काठमाडौं (हाम्रो खेलकुद) – भारतको सिक्किममा रहेको नेपाल पुलिस क्लब कञ्चनजंगशा शिल्ड ए डिभिजन क्रिकेट लिगमा अल्पाइन स्पोर्टिङ क्लबसँग ५ विकेटले पराजित भएको छ । पुलिसका योगेन्द्रसँग कार्कीले शतकीय इनिङ खेलेपनि रणजी स्टार खेलाडी चलेपछि पुलिसले सिक्किममा पहिलो हार बेहोर्न पुगेको हो ।

टस जितेर पहिला ब्याटिङ थालेको नेपाल पुलिस क्लबले निर्धारित ४० ओभरमा ७ विकेट गुमाउँदै २ सय ३६ रन बनाएको थियो । पुलिसका योगेन्द्रले १ सय बलमा १० चौका र २ छक्कासहित १ सय ४ रनको शतकीय इनिङ खेले । कप्तान अनिल कुमार शाह १६, शंकर राना ३४, दीलिप नाथ २५, राशिद खान १, गुलशन झा ६ र रोशन सिंह बुडल ९ रनमा आउट भए ।

प्रतिश जि.सी. ११ बलमा १ चौका र २ छक्कासहित २० रनमा अविजित रहे । अल्पाइनका अमित राजेराले सर्वाधिक तीन विकेट लिए । सिक्किमबाट १० रणजी ट्रफी खेलको अनुभव बटुलेका तीव्र गतिका बलर सुमित सिंहले दुई विकेट लिए । जितको लागि २ सय ३७ रनको विजयी लक्ष्य पछ्याएको अल्पाइनले ३६.३ ओभरमा ५ विकेट गुमाउँदै पूरा गर्यो ।

अल्पाइनको जितमा मणिशंकर मुरासिंहले ७८ बलमा १२ चौका र ४ छक्कासहित १ सय ६ रनको अविजित शतकीय इनिङ खेले । २९ वर्षीय मणिशंकरले त्रिपुराबाट घरेलु क्रिकेट खेल्ने गर्दछन् । उनले ७२ प्रथम श्रेणी, ५० लिष्ट ए र ५३ टि२० क्रिकेट खेलेका छन् । अलराउन्डर उनले प्रथम श्रेणीमा ४ शतक र १४ अर्धशतकसहित कुल ३ हजार २ सय १६ रन बनाउनुको साथै २ सय १९ विकेट लिएका छन् ।

त्यस्तै अलल्पाइनका आषिश थापाले ४५ बलमा १० चौकासहित ५४ रन जोडे । सिक्किमका विकेटकिपर आषिशले गत फेब्रुअरीमा रणजी ट्रफीमा विहारविरुद्ध आफ्नो करिअरको पहिलो शतक प्रहार गर्नेक्रममा १ सय ५१ रनको अविजित इनिङ खेलेका थिए । उनले २० प्रथम श्रेणी, २७ लिष्ट ए र २२ टि२० क्रिकेट खेलि सकेका छन् ।

अमित राजेराले ३७ रन बनाए । अल्पाइनलको टोलीमा आषिश, मणिशंकर, सुमित सिंह, निलेश लामिछाने लगायतका रणजी अनुभवी खेलाडी थिए । नेपाल पुलिसका अनिल खरेलले दुई, गुलशन झा र राशिद खानले १–१ विकेट लिए । पुलिस आमन्त्रिण टोली हुँदा सेमिफाइनल भने खेल्न पाउने छैन । पुलिस अव स्वदेश फर्किनेछ ।

पुलिसले पहिलो खेलमा एचआरसिसी नाम्चीविरुद्ध निर्धारित ४० ओभरमा ३ सय २ रनमा अल आउट भएपनि वर्षाको कारण दोस्रो इनिङ हुन नसक्दा रद्ध हुन पुगेको थियो । दोस्रो खेलमा रोयल नर्थन ब्रोदर्शमाथि ७ विकेट र तेस्रो खेलमा युक्सोम क्यापिटल्सलाई १० विकेटले हराएको थियो । पुलिसले दोस्रो पटक यस प्रतियोगिता खेलेको हो । गतवर्ष पुलिस सबै खेलमा जितका साथ फर्किएको थियो ।