एजेन्सी – इन्डियन प्रिमियर लिग (आइपिएल) २०२२ मा दिल्ली क्यापिटल्स मुम्बई इन्डियन्ससँग पराजित भएसँगै रोयल च्यालेन्जर्स बेंगलोर प्लेअफमा पुगेको छ । निर्णायक खेलमा दिल्ली ५ विकेटले पराजित भएपछि बेंगलोर १६ अंकका साथ अन्तिम चारमा रहेर प्लेअफमा पुगेको हो ।

जितको लागि १ सय ६० रनको विजयी लक्ष्य पछ्याएको मुम्बईले १९.१ ओभरमा ५ विकेट गुमाउँदै पूरा गर्यो । मुम्बईका ओपनर ईशान किशनले ३५ बलमा ३ चौका र ४ छक्कासहित सर्वाधिक ४८ रन बनाए । युवा ब्याटर डेवाल्ड ब्रेभिसले ३३ बलमा १ चौका र ३ छक्कासहित ३७ रन जोडे ।

टिम डेविडले ११ बलमा २ चौका र ४ छक्कासहित ३४ रन जोडेपछि मुम्बईको जित सहज बनेको थियो । तिलक बर्माले २१ र रमनदीपसंहले १३ रन बनाए । दिल्लीका शार्दुल ठाकुरले ३ ओभरमा ३२ रन खर्चेर २ विकेट लिए । एनरिच नोर्कियाले ४ ओभरमा ३७ रन खर्चेर २ विकेट लिए । कुलदीप यादवको नाममा १ विकेट रह्यो ।

त्यसअघि वानखडे स्टेडियम मुम्बईमा टस हारेर ब्याटिङको निम्तो पाएको दिल्लीले निर्धारित २० ओभरमा ७ विकेट गुमाउँदै १ सय ५९ रन बनायो । दिल्लीका रोभम्यान पावेलले ३४ बलमा १ चौका र ४ छक्कासहित सर्वाधिक ४३ रनको योगदान दिए । ऋषभ पन्त ३४ बलमा ४ चौका र १ छक्कासहित ३९ रनमा आउट भए ।

एक समय ८.४ ओभरमा ५०–४ को कमजोर अवस्थामा पुगेको दिल्लीलाई पाँचौं विकेटका लागि पन्त र पावेलले ७५ रनको महत्वपूर्ण साझेदारी गरेका थिए । पन्त रमनदीप सिंहको बलमा एज लागेर आउट भए ।

दिल्लीका ओपनर पृथ्वी शा २३ बलमा २ चौका र १ छक्कासहित २४ रनमा आउट भए । डेभिड वार्नर ५, मिचेल मार्श गोल्डेन डक र शरफराज खान १० रनमा आउट भए । अक्षर पटेलले १० बलमा २ छक्कासहित १९ रनमा अविजित रहे ।

मुम्बईका जस्प्रित बुमराहले ४ ओभरमा २५ रन खर्चेर ३ महत्वपूर्ण विकेट लिए । रमनदीप सिंहले २ ओभरमा २९ रन खर्चेर २ विकेट लिए । मयंक मारकान्डे र ड्यानियल साम्सले १-१ विकेट लिए ।

पहिलो क्वालिफायरमा मंगलबार शीर्षस्थानको गुजरात टाइटन्स र दोस्रो स्थानको राजस्थान रोयल्सबीच प्रतिस्पर्धा हुनेछ । बुधबार एलिमिनेटरमा बेंगलोर र लखनऊ सुपर जायन्ट्सबीच प्रतिस्पर्धा हुनेछ ।

दिल्ली यस खेलमा विजयी हुँदा १६ अंकका साथ नेटरनेटमा माथि रहँदै क्वालिफायर खेल्ने समिकरण थियो । तर मुम्बईको हारले १४ अंकमै रोकिएको हो । आफूले चाँहे जस्तै नतिजा आएपछि बेंगलोर १६ अंकका साथ एलिमिनेटरमा लखनऊसँगको भेट पक्का गरेको हो ।

पहिलो क्वालिफायरको विजेता टोली सोझै फाइनलमा पुग्नेछ । पराजित हुने टोलीले एलिमिनेटरको विजेतासँग दोस्रा क्वालिफायर खेल्नेछ । आइपिएलको दोस्रो क्वालिफायर २७ मे र फाइनल २९ मे मा अहमदाबादमा हुनेछ ।

अंक तालिका

गुजरात १४ खेलमा १० मा जित र ४ मा हारका २० अंक जोड्दै शीर्ष स्थानमा रहँदै अन्त्य गर्यो । राजस्थान रोयल्स १४ खेलमा ९ मा जित र ५ मा हार सहित १८ अंकका साथ दोस्रो स्थानमा अन्त्य गर्यो । लखनऊ १४ खेलमा ९ मा जित र ५ मा हार सहित १८ अंकका साथ तेस्रो स्थानमा छ ।

बेंगलोर १४ खेलमा ८ मा जित र ६ मा हार सहित १६ अंकका साथ चौथो स्थानमा छ । दिल्ली १४ खेलमा ७ मा जित र ७ मा हार सहित १४ अंक जोड्दै पाँचौं स्थानमा छ । कोलकाता नाइट राइडर्स १३ खेलमा ६ मा जित र ८ खेलमा हार सहित छैटौं स्थानमा रहँदै बाहिरिएको छ ।

पन्जाब १३ खेलमा ७ मा जित र ६ मा हार बेहोर्दै १२ अंक जोड्दै साथ सातौं स्थानमा । हैदराबाद १३ खेलमा ६ मा जित र ७ मा हार सहित आठौं स्थानमा छ । चेन्नई १४ खेलमा ४ मा जित र १० मा हार सहित नवौं स्थानमा छ । मुम्बई १४ खेलमा ४ मा जित र १० मा हार सहित पुछारमा छ ।