एजेन्सी – सनराइजर्स हैदराबादले इन्डियन प्रिमियर लिग (आइपिएल) २०२२ मा मुम्बई इन्डियन्समाथि तीन रनको रोमान्चक जित हात पारेको छ । योसँगै हैदराबादले प्लेअफको अंक गणीतिय झिनो आशा कायमै राखेको छ ।
जितको लागि १ सय ९४ रनको विजयी लक्ष्य पछ्याएको मुम्बईले निर्धारित २० ओभरमा ७ विकेट गुमाउँदै १ सय ९० रन बनायो । मुम्बईलाई जितको लागि अन्तिम १२ बलमा १९ रन चाहिँएको थियो । तीव्र गतिका बलर भुवनेश्वर कुमारले १९ औं ओभर मेडन फ्याँलेपछि जित कठिन बनेको थियो ।
त्यसअघिको १८ औं ओभरमा टिम डेविडले टि नटराजनलाई चार छक्का प्रहार गर्दै जित नजिक पुर्याएका थिए । तर अन्तिम बलमा डेविड रन आउट हुनु मुम्बईको हारको अर्को टनिङ प्वाइन्ट बन्यो ।
मुम्बईलाई ओपनर रोहित शर्मा र ईशान किशनले पहिलो विकेटका लागि १०.४ ओभरमा ९५ रनको साझेदारी गर्दै राम्रो सुरुवात दिलाएका थिए । रोहित ३६ बलमा २ चौका र ४ छक्कासहित ४८ रनमा आउट भए । किशन ३४ बलमा ५ चौका र १ छक्कासहित ४३ रनमा आउट भए । टिम डेविडले १८ बलमा ३ चौका र ४ छक्कासहित ४६ रन जोडेका थिए ।
ड्यानियल साम्स १५ र रमनदीप सिंहले १४ रन जोडे । हैदराबादका उमरान मलिकले ३ ओभरमा २३ रन खर्चेर ३ विकेट लिए । भुवनेश्वर कुमार र वासिन्टन सुन्दरले १–१ विकेट लिए ।
त्यसअघि वानखडे स्टेडियम मुम्बईमा टस हारेर ब्याटिङको निम्तो पाएको हैदराबादले निर्धारित २० ओभरमा ६ विकेट गुमाउँदै १ सय ९३ रन बनायो । हैदराबादका राहुल त्रिपाठीले ४४ बलमा ९ चौका र ३ छक्कासहित सर्वाधिक ७६ रन बनाए । निकोलस पुरन २२ बलमा २ चौका र ३ छक्कासहित ३८ रनमा आउट भए ।
तेस्रो विकेटका लागि पुरन र त्रिपाठीले ४२ बलमा ७६ रनको साझेदारी गरेका थिए । ओपनर अभिषेक शर्मा ड्यानियल साम्सको बलमा ९ रनमा मयंक मारकान्डेबाट क्याच भए । तर दोस्रो विकेटका लागि प्रियम गर्ग र राहुल त्रिपाठीले दोस्रो विकेटका लागि ४३ बलमा ७८ रनको साझेदारी गर्दै उत्कृष्ट सुरुवात दिलाए ।
यस सिजनको पहिलो खेल खेलेका गर्ग २६ बलमा ४ चौका र २ छक्कासहित ४२ रनमा कट एण्ड बोल्ड आउट भए । गर्ग रमनदीप सिंहको बलमा आउट भए । एडेन माक्ररम २, केन विलियम्सन ८ र वासिन्टन सुन्दरले ९ रन बनाए ।
मुम्बईका रमनदीप सिंहले ३ ओभरमा २० रन खर्चेर ३ विकेट लिए । ड्यानियल साम्स, राइली मेरीडिथ र जस्प्रित बुमराहले १–१ विकेट लिए । मुम्बईले अन्तिम खेल २१ मे मा दिल्ली क्यापिटल्ससँग खेल्नेछ । उक्त खेलमा मुम्बई विजयी हुँदा रोयल च्यालेन्जर्स बेंगलोर, पन्जाब किंग्स, कोलकाता नाइट राइडर्स र हैदराबादलाई फाइदा पुग्नेछ ।
दिल्ली विजयी हुँदा भने यी चारै टोली बाहिरिनेछन् । हैदराबादले अन्तिम खेल २२ मे मा पन्जाबसँग खेल्नेछ । उक्त खेलमा फराकिलो अन्तरको साथै दिल्ली र बेंगलोर अन्तिम खेलमा पराजित हुँदा नेटरनरेटमा झिनो आशा बाँकी छ ।
अंक तालिका
गुजरात १३ खेलमा १० मा जित र ३ मा हारका २० अंक जोड्दै शीर्ष स्थानमम छ । राजस्थान रोयल्स १३ खेलमा ८ मा जित र ५ मा हार सहित १६ अंकका साथ दोस्रो स्थानमा छ । लखनऊ १३ खेलमा ८ मा जित र ५ मा हार सहित १६ अंकका साथ तेस्रो स्थानमा छ ।
दिल्ली १३ खेलमा ७ मा जित र ६ मा हार सहित १४ अंक जोड्दै चौथो स्थानमा उक्लिएको छ । बेंगलोर १३ खेलमा ७ मा जित र ६ मा हार सहित १४ अंकका साथ पाँचौं स्थानमा छ । कोलकाता नाइट राइडर्स १३ खेलमा ६ मा जित र ७ खेलमा हार सहित छैटौं स्थानमा छ ।
पन्जाब १३ खेलमा ७ मा जित र ६ मा हार बेहोर्दै १२ अंक जोड्दै साथ सातौं स्थानमा छ । हैदराबाद १३ खेलमा ६ मा जित र ७ मा हार सहित आठौं स्थानमा छ । चेन्नई १३ खेलमा ४ मा जित र ९ मा हार सहित नवौं स्थानमा छ । मुम्बई १३ खेलमा ३ मा जित र १० मा हार सहित पुछारमा छ ।
