काठमाडौं (हाम्रो खेलकुद) – एभरेष्ट प्रिमियर लिग (इपिएल) लाई निरन्तरता दिन संस्थापक आमिर अख्तर र सहभागी ६ फ्रेन्चाइज टोलीले नेपाल क्रिकेट संघ (क्यान) समक्ष माग गरेका छन् ।

क्यानले अघिल्लो साता नेपाल टि२० लिग घोषणा गर्दै अब नेपालमा एक मात्र फ्रेन्चाइज लिग हुने भनेपछि इपिएल आयोजक र फ्रेन्चाइज टोलीले सोमबार एक पत्रकार सम्मेलनन गर्दै क्यानलाई निरन्तरता दिन आग्रह गरेका छन् । क्यानले आइसिसीको नियम अनुसार एक देशमा एक लिग मात्र हुने हुँदा अव नेपाल टि२० लिग मात्र हुने जनाएको थियो । तर इपिएलमा संस्थापक आमिर अख्तर र ६ फ्रेन्चाइज टोलीका मालिकले इपिएल गर्न पाउनु पर्ने क्यानसँग माग राखेका छन् ।

‘चार सफल संस्करण सम्पन्न गर्ने इपिएल विश्वको पाचौं र एसोसियट देशको नम्बर वान लिग हो । हाम्रो प्रयासलाई क्यानले न्याय गरेको छैन’, इपिएल संस्थापक अख्तरले भने,’आइसिसीले कतैपनि एउटा मात्र लिग गर्नुपर्छ भन्ने उल्लेख गरेको छैन । यदि त्यस्तो भएको भए क्यान नहुँदा आइसिसीले नेपाललाई तीन लिग आयोजना गर्न स्वीकृति दिने थिएन ।’

इपिएल आयोजना गर्न स्वीकृति नदिने भन्दा निकै आश्चर्य लागेको अख्तरले बताए । पटक पटक ताकेता गर्दा क्यानले आफूहरुलाई कुनैपनि जवाफ नदिएको पनि उनले बताए । ‘क्यानले हामीलाई कुनैपनि जवाफ दिएको छैन । हामीले मिडियामा आएपछि थाहा पाएका हौं । अघिल्लो संस्करण क्यानकै स्वीकृति पाएर आयोजना गरेका हौं । यसअघि आफूहरुलाई मान्यता नदिने कुनैपनि संकेत दिएको थिएन’, अख्तरले भने ।

यता ललितपुर प्याट्रियट्सका मालिका किशोर महर्जनले चार संस्करणमा झण्डै ५० करोड रुपैयाँ बराबर खर्च भएको दाबी गरे । ‘हामीलाई पीडा भएको छ । हाम्रो सबै खर्च जोड्ने हो भने ५० करोड रुपैयाँ बराबर हुन आउँछ । रकम नै त्यति नभएपनि हामीले आफूले खर्चेको समयको पनि मूल्य त हुन्छ । आज आएर हामीले सुरुवात गर्दाको लक्ष्यमा पुग्ने बेलामा क्यानले जुन निर्णय गर्यो त्यसबाट हामी एकदमै स्तब्ध भएका छौं’, महर्जनले भने ।

काठमाडौं किंग्स–११ का मालिक सञ्जय अग्रवालले महर्जनको भनाइमा सहमति जनाउँदै कर्पोरेट क्षेत्र व्यावसायिक फाइदा नभएर नेपाली खेलकुद विकास गर्न निस्वार्थ भावनाले लागेको बताए । ‘यो हाम्रो पीडाको आवाज हो । हामी कसैसँग झगडा र दोष दिन आएका पनि छैनौं । तर क्यानको निर्णयले खेलकुदमा लाग्न सोच्नुपर्ने हुन्छ । हामी क्रिकेट उकास्न भनेर आफ्नो क्षेत्रबाट योगदान गरेका छौं’, उनले भने । अग्रवालले जिम्बावेविरुद्ध सिरिजमा राष्ट्रिय टोलीलाई छोटो समयमा नै प्रायोजन गर्नु पनि क्रिकेटसँग लगाव भएर नै सम्भव भएको स्पष्ट पारे ।

यस सिजनको च्याम्पियन टोली चितवन टाइगर्सका मालिका किशोर भट्टाईले भने, ;नेपालमा पनि धेरै लिगहरु भएको छ । निजी क्षेत्रहरुले व्यावसाहिक रुपमा कसरी काम गर्न सक्छ । नेपालमा यसअघि पनि थुप्रै निजी कम्पनीले गरेको लगानीको फाइदा पाउन सकेनन् । आजको दिनमा पनि हामीले लगानी गरेको रिटर्न के भन्दै प्रश्न गरे । यसले कर्पोरेट क्षेत्रमा पक्कै राम्रो संदेश जाँदैन ।’

पोखरा राइनोजकी निर्देशक दीपा अग्रवालले पनि क्यानले पुनर्विचार गर्नुपर्ने बताइन् । ‘क्यान नहुँदा हामीले हरेक वर्ष आइसिसीसँग स्वीकृति लिएर अगाडि बढेका थियौं । क्यान आएपछि रोक लगाएको छ । यसमा क्यानले विचार गर्नुपर्छ’, निर्देशक अग्रवालले भनिन् ।

यता भैरहवा ग्ल्यायाडियटर्सका मालिका आदित्य संघाईंले क्यानले लिएको कदमले कर्पोरेट क्षेत्रमा राम्रो संदेश नगएको बताए । ‘ हामीले यत्रो वर्ष मिहिनेत गरेर एउटा ब्रान्ड बनाएका छौं । बिना कुनै जानकारी चालिएको यस कदमले राम्रो संदेश जाँदैन । क्यानले यसबारे राम्रोसँग सोच्न आवश्यक छ । कर्पोरेट क्षेत्रबाट हुँदै आएको सहयोग निरुत्साहित गर्दा खेल क्षेत्रलाई घाटा हुन्छ,’ उनले प्रष्ट पारे ।

इपिएलका सबै फ्रेन्चाइज टोलीका मालिकहरुले क्यानले आयोजना गर्न नदिए आगमी दिनमा आफूहरुले क्यानलाई सहयोग नगर्ने पनि बताएका छन् । सन् २०१६ देखि सुरु भएको इपिएलका चार संस्करण सकिएका छन् । पहिलो संस्करण पञ्चकन्या तेज, दोस्रो संस्करण विराटनगर वारियर्स, तेस्रो संस्करण ललित प्याट्रियटर्स र चौथो संकस्करण चितवन टाइगर्सले जितेको थियो ।

कार्यक्रमको भिडियो यहाँ :