काठमाडौं (हाम्रो खेलकुद) – नेपाली महिला राष्ट्रिय क्रिकेट टोलीले अफ्रिकी राष्ट्र युगान्डाविरुद्ध ५ खेलको टि२० अन्तर्राष्ट्रिय सिरिज आजबाट खेल्दैछ । नेपाल क्रिकेट संघ (क्यान) ले महिला टोलीको पहिलो अन्तर्राष्ट्रिय घरेलु सिरिजका लागि प्रवेश निशुल्क गरेको छ । खेल दिउँसो १ बजेदेखि कीर्तिपुरस्थित टियु क्रिकेट मैदानमा हुनेछ ।

नेपाली टोलीले सिरिजका लागि १६ सदस्यीय अन्तिम टोलीको घोषणा गरिसकेको छ । यसपटक टोलीमा दुई नयाँ अनुहार समावेश हुँदा अनुभवी स्पिनर करुणा भण्डारी भने टोलीमा रहने छैनन् । उनको स्थानमा यू-१९ टोलीको बन्द प्रशिक्षणमा रहेकी लेग स्पिनर हिरान्यमाये रोयलाई पहिलो पटकमै अन्तिम टोलीमा समावेश गरिएको छ । त्यस्तै यसअघि बन्द प्रशिक्षणमा रहँदै आएकी बलर अस्मिना कर्माचार्य पनि अन्तिम टोलीमा परेकी छिन् ।

प्रशिक्षक जगत टमाटाले महिला टोलीका लागि यस्ता सिरिजले राम्रो अनुभव हुने अभियक्ति दिएका छन् । उनले नेपालले विश्वकप छनोटमा राम्रो नतिजा निकाल्ने हो भने अन्य देशसँग नियमित अन्तर्राष्ट्रिय खेल खेल्नुपर्ने बताए । उनले क्यानलाई पहिलो पटक सिरिज आयोजना गरेकोमा पनि धन्यवाद दिए ।

नेपाल र युगान्डा एकै स्तरको टोली भएको पनि उनले बताए । ‘युगान्डाको वरीयता र हाम्रो खासै फरक छैन । धेरै खेल त हेर्न पाएका छैनौँ, तर प्रतिस्पर्धाका लागि तयार छौं । टोलीमा युवा र अनुभवी खेलाडीको मिश्रण छ,’ उनले भने ।

क्यानले सिरिजअघि केहि निर्णय पनि गरेको छ । उपकप्तानको जिम्मेवारी ब्याटर इन्दु वर्मालाई सुम्पिएको छ । त्यस्तै केन्द्रीय सम्झौतामा रहेका खेलाडीको रकम पनि बढेको क्यानले जनाएको छ । क्यानले महिला टोलीलाई प्राथमिकतामा राख्ने बताउँदै यू-१९ को राष्ट्रिय प्रतियोगिता पनि सम्पन्न गरेको थियो । उक्त प्रतियोगिताबाट खेलाडी छनोट गरेर यू-१९ विश्वकप छनोटका लागि पनि तयारी भइरहेको छ ।

नेपालले घरेलु मैदानमा पहिलो पटक सिरिज खेल्न लागेको हो । यसअघि सन् २०१९ मा महिला टोलीले पोखरामा दक्षिण एसियाली खेलकुद भने खेलेको थियो । नेपाल सागमा तेस्रो भएको थियो । टियु मैदानमा महिला टोली उत्रँदा समर्थकको साथ रहने उपकप्तान इन्दु वर्माले अपेक्षा गरेकी छिन् । उनले युगान्डाको सामना गर्न टोली तयार रहेको बताएकी छिन् ।