एजेन्सी – लखनऊ सुपर जायन्ट्सले इन्डियन प्रिमियर लिग (आइपिएल) २०२२ मा कोलकाता नाइट राइडर्सलाई दुई रनले हराउँदै प्ले अफमा पुगेको छ । योसँगै प्लेअफमा स्थान बनाउने लखनऊ दोस्रो टोली बन्दा कोलकाता बाहिरिने तेस्रो टोली बनेको छ ।

जितको लागि २ सय ११ रनको विशाल विजयी लक्ष्य पछ्याएको कोलकाताले २० ओभरमा ८ विकेट गुमाउँदै २ सय ८ रन बनायो । कोलकातालाई जितको लागि अन्तिम ६ बलमा २१ रन चाहिँएको थियो । रिन्कु सिंहले मार्कस स्टोइनिसलाई पहिलो बलमा चौका, दोस्रो र तेस्रो बलमा छक्का प्रहार गर्दै अप्रत्याशित जित नजिक पुर्याएका थिए ।

चौथो बलमा दुई रन बटुले । दुई बलमा तीन रन चाहिँएको अवस्थामा स्टोइनिसले रिन्कुलाई इविन लेविस र अन्तिम बलमा उमेश यादवलाई बोल्ड गर्दै रोमान्चक जित दिलाए । रिन्कु सिंह १५ बलमा २ चौका र ४ छक्कासहित ४० रनमा आउट भए ।

कोलकाताका कप्तान श्रेयस ऐरले २९ बलमा ४ चौका र ३ छक्कासहित सर्वाधिक ५० रन बनाए । साम विलिंग्स २४ बलमा २ चौका र ३ छक्कासहित ३६ रनमा आउट भए । सुनिल नारायण ७ बलमा ३ छक्कासहित २१ रनमा अविजित रहे ।

तीव्र गतिका बलर मोहसिन खानले ओपनर वेंकटेश ऐरलाई शून्य र अभिजित तोमरलाई ४ रनमा आउट गरेका थिए । नितिश राणा २२ बलमा ९ चौकासहित ४२ रनमा आउट भए ।

लखनऊका मोहसिन खानले ४ ओभरमा २० रन खर्चेर ३ विकेट लिए । मार्कस स्टोइनिसले २ ओभरमा २३ रन खर्चेर ३ विकेट लिए ।

त्यसअघि डिवाई पाटिल स्पोर्ट्स एकेडेमी मुम्बईमा टस जितेर पहिला ब्याटिङ थालेको लखनऊले निर्धारित २० ओभरमा कुनै विकेट नगुमाई २ सय १० रन बनाएको थियो । लखनऊका विकेटकिपर तथा ओपनर डि कक ७० बलमा १० चौका र १० छक्कासहित सर्वाधिक १ सय ४० रनमा अविजित रहे ।

डि ककले ५९ बलमा आइपिएल करिअरको दोस्रो शतक प्रहार गरे । डि ककले आन्द्रे रसेललाई १८ औं ओभरको चौथो बलमा थर्डम्यानमा चौका प्रहार गर्दै शतक प्रहार गरेका थिए ।

डि ककले यसअघि २०१६ मा तत्कालिन दिल्ली डेयर डेभिल्सबाट रोयल च्यालेन्जर्स बेंगलोरविरुद्ध १ सय ८ रनको शतकीय इनिङ खेलेका थिए । डि ककले तेस्रो ओभरको दोस्रो बलमा अभिजित तोमरले ब्यक्तिगत १२ रनमा क्याच छोड्दा जीवनदान पाएका थिए । कप्तान लोकेश राहुल ५१ बलमा ३ चौका र ४ छक्कासहित ६८ रनमा अविजित रहे ।

यस सिजनमा कोलकाता, चेन्नई सुपर किंग्स र मुम्बई प्लेअफ दौडबाट बाहिरिएका छन् । गुजरात शीर्षस्थानमा रहँदै क्वालिफायर खेल्ने पक्का भएको छ ।

राजस्थानले शुक्रबार चेन्नई सुपर किंग्सलाई पराजित गरेमा दोस्रो स्थानमा रहँदै क्वालिफायर खेल्नेछ । पराजित भएमा लखनऊ दोस्रो स्थानमा रहनेछ । राजस्थान पराजित भएपनि अन्तिम चारमा रहँदै प्लेअफ खेल्ने सम्भावना बलियो छ ।

अव रोयल च्यालेन्जर्स बेंगलोर र दिल्ली मध्य एक टोली प्लेअफमा पुग्नेछन् । बेंगलोरले बिहीबार गुजरातसँग खेल्नेछ । बेंगलोरलाई प्लेअफमा पुग्न फराकिलो जितको आवश्यक पर्दछ । अन्तिम खेलमा दिल्लीले शनिबार मुम्बईलाई हराएमा भने बेंगलोर जितका बाबजुद बाहिरिनेछ ।

यदि दिल्ली र बेंगलोर दुबै पराजित भएमा पन्जाब किंग्स र सनराइजर्स हैदराबादको पनि सम्भावना बाँकी रहनेछ । अन्तिम खेलमा दिल्ली विजयी हुँदा भने बेंगलोर, हैदराबाद र पन्जाब बाहिरिने समीकरण छ ।

अंक तालिका

गुजरात १३ खेलमा १० मा जित र ३ मा हारका २० अंक जोड्दै शीर्ष स्थानमम छ । लखनऊ १४ खेलमा ९ मा जित र ५ मा हार सहित १८ अंकका साथ दोस्रो स्थानमा छ । राजस्थान रोयल्स १३ खेलमा ८ मा जित र ५ मा हार सहित १६ अंकका साथ तेस्रो स्थानमा छ ।

दिल्ली १३ खेलमा ७ मा जित र ६ मा हार सहित १४ अंक जोड्दै चौथो स्थानमा छ । बेंगलोर १३ खेलमा ७ मा जित र ६ मा हार सहित १४ अंकका साथ पाँचौं स्थानमा छ । कोलकाता नाइट राइडर्स १३ खेलमा ६ मा जित र ८ खेलमा हार सहित छैटौं स्थानमा रहँदै बाहिरिएको छ ।

पन्जाब १३ खेलमा ७ मा जित र ६ मा हार बेहोर्दै १२ अंक जोड्दै साथ सातौं स्थानमा छ । हैदराबाद १३ खेलमा ६ मा जित र ७ मा हार सहित आठौं स्थानमा छ । चेन्नई १३ खेलमा ४ मा जित र ९ मा हार सहित नवौं स्थानमा छ । मुम्बई १३ खेलमा ३ मा जित र १० मा हार सहित पुछारमा छ ।