काठमाडौं (हाम्रो खेलकुद) – सिक्किममा जारी कञ्चनजंगा शिल्ड ए डिभिजन लिगमा नेपाल पुलिस क्लबले युक्सोम क्यापिटल्समाथि १० विकेटको जित हात पारेको छ ।
जितको लागि ७७ रनको विजयी लक्ष्य पछ्याएको पुलिसले ७.२ ओभरमा कुनै विकेट नगुमाई पूरा गर्यो । पुलिसका ओपनर पवन सरार्फले २५ बलमा ४ चौका र ४ छक्कासहित ४२ रनमा अविजित रहे । अनिल कुमार शाह १९ बलमा ५ चौकासहित २४ रनमा अविजित रहे ।
त्यसअघि सिक्किमको राङ्पोमा टस जितेर पहिला ब्याटिङ रोजेको युक्सोम २०.४ ओभरमा ७६ रनमा अल आउट भएको थियो । युक्सोमको लागि सौरभ प्रसादले १२ बलमा ३ चौकासहित सर्वाधिक १७ रन बनाए । मनोज शर्माले १४, विपिन शर्मा ५ र निखिल गौतम ९ रनमा आउट भए ।
पुलिसका लागि बायाँ हाते तीव्र गतिका युवा बलर प्रतिश जि.सी.ले ५ ओभरमा १ मेडनसहित १५ रन खर्चेर २ विकेट लिए । गुलशन झाले ५ ओभरमा २२ रन खर्चेर २ विकेट लिए । राशिद खानले ५ ओभरमा १७ रन खर्चेर २ विकेट लिए
पुलिसले दोस्रो खेलमा रोयल नर्थन ब्रोदर्शमाथि ७ विकेटले हराएको थियो । पहिलो खेल एचआरसिसी नाम्चीविरुद्ध पुलिसले निर्धारित ४० ओभरमा ३ सय २ रनमा अल आउट भएको थियो । तर वर्षाको कारण दोस्रो इनिङ हुन नसक्दा खेल रद्ध हुन पुगेको थियो ।
सिक्किम क्रिकेट बोर्डले आयोजना गर्ने उक्त प्रतियोगितामा रणजी ट्रफी खेलेका अनुभवी खेलाडी पनि खेल्नेछन् । पुलिस समूह ए मा छ । पुलिसको समूहमा स्थानीय एचआरसीसी नाम्ची, रोयल नर्थ ब्रोदर्श, अलपाइनल स्र्पोटिङ क्लब, युक्सम क्यापिटल्स छन् ।
