एजेन्सी – कप्तान हार्दिक पान्ड्याको अर्धशतकमा गुजरात टाइटन्सले इन्डियन प्रिमियर लिग (आइपिएल) २०२२ को ६७ औं खेलमा रोयल च्यालेन्जर्स बेंगलोरलाई १ सय ६९ रनको मध्यम लक्ष्य दिएको छ ।

वानखडे स्टेडियम मुम्बईमा टस जितेर पहिला ब्याटिङ रोजेको गुजरातले निर्धारित २० ओभरमा ५ विकेट गुमाउँदै १ सय ६८ रन बनायो । गुजरातका कप्तान हार्दिक पान्ड्या ४७ बलमा ४ चौका र ३ छक्कासहित सर्वाधिक ६२ रनमा अविजित रहे ।

डेविड मिलर २५ बलमा ३ छक्कासहित ३४ रनमा आउट भए । ओपनर ऋद्धिमान शाह २२ बलमा ४ चौका र १ छक्का सहित ३१ रनमा आउट भए । शुभमन गिल १, म्याथ्यू वेड १६ र राहुल टेवाटिया २ रनमा आउट भए । राशिद खान ६ बलमा २ छक्कासहित १९ रनमा अविजित रहे ।

बेंगलोरका जोश हेजलवुडले ४ ओभरमा ३९ रन खर्चेर २ विकेट लिए । ग्लेन म्याक्सवेल र वानिन्दु हसरंगाले १–१ विकेट लिए । बेंगलोरलाई प्लेअफमा पुग्ने समिकरण कायमै राख्न यस खेलमा विशाल जित हात पार्नुपर्ने हुन्छ । तर जितले मात्र प्लेअफमा पुग्दैन ।

दिल्ली क्यापिटल्स शनिबार मुम्बई इन्डियन्ससँग पराजित हुनुपर्छ । दिल्ली विजयी हुँदा बेंगलोर यदि आजको खेलमा जित निकाले पनि नेटरनरेटको कारण बाहिरिने उच्च सम्भावना छ । गुजरात भने शीर्ष स्थानमा रहँदै क्वालिफायर खेल्ने पक्का भएको छ ।