काठमाडौं (हाम्रो खेलकुद) – नेपाली महिला क्रिकेट टोलीकी युवा लेगस्पिनर हिरान्माये रोयले डेब्यू खेलमै प्लेयर अफ द म्याच प्रदर्शन गरेकी छिन् । नेपालले शुक्रबार युगान्डालाई चौथो खेलमा १५ रनले हराउँदा हिरान्मायले दुई विकेट लिँदै प्लेयर अफ द म्याच चुनिएकी हुन् ।
नेपालले प्रस्तुत गरेको ९८ रनको मध्यम विजयी लक्ष्य पछ्याएको युगान्डाले निर्धारित १८ ओभरमा ८ विकेट गुमाउँदै ८२ रन बनायो । १५ वर्षीय हिरान्मायेले युगान्डाबाट सर्वाधिक २१ रन बनाएकी जेनेत म्बावाजीलाई बोल्ड गर्दै डेब्यू विकेट हात पारेकी थिइन् ।
लेगस्पिनर समेत रहेकी उनले युगान्डाकी कप्तान कोन्सी एविकोलाई शून्यमा बोल्ड गरिन् । उनले ३ ओभरमा ११ रन खर्चेर २ विकेट लिँदै डेब्यूलाई सानदार र यादगार बनाइन् । त्यसअघि टियु क्रिकेट मैदानमा टस जितेर पहिला ब्याटिङ थालेको नेपाल १७.५ ओभरमा ९७ रनमा अल आउट भएको थियो । नेपालको लागि ओपनर ज्योति पाण्डेले सर्वाधिक १७ रन बनाइन् ।
नेपालले सुरुवाती तीन खेल भने क्रमश : १२ रन, १ विकेट र ६ विकेटले गुमाएको थियो । दुई खेल अगावै सिरिज गुमाएपछि नेपालले संगीता राईको स्थानमा उनलाई डेब्यू दिने निर्णय गरेको थियो । उनलाई प्रमुख अलराउन्डर सीता रानामगरले नेपालको लागि २४ औं महिला टि२० आई क्याप दिएकी थिइन् ।
प्रदेश १ बाट यू-१९ राष्ट्रिय प्रतियोगितामा सानदार प्रदर्शन गरेपछि उनी यू१९ एसिया कप छनोटको लागि नेपाली टोलीमा परेकी थिइन् । यू-१९ बन्द प्रशिक्षणमा राम्रो प्रभाव छाडेपछि नेपालले उनलाई सिनियर टोलीमा मौका दिएको थियो ।
हिरान्मायेले प्रदेश १ बाट यस सिजनको ललितपुर वुमन्स महिला टि२० च्याम्पियनसिप समेत खेलेकी थिइन् । जसमा एपिएफकी कप्तान सीता राना मगरलाई बोल्ड र लुम्बिनी प्रदेशकी लक्ष्मी चौधरीलाई स्टम्पिङ आउट गराउन सफल भएकी थिइन् ।
युगान्डामाथि नेपालको पहिलो जित
