काठमाडौं(हाम्रो खेलकुद) – भारतीय क्रिकेट टोलीका सर्वाधिक सफल कप्तान महेन्द्रसिंह धोनीले इन्डियन प्रिमियर लिग (आइपिएल) २०२३ खेल्ने पक्का भएको छ । चेन्नई सुपर किंग्सका कप्तान धोनीले यस सिजनको अन्तिम खेलमा राजस्थान रोयल्सविरुद्ध खेलकोक्रममा टसको समयमा आफूले अर्को सिजन खेल्ने पुष्टि गरेका छन् ।

साविक विजेता तथा चार पटकको च्याम्पियन चेन्नई यस सिजनमा प्लेअफबाट बाहिरि सकेको छ । धोनीले यस सिजनको सुरुवाती समय भने कप्तानी रविन्द्र जडेजालाई हस्तान्तरण गरेका थिए । बढ्दो उमेरको कारण धोनीले यस सिजनपछि आइपिएल नखेल्ने अनुमान गरिएको थियो ।

जडेजाको कप्तानीमा चेन्नई ८ खेलमध्य ६ खेलमा पराजित भएपछि धोनी कप्तानमा फर्किएका थिए । धोनीले २००८ देखिनै चेन्नईको कप्तानी गर्दै आएका छन् । धोनी उमेरले ४० वर्षका भएपनि मैदानमा भने आफ्नो फिनिसर छविलाई निरन्तरता दिँदै आएका छन् ।

यस सिजनमा धोनीले १३ खेलमा १ अर्धशतकसहित २ सय ६ रन बनाएका छन् । धोनी भारतमात्र नभएर विश्वका एक उत्कृष्ट कप्तान, विकेटकिपर र फिनिसर हुन् । धोनीको कप्तानीमा चेन्नईले सन् २०१०, २०११, २०१८ र २०२१ को उपाधि जितेको थियो । २००८, २०१२, २०१३, २०१५ र २०१९ मा उप विजेता बनेको थियो ।

धोनीको कप्तानीमा चेन्नई २०२० मा पहिलो पटक लिगबाट बाहिरिएको थियो । अन्य सबै सिजनमा चेन्नई प्लेअफमा पुगेको थियो । चेन्नई इतिहासमा दोस्रो पटक २०२० र २०२२ मा प्ले अफमा पुग्न नसकि बाहिरिएको हो ।