एजेन्सी – राजस्थान रोयल्सले इन्डियन प्रिमियर लिग (आइपिएल) २०२२ मा चेन्नई सुपर किंग्सलाई ५ विकेटले हराउँदै क्वालिफायरमा पुगेको छ । राजस्थान आफ्नो लिगको अन्तिम खेलमा जितका साथ नेटरनरेटमा लखनऊ सुपर जायन्ट्सलाई पछि पार्दै क्वालिफायर खेल्ने अवसर पाएको हो ।

जितको लागि १ सय ५१ रनको विजयी लक्ष्य पछ्याएको राजस्थानले १९.४ ओभरमा ५ विकेट गुमाउँदै पूरा गर्यो । राजस्थानको जितमा युवा ओपनर यशस्वी जैसवालले ४४ बलमा ८ चौका र १ छक्कासहित सर्वाधिक ५९ रनको योगदान दिए ।

रविचन्द्रन आश्विन २३ बलमा २ चौका र ३ छक्कासहित ४० रनमा अविजित रहे । रियान पराग १० बलमा १ चौकासहित १० रन अविजित रहे । ओपनर जस बटलर २, सन्जु स्यामसन १५, देवदत्त पाडिक्कल ३ र शिम्रन हेटमायर ६ रनमा आउट भए ।

चेन्नईका प्रशान्त सोलन्कीले २ ओभरमा २० रन खर्चेर २ विकेट लिए । मोईन अली, मिचेल सान्टनार र सिमरजित सिंहले १-१ विकेट लिए ।

ब्रेबोन स्टेडियम मुम्बईमा टस जितेर ब्याटिङ रोजेको चेन्नईले निर्धारित २० ओभरमा ६ विकेट १ सय ५० रन बनायो । चेन्नईका मोईन अली ५७ बलमा १३ चौका र ३ छक्कासहित ९३ रनमा आउट भए । अलीले १९ बलमै अर्धशतक पूरा गरेका थिए ।जसक्रममा उनले छैटौं ओभरमा टे«न्ट बोल्टलाई एकै ओभरमा एक छक्का र पाँच चौकासहित कुल २६ रन जोडेका थिए । तर बाँकी ४३ रन जोड्न ३८ बल खेले ।

चेन्नईले सुरुवाती ७ ओभरमा १ विकेट गुमाउँदै ८३ रन बनाएको थियो । तर त्यसपछि राजस्थानले सानदार पूनरागमन गर्यो । विष्फोटक सुरुपात गरेको चेन्नईले अन्तिम १३ ओभर अर्थात ७८ बलमा ५ विकेट गुमाउँदै मात्र ६७ रन बनायो ।

सातौं ओभरको चौथो बलपछि चेन्नईले बाउन्ड्रीको रुपमा १५ औं ओभरको दोस्रो बलमा चौका प्रहार गरेको थियो । चेन्नईका ऋतुराज गायकवाड २, डेभन कन्वे १६, नारायण जगदीशन १ र अम्बाती रायुडू ३ रनमा आउट भए । महेन्द्रसिंह धोनीले २८ बलमा १ चौका र १ छक्कासहित २६ रन बनाए ।

राजस्थानका युजभेन्द्र चहलले ४ ओभरमा २६ रन खर्चेर २ विकेट लिए । ओबेद म्याकोयले ४ ओभरमा २० रन खर्चेर २ विकेट लिए । ट्रेन्ट बोल्ट र रविचन्द्रन आश्विनले १–१ विकेट लिए ।

क्वालिफायरमा शीर्षस्थानको गुजरात टाइटन्स र दोस्रो राजस्थान रोयल्सबीच प्रतिस्पर्धा हुनेछ । पहिलो क्वालिफायर २४ मे मा हुनेछ । क्वालिफायरको विजेता सिधैं फाइनलमा पुग्नेछ । एलिमिनेटरमा तेस्रो स्थानको लखनऊ सुपर जाउन्ट्स र चौथो स्थानको टोली भिड्ने छन् ।

राजस्थान र लखनऊको समान १८ अंक भएपनि नेटरनरेटमा माथि रहँदै राजस्थान दोस्रो स्थानमा रहेको हो । राजस्थान रोयल्सको नेटरनरेट प्लस २९८ र लखनऊको प्लस २५१ नेटरनरेट छ ।

चौथो स्थानमा बेंगलोर र दिल्ली मध्य एक टोली हुनेछन् । शनिबार दिल्लीले मुम्बईलाई हराएमा प्लेअफमा पुग्नेछ । दिल्ली पराजित हुँदा भने बेंगलोर प्लेअफमा पुग्ने समीकरण छ । चार पटकको च्याम्पियन चेन्नई योसँग दोस्रो पटक पहिलो चरणबाट बाहिरिएको हो । यसअघि २०२० मा मात्र पहिलो चरणबाट बाहिरिएको थियो ।

अंक तालिका

गुजरात १४ खेलमा १० मा जित र ४ मा हारका २० अंक जोड्दै शीर्ष स्थानमा रहँदै अन्त्य गर्यो । राजस्थान रोयल्स १४ खेलमा ९ मा जित र ५ मा हार सहित १८ अंकका साथ दोस्रो स्थानमा अन्त्य गर्यो । लखनऊ १४ खेलमा ९ मा जित र ५ मा हार सहित १८ अंकका साथ तेस्रो स्थानमा छ ।

बेंगलोर १४ खेलमा ८ मा जित र ६ मा हार सहित १६ अंकका साथ चौथो स्थानमा छ । दिल्ली १३ खेलमा ७ मा जित र ६ मा हार सहित १४ अंक जोड्दै पाँचौं स्थानमा छ । कोलकाता नाइट राइडर्स १३ खेलमा ६ मा जित र ८ खेलमा हार सहित छैटौं स्थानमा रहँदै बाहिरिएको छ ।

पन्जाब १३ खेलमा ७ मा जित र ६ मा हार बेहोर्दै १२ अंक जोड्दै साथ सातौं स्थानमा । हैदराबाद १३ खेलमा ६ मा जित र ७ मा हार सहित आठौं स्थानमा छ । चेन्नई १४ खेलमा ४ मा जित र १० मा हार सहित नवौं स्थानमा छ । मुम्बई १३ खेलमा ३ मा जित र १० मा हार सहित पुछारमा छ ।