनमा अविजित रहे ।

ईशान किशनले २९ बलमा ५ चौका र १ छक्कासहित सर्वाधिक ४५ रन बनाए । कप्तान रोहित शर्माले २८ बलमा ५ चौका र २ छक्कासहित ४३ रनमा आउट भए ।

ओपनर ईशान र रोहितले पहिलो विकेटका लागि ७.३ ओभरमा ७४ रनको साझेदारी गर्दै उत्कृष्ट सुरुवात दिलाएका थिए । राशिद खानको बलमा रोहित एलबीडब्लू आउट भए । सूर्यकुमार यादव १३ रनमा आउट भए । ईशान किशन अल्जारी जोशेफको १२ औं ओभरको अन्तिम बलमा मिडविकेटमा राशिदबाट क्याच हुन पुगेका थिए ।

१४ बल खेलेका फिनिसर काइरन पोलार्ड राशिदको बलमा बोल्ड भए । तिलक बर्मा १६ बलमा २ चौकासहित २१ रनमा आउट भए । गुजरातका स्पिनर राशिद खानले ४ ओभरमा २४ रन खर्चेर २ विकेट लिए । अल्जारी जोशेफ र प्रदीप सांगवानले १–१ विकेट लिए ।

अंक तालिका

गुजरात ११ खेलमा ८ मा जित र ३ मा हारका १६ अंक जोड्दै शीर्ष स्थानमा छ । लखनऊ १० खेलमा ७ मा जित र ३ मा हार सहित १४ अंक जोड्दै दोस्रो स्थानमा छ । राजस्थान रोयल्स १० खेलमा ६ मा जित र ४ मा हार सहित १२ अंकका साथ तेस्रो स्थानमा छ ।

बेंगलोर ११ खेलमा ६ मा जित र ५ मा हार सहित १२ अंकका साथ चौथो स्थानमा छ । दिल्ली १० खेलमा ५ मा जित र ५ मा हार सहित पाँचौं स्थानमा छ । हैदराबाद १० खेलमा ५ मा जित र ५ मा हार सहित छैटौं स्थानमा छ । पन्जाब १० खेलमा ५ मा जित र ५ मा हार सातौं सहित स्थानमा छ ।

कोलकाता नाइट राइडर्स १० खेलमा ४ मा जित र ६ खेलमा हार सहित आठौं स्थानमा छ । चेन्नई १० खेलमा ३ मा जित र ७ मा हार सहित नवौं स्थानमा छ । मुम्बई १० खेलमा २ मा जित र ८ मा हार सहित पुछारमा छ ।